Read Papantla Totonac Levitiko 10 Bible Online

Levitiko 10 - Papantla Totonac bible

Levitiko 10

¹Awor Nadab i Abiu, yu hombernan di Aaron, kada un a kohe su wea-pa-kandela, i despues di a pone kandela den nan, nan a pone sensia riba esaki i a ofrese kandela strano dilanti di SENOR, lokual E no a ordena nan.

²I kandela a sali for di e presensia di SENOR i a kaba ku nan, i nan a muri dilanti di SENOR.

³E ora ei Moises a bisa Aaron: "Esaki ta loke SENOR a papia, bisando: 'Atraves di esnan ku hala serka Mi lo Mi wordu trata komo santu, i dilanti di henter e pueblo lo Mi wordu onra.'" I Aaron a keda ketu.

⁴Tambe Moises a yama Misael i Elzafan, yu hombernan di Uziel, tio di Aaron, i a bisa nan: "Hala serka, karga boso rumannan for di dilanti di e santuario i hiba nan pafo di e kampamentu."

⁵Asina nan a hala serka i a karga nan, ku nan tunika bisti ainda, hiba pafo di e kampamentu, manera Moises a bisa.

⁶E ora ei Moises a bisa Aaron ku su yu hombernan Eleazar i Itamar: "No kita kabes sunu ni sker boso pananan, pa boso no muri, i pa Dios no bira furioso riba henter e kongregashon. Ma boso rumannan, henter e kas di Israel, mag lamenta e kimamentu ku SENOR a laga sosode.

⁷No sali for di porta di e tent di reunion pa boso no muri; pasobra SENOR Su zeta di unshon ta riba boso." I nan a hasi konforme e palabra di Moises.

⁸E ora ei SENOR a papia ku Aaron, bisando:

⁹"No bebe bina ni bibida sterki, ni abo ni bo yu hombernan huntu ku bo, ora boso ta bai den e tent di reunion, pa boso no muri--ta un statuto perpetuo durante di tur boso generashonnan--

¹⁰i pa hasi un distinshon entre loke ta santu i loke ta profano i entre loke ta impuru i loke ta limpi,

¹¹i pa sina e yunan di Israel tur e statutonan ku SENOR a bisa nan pa medio di Moises."

¹²E ora ei Moises a bisa Aaron i su yu hombernan ku a sobrebibi, Eleazar i Itamar: "Kohe e ofrenda di mainshi ku a sobra di e ofrendanan di kandela di SENOR i kome esaki sin zurdeg banda di e altar, pasobra e ta masha santu mes.

¹³Kome esaki den un luga santu, pasobra ta bo derecho i derecho di bo yu hombernan for di e ofrendanan di kandela di SENOR, pasobra t'asina mi a wordu ordena.

¹⁴Ma e pechu di e ofrenda di zoyamentu i e pia di e ofrenda boso mag kome den un luga limpi, abo ku bo yu hombernan i bo yu muhenan huntu ku bo; pasobra nan a wordu duna komo bo derecho i komo derecho di bo yu hombernan for di e sakrifisionan di e ofrendanan di pas di e yunan di Israel.

¹⁵E pia ofresi pa medio di halsamentu i e pechu ofresi pa medio di zoyamentu nan mester hiba huntu ku e ofrendanan di kandela di e porshonnan di vet, pa presenta esakinan komo un ofrenda di zoyamentu dilanti di SENOR; asina e mester ta un kos ku ta bo derecho pa semper i derecho di bo yu hombernan huntu ku bo, meskos ku SENOR a ordena."

¹⁶I ku tur diligensia Moises a buska e kabritu di e ofrenda pa pika, ma ata, el a wordu kima! I e tabata rabia ku Aaron su yu hombernan ku a sobrebibi, Eleazar i Itamar, i a bisa:

¹⁷"Pakiko boso no a kome e ofrenda pa pika na e luga santu? Pasobra e ta masha santu mes, i El a duna boso esaki pa karga e kulpa di e kongregashon, pa hasi ekspiashon pa nan dilanti di SENOR.

¹⁸Mira, komo ku su sanger no a wordu tresi paden, den e santuario, siguramente boso mester a kom'e den e santuario, meskos ku mi a ordena."

¹⁹Ma Aaron a bisa Moises: "Mira, awe nan a presenta nan ofrenda pa pika i nan ofrenda kima dilanti di SENOR. Ora kosnan manera esakinan sosode ku mi, si mi a kome un ofrenda pa pika awe, esei lo tabata bon den bista di SENOR?"

²⁰I ora Moises a tende esei, el a keda satisfecho.