Read Papantla Totonac Levitiko 11 Bible Online

Levitiko 11 - Papantla Totonac bible

Levitiko 11

¹SENOR a bolbe papia ku Moises i Aaron, bisando nan:

²"Papia ku e yunan di Israel, bisando: 'Esakinan ta e bestianan ku boso mag kome for di tur e bestianan ku tin riba tera.

³Tur loke tin huf dividi entre e bestianan, esta, huf kompletamente gespleit, i ku ta kou kuminda dos biaha, eseinan boso mag kome.

⁴'Sinembargo, di esakinan boso no mag kome entre esnan ku ta kou kuminda dos biaha of entre esnan ku tin huf dividi: kamel, pasobra ounke ku e ta kou kuminda dos biaha, e no tin huf dividi; e ta impuru pa boso.

⁵Konenchi di baranka tambe, pasobra ounke ku e ta kou kuminda dos biaha, e no tin huf dividi; e ta impuru pa boso;

⁶has tambe, pasobra ounke ku e ta kou kuminda dos biaha, e no tin huf dividi; e ta impuru pa boso;

⁷i porko, pasobra ounke ku e tin huf dividi, esta, huf kompletamente gespleit, e no ta kou kuminda dos biaha; e ta impuru pa boso.

⁸Boso no mester kome di nan karni ni mishi ku nan kadaver; nan ta impuru pa boso.

⁹'Esakinan boso mag kome di tur loke tin den awa: tur loke tin hala i skama, esnan den awa, den laman of den riu, boso mag kome.

¹⁰Ma tur loke tin den laman i den riu ku no tin hala ni skama entre tur loke ta move den awa i entre tur bestia bibu ku tin den awa, eseinan ta kosnan abominabel pa boso.

¹¹Nan mester ta abominabel pa boso; boso no mag kome di nan kami, i nan kadaver boso mester aborese.

¹²Tur loke tin den awa, ku no tin hala ni skama, ta abominabel pa boso.

¹³'Ademas, esakinan boso mester aborese entre e parhanan; nan ta abominabel, no mag kome nan: aguila, falki-kibrado-di-wesu i falki pretu,

¹⁴warawara i tur sorto di falki,

¹⁵tur sorto di raf,

¹⁶abestrus, shoko, meuchi i tur sorto di kinikini,

¹⁷shoko chikitu, samuro i shoko grandi,

¹⁸shoko blanku, pelikan i falki ku ta kome bestia morto,

¹⁹oyevar i tur sorto di garabet, i bubi i raton di anochi.

²⁰'Tur insekto ku tin hala, ku ta kana riba kuater pia, mester ta abominabel pa boso.

²¹Sinembargo, esakinan boso mag kome entre tur insekto di hala ku ta kana riba kuater pia: esnan ku, ademas di pia, tin pal'i pia pa bula riba suela kune.

²²Esakinan boso mag kome: tur sorto di tirakochi grandi, tur sorto di tirakochi migratorio, tur sorto di kriki i tur sorto di tirakochi chikitu.

²³Ma tur otro insekto ku tin hala, ku tin kuater pia, mester ta abominabel pa boso.

²⁴'Ademas, dor di esakinan boso lo bira impuru; ken ku mishi ku nan kadaver ta bira impuru te ora nochi sera,

²⁵i ken ku kohe un di nan kadavernan mester laba su pananan i keda impuru te ora nochi sera.

²⁶'Enkuanto tur e bestianan ku tin huf dividi, ma ku no tin huf kompletamente gespleit of ku no ta kou kuminda dos biaha, nan ta impuru pa boso. Ken ku mishi ku nan ta bira impuru.

²⁷Tambe tur loke ta kana riba plant'i pia entre tur e bestianan ku ta kana riba kuater pia, ta impuru pa boso. Ken ku mishi ku nan kadaver ta bira impuru te ora nochi sera,

²⁸i esun ku kohe nan kadaver mester laba su pananan i keda impuru te ora nochi sera; nan ta impuru pa boso.

²⁹'Awor pa boso esakinan ta impuru entre tur loke ta kriul, ku ta kriul den otro riba tera: mol, raton i tur sorto di lagadishi grandi,

³⁰pegapega, kaiman, lagadishi, kolebra di santu i kameleon.

³¹Esakinan ta impuru pa boso entre tur loke ta kriul riba tera. Ken ku mishi ku nan ora nan ta morto ta bira impuru te ora nochi sera.

³²Tambe tur loke ku un di nan por a kai ariba despues ku el a muri ta bira impuru, sea kualke artikulo di palu, of pana di bisti, of kueru of saku--kualke artikulo--e mester wordu poni den awa i keda impuru te ora nochi sera; e ora ei e lo ta limpi.

³³I tur wea di klei den kual un di nan por a kai, kiko ku tin den dje ta bira impuru, i boso mester kibra e wea.

³⁴Tur kuminda ku boso mag kome, riba kual awa kai, lo bira impuru; i tur likido ku boso mag bebe for di tal wea lo bira impuru.

³⁵Tambe tur kos ku parti di nan kadaver por a kai ariba ta bira impuru; un fornu of un fogon mester wordu kibra na pida-pida; nan ta impuru i mester keda impuru pa boso.

³⁶Sinembargo, un fuente of un rembak ku ta yen di awa lo ta puru, ma esun ku mishi ku nan kadaver lo keda impuru.

³⁷I si un parti di nan kadaver kai riba algun simia pa sembra ku mester wordu sembra, esaki si ta limpi.

³⁸Ma si awa a wordu poni riba e simia, i un parti di nan kadaver kai riba e simia, e ta impuru pa boso.

³⁹'Tambe, si un di e bestianan, ku boso tin pa kome, muri, esun ku mishi ku su kadaver ta bira impuru te ora nochi sera.

⁴⁰Tambe esun ku kome un pida di su kadaver mester laba su pananan i keda impuru te ora nochi sera. I esun ku kohe su kadaver mester laba su pananan i keda impuru te ora nochi sera.

⁴¹'Awor tur loke ta kriul, ku ta kriul den otro riba tera, ta abominabel; no mag kome nan.

⁴²Tur loke ta lastra riba barika i tur loke ta kana riba kuater pia, tur loke tin hopi pia entre tur loke ta kriul, ku ta kriul den otro riba tera, boso no mag kome nan, pasobra nan ta abominabel.

⁴³No hasi boso mes abominabel ku nada ku ta kriul, ku ta kriul den otro. No hasi boso mes impuru ku nan, asina ku boso ta bira impuru.

⁴⁴Pasobra Ami ta SENOR boso Dios. Konsagra boso mes anto i sea santu, pasobra Ami ta santu. I no hasi boso mes impuru ku ningun di e kosnan ku ta kriul, ku ta kriul den otro riba tera.

⁴⁵Pasobra Ami ta SENOR, Kende a saka boso for di tera di Egipto, pa ta boso Dios; pesei, sea santu, pasobra Ami ta santu.'"

⁴⁶Esaki ta e lei tokante di bestia, parha i tur ser bibu ku ta move den e awanan, i tur loke ta kriul den otro riba tera,

⁴⁷pa hasi distinshon entre esnan impuru i esnan limpi, i entre bestia ku boso mag kome i bestia ku boso no mag kome.