Read Papantla Totonac Levitiko 13 Bible Online

Levitiko 13 - Papantla Totonac bible

Levitiko 13

¹E ora ei SENOR a papia ku Moises i ku Aaron, bisando:

²"Ora ku un homber tin un hincha, un sarna of un pleki kolo kla na e kueru di su kurpa, i esaki bira un infekshon di lepra na e kueru di su kurpa, e ora ei e mester wordu hiba serka saserdote Aaron, of serka un di su yu hombernan, e saserdotenan.

³I e saserdote mester wak e marka na e kueru di su kurpa, i si e kabei den e infekshon a bira blanku i e infekshon ta parse di ta mas profundo ku e kueru di su kurpa, ta un infekshon di lepra; ora ku e saserdote a kaba di wak e, e mester deklar'e impuru.

⁴Ma si e pleki kolo kla ta blanku na e kueru di su kurpa, i no ta parse di ta mas profundo ku e kueru, i e kabei riba dje no a bira blanku, e ora ei pa shete dia e saserdote mester isola esun ku tin e infekshon.

⁵I e saserdote mester wak e riba e di shete dia, i si e mira ku e infekshon no a kambia, i e infekshon no a plama riba su kueru, e ora ei e saserdote mester isol'e pa shete dia mas.

⁶I e saserdote mester bolbe wak e riba e di shete dia; i si e infekshon a bira mas skur i e marka no a plama riba su kueru, e ora ei e saserdote mester deklar'e limpi; ta solamente un sarna. I e homber mester laba su pananan i keda limpi.

⁷Ma si e sarna sigui plama riba su kueru, despues ku el a mustra su mes na e saserdote pa su purifikashon, e mester bolbe presenta dilanti di e saserdote.

⁸I e saserdote mester wak e, i si e sarna a plama riba su kueru, e ora ei e saserdote mester deklar'e impuru; ta lepra.

⁹"Ora tin infekshon di lepra na un hende su kurpa, e mester wordu hiba serka e saserdote.

¹⁰E ora ei e saserdote mester wak e, i si tin un hincha blanku na su kueru, i esaki a hasi e kabei bira blanku, i tin karni bibu ta krese den e hincha,

¹¹ta un lepra kronika riba e kueru di su kurpa, i e saserdote mester deklar'e impuru; e no mester isol'e, pasobra e ta impuru.

¹²"I si e lepra sali tur kaminda riba su kueru, i e lepra kubri henter e kueru di esun ku tin e infekshon for di su kabes te na su pia, asina leu ku e saserdote por mira,

¹³e ora ei e saserdote mester wak e, i si e lepra a tapa henter su kurpa, e mester deklara esun ku tin e infekshon, limpi; e infekshon a bira tur blanku i e ta limpi.

¹⁴Ma ki ora ku karni bibu parese na su kurpa, e lo ta impuru.

¹⁵I e saserdote mester wak e karni bibu, i e mester deklar'e impuru; e karni bibu ta impuru; ta lepra.

¹⁶Of si e karni bibu bolbe kambia i bira blanku, e ora ei e mester bin serka e saserdote,

¹⁷i e saserdote mester wak e, i si e infekshon a bira blanku, e ora ei e saserdote mester deklara esun ku tin e infekshon, limpi; e ta limpi.

¹⁸"I ora tin un blufein riba kueru di e kurpa, i esaki a kura,

¹⁹i na luga di e blufein tin un hincha blanku of un pleki blanku-kora ku ta lombra, e ora ei mester mustra esaki na e saserdote;

²⁰i e saserdote mester wak esaki, i si e parse di ta mas profundo ku e kueru, i e kabei riba dje a bira blanku, e ora ei e saserdote mester deklar'e impuru; ta infekshon di lepra ku a sali den e blufein.

²¹Ma si e saserdote wak esaki, i no tin kabei blanku den dje i e no ta mas profundo ku e kueru i a kuminsa kita, e ora ei e saserdote mester isol'e pa shete dia;

²²i si e sigui plama riba su kueru, e ora ei e saserdote mester deklar'e impuru; ta un infekshon.

²³Ma si e pleki kolo kla keda meskos i no plama, ta solamente sikatris di e yaga; i e saserdote mester deklar'e limpi.

²⁴"Of si den e kueru e kurpa hana un kima di kandela, i e karni bibu di e kima bira un pleki blanku-kora ku ta lombra, of blanku,

²⁵e ora ei e saserdote mester wak esaki. I si e kabei den e pleki kolo kla a bira blanku i ta parse di ta mas profundo ku e kueru, ta lepra; esaki a sali den e kima. Pesei e saserdote mester deklar'e impuru; ta un infekshon di lepra.

²⁶Ma si e saserdote wak esaki, i di berdat no tin kabei blanku den e pleki kolo kla, i e no ta mas profundo ku e kueru, ma ta dof, e ora ei e saserdote mester isol'e pa shete dia;

²⁷i e saserdote mester wak e riba e di shete dia. Si e pleki kolo kla plama tur kaminda den e kueru, e ora ei e saserdote mester deklar'e impuru; ta un infekshon di lepra.

²⁸Ma si e pleki kolo kla keda na mesun luga i no a plama den e kueru, ma ta dof, ta un hincha kousa dor di e kima; i e saserdote mester deklar'e limpi, pasobra ta solamente sikatris di e kima.

²⁹"Awor si un homber of un muhe tin un infekshon riba kabes of den barba,

³⁰e ora ei e saserdote mester wak e infekshon, i si esaki parse di ta mas profundo ku e kueru i tin un tiki kabei hel aden, e ora ei e saserdote mester deklar'e impuru; ta un infekshon riba kabes, ta lepra di kabes of di barba.

³¹Ma si e saserdote wak e infekshon di iritashon, i di berdat e ta parse di no ta mas profundo ku e kueru, i no tin kabei pretu den dje, e ora ei pa shete dia e saserdote mester isola e persona ku tin e infekshon di iritashon.

³²I riba e di shete dia e saserdote mester wak e infekshon, i si e iritashon no a plama, i kabei hel no a krese den dje, i e iritashon no ta parse di ta mas profundo ku e kueru,

³³e ora ei e mester feita su mes sin feita e iritashon; i e saserdote mester isola e persona ku tin e iritashon shete dia mas.

³⁴E ora ei riba e di shete dia e saserdote mester wak e iritashon, i si e iritashon no a plama den e kueru, i no ta parse di ta mas profundo ku e kueru, e saserdote mester deklar'e limpi; i e mester laba su pananan i keda limpi.

³⁵Ma si e iritashon sigui plama den e kueru despues di su purifikashon,

³⁶e ora ei e saserdote mester wak e, i si e iritashon a plama den e kueru, e saserdote no tin mester di buska kabei hel; e ta impuru.

³⁷Sinembargo, si e ta hana ku e iritashon a keda, i kabei pretu a krese den dje, e ora ei e iritashon a kura, e ta limpi; i e saserdote mester deklar'e limpi.

³⁸"I ora ku un homber of un muhe tin pleki kolo kla na e kueru di su kurpa, esta, pleki blanku,

³⁹e ora ei e saserdote mester wak nan, i si e plekinan kolo kla na e kueru di nan kurpa ta un blanku dof, ta eksema ku a sali den e kueru; e ta limpi.

⁴⁰"Awor si un homber su kabei riba su kabes kai, e ta pelon; e ta limpi.

⁴¹I si su kabes bira pelon dilanti i na banda, e ta pelon na su frenta; e ta limpi.

⁴²Ma si riba e kabes pelon of e frenta pelon ta sali un infekshon blanku-kora, ta lepra ku ta sali riba su kabes pelon of na su frenta pelon.

⁴³E ora ei e saserdote mester wak e; i si e hincha di e infekshon ta blanku-kora riba su kabes pelon of na su frenta pelon, manera aparensia di lepra riba kueru di e kurpa,

⁴⁴e ta un homber leproso; e ta impuru. Siguramente e saserdote mester deklar'e impuru; su infekshon ta riba su kabes.

⁴⁵"Pa loke ta e leproso ku tin e infekshon, e mester bisti pana kibra, i su kabes mester ta sunu, i e mester tapa su mustashi i grita: 'Impuru! Impuru!'

⁴⁶Tanten ku e tin e infekshon e lo keda impuru; e ta impuru. E mester biba su so; su luga di biba mester ta pafo di e kampamentu.

⁴⁷"Ora ku un pana tin un marka di lepra den dje, sea ku ta un pana di lana of un pana di lino,

⁴⁸sea den loke ta gebrei of loke ta gewef, di lino of di lana, sea den kueru of den kualke artikulo traha di kueru,

⁴⁹si e marka ta manera berde asina of manera kora asina den e pana of den e kueru, of den loke ta gebrei of den loke ta gewef, of den kualke artikulo di kueru, ta un marka di lepra i e mester wordu mustra na e saserdote.

⁵⁰E ora ei pa shete dia e saserdote mester wak e marka i isola e artikulo ku tin e marka aden.

⁵¹I e mester wak e marka riba e di shete dia, i si e marka a plama den e pana, sea den loke ta gebrei of den loke ta gewef, of den e kueru, loke sea e proposito pa kual e kueru ta wordu uza, e marka ta un lepra maligno; e ta impuru.

⁵²Pesei e mester kima e pana, sea loke ta gebrei of loke ta gewef, den lana of den lino, of kualke artikulo di kueru ku tin e marka aden, pasobra ta un lepra maligno; e mester wordu kima den kandela.

⁵³"Ma si e saserdote wak esaki, i di berdat e marka no a plama den e pana, ni den loke ta gebrei of den loke ta gewef, of den kualke artikulo di kueru,

⁵⁴e ora ei e saserdote mester ordena nan pa laba e kos ku tin e marka aden, i e mester isola esaki shete dia mas.

⁵⁵Despues ku e artikulo ku tin e marka aden wordu laba, e saserdote mester wak esaki atrobe, i si e marka no a kambia di aparensia, ounke ku e marka no a plama, e ta impuru; bo mester kim'e den kandela; e ta sigui kome bai, sea ku e dano ta pafo of paden.

⁵⁶E ora ei, si e saserdote wak esaki, i si e marka a bira dof despues di a wordu laba, anto e mester sker esaki kit'e for di e pana of for di e kueru, sea for di loke ta gebrei of for di loke ta gewef;

⁵⁷i si e marka parese atrobe den e pana, sea den loke ta gebrei of den loke ta gewef, of den kualke artikulo di kueru, ta un lepra ku ta plama; e artikulo ku tin e marka aden mester wordu kima den kandela.

⁵⁸I e pana, sea loke ta gebrei of loke ta gewef, of kualke artikulo di kueru, for di kual e marka a kita ora ku bo a lab'e, esaki mester wordu laba pa di dos biaha i lo keda limpi."

⁵⁹Esaki ta e lei pa marka di lepra den un pana di lana of di lino, sea den loke ta gebrei of den loke ta gewef, of den kualke artikulo di kueru, pa deklar'e limpi of impuru.