Read Papantla Totonac Levitiko 14 Bible Online

Levitiko 14 - Papantla Totonac bible

Levitiko 14

¹E ora ei SENOR a papia ku Moises, bisando:

²"Esaki mester ta e lei pa e leproso den e dia di su purifikashon. Awor e mester wordu hiba pa e saserdote,

³i e saserdote mester sali bai pafo di e kampamentu. Asina e saserdote mester wak e, i si e infekshon di lepra a wordu kura na kurpa di e leproso,

⁴e ora ei e saserdote mester duna ordu pa kohe dos parha bibu i limpi, palu di seda, un hilu skarlata i hisop pa esun ku mester wordu purifika.

⁵Tambe e saserdote mester duna ordu pa mata un di e parhanan den un wea di klei ofer di awa ku ta kore.

⁶Pa loke ta e parha bibu, e saserdote mester koh'e huntu ku e palu di seda, e hilu skarlata i e hisop, i dop nan, i e parha bibu, den e sanger di e parha ku a wordu mata ofer di e awa ku ta kore.

⁷E ora ei e mester sprengu shete biaha esun ku mester wordu purifika di lepra, i deklar'e limpi. E ora ei e mester laga e parha bibu bula bai den kunuku.

⁸"Esun ku mester wordu purifika mester laba su pananan i feita tur su kabei, i bana den awa i keda limpi. Despues e mag bai den e kampamentu, ma e mester keda pafo di su tent pa shete dia.

⁹I lo sosode ku riba e di shete dia e mester feita tur su kabei: e mester feita su kabes, su barba i su wenkbrou, esta, tur su kabei. E ora ei e mester laba su pananan i bana su kurpa den awa i keda limpi.

¹⁰"I riba e di ocho dia e mester kohe dos lamchi machu sin defekto i un lamchi muhe di un ana sin defekto i tres desimo parti di un efa di harina fini meskla ku zeta, komo un ofrenda di mainshi, i un pinchi di zeta;

¹¹i e saserdote ku ta deklar'e limpi mester presenta e homber ku mester wordu purifika, huntu ku e kosnan ei, dilanti di SENOR na entrada di e tent di reunion.

¹²"E ora ei e saserdote mester kohe un di e lamchinan machu i hib'e komo un ofrenda pa kulpa, huntu ku e pinchi di zeta, i presenta nan komo un ofrenda di zoyamentu dilanti di SENOR.

¹³Kaba e mester mata e lamchi machu na e luga kaminda nan ta mata e ofrenda pa pika i e ofrenda kima, na e luga di e santuario--pasobra e ofrenda pa kulpa, meskos ku e ofrenda pa pika, ta pa e saserdote; e ta masha santu mes.

¹⁴E ora ei e saserdote mester kohe poko di e sanger di e ofrenda pa kulpa, i e saserdote mester pone esaki na klep di orea drechi di esun ku mester wordu purifika, i na duim di su man drechi, i na dede grandi di su pia drechi.

¹⁵Tambe e saserdote mester kohe poko di e pinchi di zeta i bash'e den su plant'i man robes;

¹⁶anto e saserdote mester dop dede di su man drechi den e zeta ku tin den su plant'i man robes, i ku su dede sprengu poko di e zeta shete biaha dilanti di SENOR.

¹⁷I di e sobra zeta ku tin den su plant'i man e saserdote mester pone poko na klep di orea drechi di esun ku mester wordu purifika, i na duim di su man drechi, i na dede grandi di su pia drechi, riba e sanger di e ofrenda pa kulpa;

¹⁸i loke ku a resta di e zeta den su plant'i man, e saserdote mester pone riba kabes di esun ku mester wordu purifika. Asina e saserdote mester hasi ekspiashon p'e dilanti di SENOR.

¹⁹"Kaba e saserdote mester ofrese e ofrenda pa pika i hasi ekspiashon pa esun ku mester wordu purifika di su impuresa. I despues e mester mata e ofrenda kima.

²⁰I e saserdote mester ofrese e ofrenda kima i e ofrenda di mainshi riba e altar. Asina e saserdote mester hasi ekspiashon p'e, i e lo keda limpi.

²¹"Ma si e ta pober i su medionan ta insufisiente, e ora ei e mester kohe un lamchi machu komo un ofrenda pa kulpa, komo un ofrenda di zoyamentu pa hasi ekspiashon p'e, i un desimo parti di un efa di harina fini meskla ku zeta, komo un ofrenda di mainshi, i un pinchi di zeta,

²²i dos tortelduif of dos pichon, manera ku e por; esun mester ta un ofrenda pa pika i e otro un ofrenda kima.

²³"Anto riba e di ocho dia e mester hiba nan pa su purifikashon serka e saserdote, na entrada di e tent di reunion, dilanti di SENOR.

²⁴I e saserdote mester kohe e lamchi di e ofrenda pa kulpa i e pinchi di zeta, i ofrese nan komo un ofrenda di zoyamentu dilanti di SENOR.

²⁵Kaba e mester mata e lamchi di e ofrenda pa kulpa, i kohe poko di e sanger di e ofrenda pa kulpa i pone esaki na klep di orea drechi di esun ku mester wordu purifika i na duim di su man drechi i na dede grandi di su pia drechi.

²⁶Tambe e saserdote mester basha poko di e zeta den su plant'i man robes;

²⁷i ku dede di su man drechi e saserdote mester sprengu poko di e zeta ku tin den su plant'i man robes shete biaha dilanti di SENOR.

²⁸E ora ei e saserdote mester pone poko di e zeta ku tin den su plant'i man na klep di orea drechi di esun ku mester wordu purifika, i na duim di su man drechi, i na dede grandi di su pia drechi, riba e luga di e sanger di e ofrenda pa kulpa.

²⁹Ademas, sobra di e zeta ku tin den e saserdote su plant'i man e mester pone riba kabes di esun ku mester wordu purifika, pa hasi ekspiashon p'e dilanti di SENOR.

³⁰I e mester ofrese un di e tortelduifnan of pichonnan, segun ku e por.

³¹E mester ofrese loke ku e por, esun komo un ofrenda pa pika i e otro komo un ofrenda kima, huntu ku e ofrenda di mainshi. Asina e saserdote mester hasi ekspiashon dilanti di SENOR pa esun ku mester wordu purifika.

³²"Esaki ta e lei pa esun ku tin un infekshon di lepra, kende su medionan pa su purifikashon ta limita."

³³I SENOR a papia ku Moises i Aaron, bisando:

³⁴"Ora boso drenta tera di Kanaan ku Mi ta duna boso komo propiedat, i Mi pone un marka di lepra riba un kas den e tera di boso propiedat,

³⁵e ora ei esun ku ta dono di e kas mester bin i konta e saserdote, bisando: 'Mi a ripara den mi kas algu ku ta parse un marka di lepra.'

³⁶E ora ei e saserdote mester ordena pa nan hasi e kas bashi prome ku e saserdote bai paden pa mira e marka, pa tur kos den e kas no tin mester di bira impuru; i despues e saserdote mester bai paden pa mira e kas.

³⁷Asina e mester wak e marka, i si e marka na e murayanan di e kas tin buraku-buraku manera berde asina of manera kora asina i ta parse di ta mas profundo ku e superfisio,

³⁸e ora ei e saserdote mester sali for di e kas bai na entrada di e kas, i isola e kas pa shete dia.

³⁹I e saserdote mester bolbe riba e di shete dia i wak e kas. Si di berdat e marka a plama den e murayanan di e kas,

⁴⁰e ora ei e saserdote mester ordena nan pa saka e piedranan ku tin e marka aden i tira nan afo na un luga impuru pafo di stat.

⁴¹I e mester laga raspa tur ront paden di e kas, i nan mester deposita e pleister ku nan raspa kit'afo na un luga impuru pafo di stat.

⁴²E ora ei nan mester kohe otro piedra i remplasa e piedranan ei, i kohe otro pleister i pleister e kas di nobo.

⁴³"Ma si akaso e marka bolbe parese den e kas, despues ku el a saka e piedranan i a raspa e kas, i despues ku el a wordu gepleister di nobo,

⁴⁴e ora ei e saserdote mester bin den e kas i wak e marka. Si e mira ku di berdat e marka a plama den e kas, e ora ei ta marka di un lepra maligno tin den e kas; e ta impuru.

⁴⁵Pesei e mester basha e kas abou, e piedranan i e palunan i tur e pleister di e kas, i hiba nan pafo di e stat na un luga impuru.

⁴⁶"Ademas, ken ku bai den e kas durante di e tempu ku el a isol'e, ta bira impuru te ora nochi sera.

⁴⁷Di e mesun manera, ken ku kai drumi den e kas mester laba su pananan, i ken ku kome den e kas mester laba su pananan.

⁴⁸"Ma si e saserdote drenta i wak e kas, i di berdat e marka no a plama den dje, despues ku e kas a wordu gepleister di nobo, e ora ei e saserdote mester deklara e kas limpi, pasobra e marka no a bin bek.

⁴⁹Anto pa purifika e kas e saserdote mester kohe dos parha, palu di seda, un hilu skarlata i hisop.

⁵⁰I e mester mata un di e parhanan den un wea di klei ofer di awa ku ta kore.

⁵¹E ora ei e mester kohe e palu di seda, e hisop i e hilu skarlata, huntu ku e parha bibu, i dop nan den e sanger di e parha mata i tambe den e awa ku ta kore, i sprengu e kas shete biaha.

⁵²Asina e mester purifika e kas ku e sanger di e parha i ku e awa ku ta kore, huntu ku e parha bibu, e palu di seda, e hisop i e hilu skarlata.

⁵³Ma e parha bibu e mester laga bula bai pafo di e stat den aire liber di kunuku. Asina e mester hasi ekspiashon pa e kas, i esaki lo keda limpi."

⁵⁴Esaki ta e lei pa kualke marka di lepra--tambe pa un infekshon riba kabes,

⁵⁵i pa lepra di pana of di kas,

⁵⁶i pa un hincha, pa un sarna i pa un pleki kolo kla--

⁵⁷pa sina hende ki ora nan ta impuru i ki ora nan ta limpi. Esaki ta e lei di lepra.