Read Papantla Totonac Levitiko 15 Bible Online

Levitiko 15 - Papantla Totonac bible

Levitiko 15

¹Tambe SENOR a papia ku Moises i Aaron, bisando:

²"Papia ku e yunan di Israel i bisa nan: 'Ora ku un homber tin un derama for di su kurpa, su derama ta impuru.

³Ademas, esaki lo ta su impuresa den su derama: sea ku su kurpa laga e derama basha of sea ku su kurpa wanta e derama, ta su impuresa.

⁴'Tur kama ku e persona ku tin e derama drumi ariba lo ta impuru, i tur loke ku e sinta ariba lo ta impuru.

⁵I ken ku mishi ku su kama mester laba su pananan i bana den awa i keda impuru te ora nochi sera.

⁶Ken ku sinta riba e kos ku e homber ku tin e derama a sinta ariba mester laba su pananan, bana den awa i keda impuru te ora nochi sera.

⁷'Tambe ken ku mishi ku e persona ku tin e derama mester laba su pananan, bana den awa i keda impuru te ora nochi sera.

⁸'Of si e homber ku tin e derama skupi riba un hende ku ta limpi, esei tambe mester laba su pananan i bana den awa i keda impuru te ora nochi sera.

⁹'I tur siya ku e persona ku tin e derama sinta ariba ta bira impuru.

¹⁰Ken ku mishi ku algu ku tabatin bou di e homber lo ta impuru te ora nochi sera, i esun ku karga nan mester laba su pananan i bana den awa i keda impuru te ora nochi sera.

¹¹'Tambe un hende ku esun ku tin e derama mishi kune, sin ku el a spula su mannan den awa, mester laba su pananan i bana den awa i keda impuru te ora nochi sera.

¹²'I e wea di klei ku e persona ku tin e derama mishi kune mester wordu kibra, i tur wea di palu mester wordu spula ku awa.

¹³'Awor ora ku e homber ku tin e derama bira limpi di su derama, e mester konta pa su mes shete dia pa su purifikashon; e mester laba su pananan i bana su kurpa den awa ku ta kore i e lo bira limpi.

¹⁴E ora ei riba e di ocho dia e mester kohe pa su mes dos tortelduif of dos pichon, i bin dilanti di SENOR na entrada di e tent di reunion i duna e saserdote nan.

¹⁵I e saserdote mester ofrese nan, esun komo un ofrenda pa pika i e otro komo un ofrenda kima. Asina e saserdote mester hasi ekspiashon p'e dilanti di SENOR pa motibu di su derama.

¹⁶'Awor si un homber tin un emishon di simia, e mester bana henter su kurpa den awa i keda impuru te ora nochi sera.

¹⁷Tur pana i tur kueru ku tin un emishon di simia riba dje mester wordu laba ku awa i keda impuru te ora nochi sera.

¹⁸Si un homber drumi ku un muhe, asina ku tin un emishon di simia, nan tur dos mester bana den awa i keda impuru te ora nochi sera.

¹⁹'Ora ku un muhe tin un derama, i e derama di su kurpa ta sanger, e mester kontinua den su impuresa di menstruashon pa shete dia; i ken ku mishi kune lo keda impuru te ora nochi sera.

²⁰'Tambe tur kos ku e muhe drumi ariba durante di su impuresa di menstruashon lo keda impuru, i tur kos ku e sinta ariba lo keda impuru.

²¹I ken ku mishi ku su kama mester laba su pananan i bana den awa i keda impuru te ora nochi sera.

²²Ken ku mishi ku algu ku e muhe a sinta ariba mester laba su pananan i bana den awa i keda impuru te ora nochi sera.

²³Sea ku esaki ta riba kama of riba e kos ku e muhe a sinta ariba, ora ku e homber mishi kune, e lo keda impuru te ora nochi sera.

²⁴'I si un homber drumi kune, asina ku su impuresa di menstruashon ta riba dje, e homber mester keda impuru pa shete dia, i tur kama ku e homber drumi ariba lo keda impuru.

²⁵'Awor si un muhe tin un derama di sanger pa hopi dia, fuera di e periodo di su impuresa di menstruashon, of si e tin un derama ku ta pasa e periodo ei, tur e dianan di su derama impuru e mester kontinua manera den e dianan di su impuresa di menstruashon; e ta impuru.

²⁶Tur kama ku e drumi ariba durante di tur e dianan di su derama mester ta p'e manera e kama di su impuresa di menstruashon; i tur kos ku e sinta ariba lo keda impuru, manera e impuresa di su impuresa di menstruashon.

²⁷Tambe ken ku mishi ku nan lo keda impuru i mester laba su pananan i bana den awa, i keda impuru te ora nochi sera.

²⁸'Ora ku e muhe bira limpi di su derama, e mester konta shete dia mas, i despues e lo keda limpi.

²⁹E ora ei riba e di ocho dia e mester kohe dos tortelduif of dos pichon i hiba nan pa e saserdote, na entrada di e tent di reunion.

³⁰I e saserdote mester ofrese esun komo un ofrenda pa pika i e otro komo un ofrenda kima. Asina e saserdote mester hasi ekspiashon pa e muhe dilanti di SENOR pa motibu di e derama di su impuresa.'

³¹"Asina boso mester tene e yunan di Israel separa for di nan impuresa, pa nan no muri den nan impuresa ora nan kontamina Mi tabernakel, ku ta keda meimei di nan."

³²Esaki ta e lei pa esun ku tin un derama, i pa e homber ku tin un emishon di simia, asina ku e ta impuru pa motibu di dje,

³³i pa e muhe ku ta malu pa motibu di impuresa di menstruashon, i pa esun ku tin un derama, sea homber of muhe, i pa e homber ku ta drumi ku un muhe impuru.