Read Papantla Totonac Levitiko 16 Bible Online

Levitiko 16 - Papantla Totonac bible

Levitiko 16

¹Awor SENOR a papia ku Moises despues di morto di e dos yu hombernan di Aaron, ora nan a aserka e presensia di SENOR i a muri.

²I SENOR a bisa Moises: "Bisa bo ruman Aaron pa e no drenta tur ora den e luga santu tras di e velo, dilanti di e propisiatorio ku tin riba e arka, pa e no muri; pasobra lo Mi parese den e nubia riba e propisiatorio.

³"Aaron mester bai den e luga santu ku esaki: ku un bishe machu komo un ofrenda pa pika i un karne chubatu komo un ofrenda kima.

⁴E mester bisti e tunika santu di lino, i e pananan djabou di lino mester ta na su kurpa, i e mester faha su mes ku e faha di lino i bisti e tulban di lino. Esakinan ta pananan santu. Asina e mester bana su kurpa den awa i bisti nan.

⁵I e mester kohe for di e kongregashon di e yunan di Israel dos kabritu chubatu komo un ofrenda pa pika i un karne chubatu komo un ofrenda kima.

⁶"E ora ei Aaron mester ofrese e bishe machu komo un ofrenda pa pika, lokual ta pa su mes, pa e hasi ekspiashon pa su mes i pa e hendenan di su kas.

⁷I e mester kohe e dos kabritunan i presenta nan dilanti di SENOR na entrada di e tent di reunion.

⁸I Aaron mester tira lot pa e dos kabritunan, esun lot pa SENOR i e otro lot pa e kabritu di skapatorio.

⁹E ora ei Aaron mester ofrese e kabritu riba kual e lot pa SENOR a kai, i hasie un ofrenda pa pika.

¹⁰Ma e kabritu riba kual e lot pa e kabritu di skapatorio a kai, mester wordu presenta bibu dilanti di SENOR, pa hasi ekspiashon riba dje, pa mand'e den desierto komo e kabritu di skapatorio.

¹¹"E ora ei Aaron mester ofrese e bishe machu di e ofrenda pa pika ku ta pa su mes, i hasi ekspiashon pa su mes i pa e hendenan di su kas, i e mester mata e bishe machu di e ofrenda pa pika ku ta pa su mes.

¹²I e mester kohe un wea-pa-kandela yen di karbon di kandela for di riba e altar dilanti di SENOR, i dos man yen di sensia aromatiko mula fini-fini, i hiba esaki tras di e velo.

¹³I e mester pone e sensia riba e kandela dilanti di SENOR, pa e nubia di sensia tapa e propisiatorio ku ta riba e arka di testimonio, pa e no muri.

¹⁴Ademas, e mester kohe poko di e sanger di e bishe machu i sprengu esaki ku su dede riba e propisiatorio, banda pariba; tambe dilanti di e propisiatorio e mester sprengu poko di e sanger ku su dede shete biaha.

¹⁵"E ora ei e mester mata e kabritu di e ofrenda pa pika ku ta pa e pueblo, i hiba su sanger tras di e velo, i hasi ku e sanger ei manera el a hasi ku e sanger di e bishe machu, i sprengu esaki riba e propisiatorio i dilanti di e propisiatorio.

¹⁶I e mester hasi ekspiashon pa e luga santu, pa motibu di e impuresanan di e yunan di Israel i pa motibu di nan transgreshonnan, pa tur nan pikanan; i asina e mester hasi pa e tent di reunion ku ta keda serka nan meimei di nan impuresanan.

¹⁷Ora ku e bai paden pa hasi ekspiashon den e luga santu, no mester tin ningun hende den e tent di reunion te ora ku e sali, pa e hasi ekspiashon pa su mes i pa e hendenan di su kas i pa henter e kongregashon di Israel.

¹⁸"E ora ei e mester sali bai na e altar ku tin dilanti di SENOR i hasi ekspiashon pa e altar i kohe poko di e sanger di e bishe machu i di e sanger di e kabritu, i pone esaki riba e kachunan di e altar na tur banda.

¹⁹I ku su dede e mester sprengu poko di e sanger shete biaha riba dje, i purifik'e, i konsagr'e di e impuresanan di e yunan di Israel.

²⁰"Ora ku e kaba di hasi ekspiashon pa e luga santu, e tent di reunion i e altar, e mester ofrese e kabritu bibu.

²¹E ora ei Aaron mester pone tur dos su mannan riba kabes di e kabritu bibu i konfesa riba dje tur e inikidatnan di e yunan di Israel i tur nan transgreshonnan enkuanto tur nan pikanan; i e mester pone nan riba kabes di e kabritu i mand'e bai den desierto na man di un homber ku ta para kla pa hasi esei.

²²I e kabritu mester karga tur nan inikidatnan riba dje hiba na un tera solitario; i e homber mester laga e kabritu bai den desierto.

²³"E ora ei Aaron mester bin den e tent di reunion, i kita e pananan di lino ku el a bisti ora ku el a bai den e luga santu, i mester laga nan ayanan.

²⁴I e mester bana su kurpa ku awa na un luga santu, bisti su pana i sali pafo i ofrese su ofrenda kima i e ofrenda kima di e pueblo, i hasi ekspiashon pa su mes i pa e pueblo.

²⁵E ora ei e mester kima e vet di e ofrenda pa pika riba e altar.

²⁶"I esun ku a laga e kabritu bai komo kabritu di skapatorio mester laba su pananan i bana su kurpa ku awa; anto despues e mag drenta den e kampamentu.

²⁷Ma e bishe machu di e ofrenda pa pika i e kabritu di e ofrenda pa pika, di kualnan e sanger a wordu hiba paden pa hasi ekspiashon den e luga santu, mester wordu hiba pafo di e kampamentu, i nan mester kima nan kueru, nan karni i nan mest den kandela.

²⁸E ora ei esun ku kima nan mester laba su pananan i bana su kurpa ku awa, anto despues e mag drenta den e kampamentu.

²⁹"I esaki mester ta un statuto permanente pa boso: den e di shete luna, riba e di dies dia di e luna, boso mester umiya boso alma i no hasi ningun trabou, ni e yu di tera ni e stranhero ku ta keda biba pa un tempu meimei di boso;

³⁰pasobra ta riba e dia aki ekspiashon mester wordu hasi pa boso pa hasi boso limpi; boso lo ta limpi di tur boso pikanan dilanti di SENOR.

³¹E ta un sabat di deskanso solem pa boso, pa boso umiya boso alma; ta un statuto permanente.

³²Asina e saserdote, kende ta ungi i konsagra pa sirbi komo saserdote na luga di su tata, mester hasi ekspiashon: e mester bisti e pananan di lino, e pananan santu,

³³i hasi ekspiashon pa e santuario santu; i e mester hasi ekspiashon pa e tent di reunion i pa e altar. Tambe e mester hasi ekspiashon pa e saserdotenan i pa henter e pueblo di e kongregashon.

³⁴"Esaki mester ta un statuto eterno pa boso, pa hasi ekspiashon pa e yunan di Israel pa tur nan pikanan, un biaha pa ana." I meskos ku SENOR a ordena Moises, asina el a hasi.