Read Papantla Totonac Levitiko 17 Bible Online

Levitiko 17 - Papantla Totonac bible

Levitiko 17

¹E ora ei SENOR a papia ku Moises, bisando:

²"Papia ku Aaron i ku su yu hombernan, i ku tur e yunan di Israel, i bisa nan: 'Esaki ta loke SENOR a ordena, bisando:

³Kualke homber di kas di Israel ku mata un buey, un lamchi, of un kabritu den e kampamentu, of ku mat'e pafo di e kampamentu,

⁴i no hiba esaki na entrada di e tent di reunion pa present'd komo un ofrenda na SENOR dilanti di e tabernakel di SENOR, mester kulpa e homber ei di dramamentu di sanger. El a drama sanger, i e homber ei mester wordu korta kita for di meimei di su pueblo,

⁵pa e yunan di Israel hiba nan sakrifisionan ku nan tabata ofrese den kunuku habri, pa nan hiba nan pa SENOR, na entrada di e tent di reunion serka e saserdote, i ofrese nan komo sakrifisionan di e ofrendanan di pas na SENOR.

⁶I e saserdote mester sprengu e sanger riba e altar di SENOR na entrada di e tent di reunion, i kima e vet komo un holo dushi na SENOR.

⁷I nan no mester ofrese nan sakrifisionan mas na e demononan, ku kual nan ta prostitui nan mes. Esaki mester ta un statuto permanente pa nan durante di tur nan generashonnan.'"

⁸"E ora ei bo mester bisa nan: 'Kualke homber di kas di Israel, of di e stranheronan ku ta keda biba pa un tempu meimei di nan, ku ta ofrese un ofrenda kima of sakrifisio,

⁹i no ta hiba esaki na entrada di e tent di reunion pa ofres'e na SENOR, e homber ei tambe mester wordu korta kita for di su pueblo.

¹⁰'I kualke homber di kas di Israel, of di e stranheronan ku ta keda biba pa un tempu meimei di nan, ku kome maske ta djis un tiki sanger, lo Mi pone Mi kara kontra e persona ei ku kome sanger, i lo Mi kort'e kit'e for di meimei di su pueblo.

¹¹Pasobra bida di e karni ta den e sanger, i Mi a duna boso esaki riba altar pa hasi ekspiashon pa boso alma; pasobra ta e sanger ta hasi ekspiashon pa e alma.'

¹²Pesei Mi a bisa e yunan di Israel: 'Ningun persona meimei di boso no mag kome sanger, ni ningun stranhero ku ta keda biba pa un tempu meimei di boso no mag kome sanger.'

¹³"Pesei si un homber di e yunan di Israel, of di e stranheronan ku ta keda biba pa un tempu meimei di nan, den yagmentu kohe un bestia of un parha ku boso mag kome, e mester basha su sanger afo i tapa e sanger ku tera.

¹⁴Pasobra pa loke ta bida di tur karni, su sanger ta identifika ku su bida. Pesei Mi a bisa e yunan di Israel: 'Boso no mag kome sanger di ningun sorto di karni, pasobra bida di tur karni ta su sanger; ken ku kome esaki mester wordu korta kita afo.'

¹⁵"I si un persona kome un bestia ku a muri of ku bestia a habraka, sea ku e persona ta un yu di tera of un stranhero, e mester laba su pananan, bana den awa i keda impuru te ora nochi sera; e ora ei e lo bira limpi.

¹⁶Ma si e no laba nan ni bana su kurpa, e ora ei e mester karga su kulpa."