Read Papantla Totonac Levitiko 19 Bible Online

Levitiko 19 - Papantla Totonac bible

Levitiko 19

¹E ora ei SENOR a papia ku Moises, bisando:

²"Papia ku henter e kongregashon di e yunan di Israel i bisa nan: 'Boso sea santu, pasobra Ami SENOR boso Dios ta santu.

³'Kada un di boso mester tin temor di su mama i su tata, i boso mester warda Mi sabatnan; Ami ta SENOR boso Dios.

⁴'No bira bai tras di idolo, ni traha dios basha pa boso mes; Ami ta SENOR boso Dios.

⁵'Awor ora boso ta ofrese un sakrifisio di e ofrendanan di pas na SENOR, boso mester ofrese esaki di tal manera ku boso lo ta asepta.

⁶Boso mester kom'e riba e mesun dia ku boso ofres'e, i su siguiente dia tambe; ma loke keda te di tres dia mester wordu kima ku kandela.

⁷Si kom'e tog riba e di tres dia, ta un ofensa; e lo no wordu asepta.

⁸I ken ku kom'e mester karga su inikidat, pasobra el a profana e kos santu di SENOR; i e persona ei mester wordu korta kita for di su pueblo.

⁹'Awor ora bo kosecha e kosecha di bo tera, no kosecha te den e skinanan di bo kunuku, ni rekohe loke a resta di bo kosecha.

¹⁰Tampoko no piki loke a resta di bo kunuku di wendruif, ni rekohe e fruta ku a kai den bo kunuku di wendruif; laga nan pa esun den nesesidat i pa e stranhero. Ami ta SENOR boso Dios.

¹¹'No horta, ni trata ku engano, ni gana otro.

¹²'No hura falsu den Mi nomber, i asina profana e nomber di bo Dios; Ami ta SENOR.

¹³'No oprimi bo prohimo, ni hort'e. 'Pago di un homber kontrata no mag keda serka bo henter anochi te mainta.

¹⁴'No maldishona un homber sordo, ni pone un piedra di trompeka dilanti di un siegu, ma teme bo Dios; Ami ta SENOR.

¹⁵'No hasi inhustisia den huzgamentu; no faborese e pober, ni onra esun poderoso, ma huzga bo prohimo ku hustisia.

¹⁶'No kana kalumnia meimei di bo pueblo, i no aktua kontra bida di bo prohimo; Ami ta SENOR.

¹⁷'No odia bo ruman den bo kurason; reprende bo prohimo, ma no kai den pika pa su motibu.

¹⁸'No tuma vengansa, ni tene renkor kontra e yunan di bo pueblo, ma stima bo prohimo manera bo mes; Ami ta SENOR.

¹⁹'Warda Mi statutonan. 'No laga dos diferente sorto di bo bestianan rasa ku otro; no sembra bo kunuku ku dos diferente sorto di simia, ni bisti un pana na bo kurpa di dos diferente sorto di tela kombina.

²⁰'Awor si un homber tene relashon seksual ku un muhe ku ta un esklabu, ku ta pertenese na un otro homber, ma ku di ningun manera a wordu redimi, ni a hana su libertat, mester tin kastigu pa esaki; sinembargo, nan no mester wordu mata, pasobra e muhe no tabata liber.

²¹I e homber mester hiba su ofrenda pa kulpa pa SENOR na entrada di e tent di reunion, un karne chubatu komo un ofrenda pa kulpa.

²²E saserdote tambe mester hasi ekspiashon pa e homber ku e karne chubatu di e ofrenda pa kulpa dilanti di SENOR pa su pika ku el a komete, i e lo wordu pordona pa e pika ku el a komete.

²³'I ora boso yega na e tera i planta tur sorto di palu pa kuminda, e ora ei boso mester konsidera nan fruta komo prohibi. Tres ana e fruta lo ta prohibi pa boso; boso no mester kome esaki.

²⁴Ma den e di kuater ana tur su fruta lo ta santu, un ofrenda di alabansa na SENOR.

²⁵I den e di sinku ana boso mag kome di su fruta, pa su kosecha oumenta pa boso; Ami ta SENOR boso Dios.

²⁶'No kome nada ku sanger, ni praktika adivinashon, ni mira destino.

²⁷'No feita e kabei ku ta krese na banda di boso kabes, ni dana e rantnan di boso barba.

²⁸'No hasi ningun korta na boso kurpa pa un morto, ni tatua ningun marka na boso kurpa. Ami ta SENOR.

²⁹'No profana bo yu muhe dor di hasie un prostituta, pa e tera no kai den prostitushon, i e tera yena ku maldat.

³⁰'Warda Mi sabatnan i tene reverensia pa Mi santuario; Ami ta SENOR.

³¹'No sigui tras di montado ni spiritista; no konsulta ku nan pa wordu kontamina dor di nan. Ami ta SENOR boso Dios.

³²'Lanta para pa esun ku tin kabei blanku, onra e ansiano i teme bo Dios; Ami ta SENOR.

³³'Ora ku un stranhero ta biba serka boso den boso tera, no trat'e malu.

³⁴E stranhero ku ta biba serka boso mester ta pa boso manera un yu di tera meimei di boso; stim'e manera bo mes, pasobra boso tabata stranhero na tera di Egipto: Ami ta SENOR boso Dios.

³⁵'No hasi inhustisia den huzgamentu, ni den midimentu di peso, ni den kantidat.

³⁶Boso mester tin balansanan hustu, pesonan hustu, un efa hustu i un hin hustu: Ami ta SENOR boso Dios, Kende a saka boso for di tera di Egipto.

³⁷'Asina boso mester warda tur Mi statutonan i tur Mi ordenansanan, i hasi nan: Ami ta SENOR.'"