Read Papantla Totonac Levitiko 2 Bible Online

Levitiko 2 - Papantla Totonac bible

Levitiko 2

¹'Awor ora ku un hende presenta un ofrenda di mainshi komo un ofrenda na SENOR, su ofrenda mester ta di harina fini, i e mester basha zeta riba dje i pone sensia riba dje.

²E ora ei e mester hib'e pa Aaron su yu hombernan, e saserdotenan, i kohe for di e ofrenda un man yen di harina fini i di zeta, huntu ku tur e sensia di e ofrenda. I e saserdote mester kima esaki riba e altar komo su porshon di konmemorashon, un ofrenda di kandela di un holo dushi na SENOR.

³I sobra di e ofrenda di mainshi ta pa Aaron ku su yu hombernan: un kos masha santu mes di e ofrendanan di kandela na SENOR.

⁴'Awor ora bo trese un ofrenda di un ofrenda di mainshi horna den fornu, esaki mester ta pan buskuchi sin zurdeg di harina fini meskla ku zeta, of oblea sin zurdeg hunta ku zeta.

⁵I si bo ofrenda ta un ofrenda di mainshi traha riba kasuela, e mester ta di harina fini sin zurdeg, meskla ku zeta;

⁶bo mester kibr'e na pida-pida, i basha zeta riba dje; ta un ofrenda di mainshi.

⁷I si bo ofrenda ta un ofrenda di mainshi traha den panchi, e mester wordu traha di harina fini ku zeta.

⁸Ora bo hiba e ofrenda di mainshi, ku ta traha di e kosnan aki, pa SENOR, e mester wordu presenta na e saserdote i e mester hib'e na e altar.

⁹E ora ei e saserdote mester kohe for di e ofrenda di mainshi e porshon di konmemorashon, i kima esaki riba e altar komo un ofrenda di kandela di un holo dushi na SENOR.

¹⁰I sobra di e ofrenda di mainshi ta pa Aaron ku su yu hombernan: un kos masha santu mes di e ofrendanan di kandela na SENOR.

¹¹'Ningun ofrenda di mainshi ku boso trese pa SENOR no mester wordu traha ku zurdeg aden, pasobra bo no mag kima nada di zurdeg ni nada di miel komo un ofrenda di kandela na SENOR.

¹²Komo un ofrenda di prome frutanan boso mag hiba nan pa SENOR, ma nan no mester wordu kima riba e altar komo un holo dushi.

¹³I tur bo ofrendanan di mainshi bo mester sasona ku salu, asina ku lo no falta e salu di e aliansa di bo Dios den bo ofrendanan di mainshi; huntu ku tur bo ofrendanan bo mester ofrese salu.

¹⁴'Tambe, si bo hiba pa SENOR un ofrenda di mainshi di prome kosnan ku a hecha, bo mester trese tapushinan fresku di mainshi tosta na kandela, mainshi bati for di tapushinan yen, komo e ofrenda di mainshi di bo prome kosnan ku a hecha.

¹⁵E ora ei bo mester pone zeta riba dje i pone sensia riba dje; ta un ofrenda di mainshi.

¹⁶I e saserdote mester kima e porshon di konmemorashon, parti di e mainshi bati i e zeta, huntu ku tur e sensia, komo un ofrenda di kandela na SENOR.