Read Papantla Totonac Levitiko 20 Bible Online

Levitiko 20 - Papantla Totonac bible

Levitiko 20

¹E ora ei SENOR a papia ku Moises, bisando:

²"Tambe bo mester bisa e yunan di Israel: 'Kualke homber for di e yunan di Israel of for di e stranheronan ku ta keda biba pa un tempu na Israel ku duna un di su yunan na Molok, mester wordu mata sigur; e pueblo di e tera mester piedr'e ku piedra.

³Tambe lo Mi pone Mi kara kontra e homber ei i lo kort'e kit'e for di meimei di su pueblo, pasobra el a duna algun di su yunan na Molok, pa kontamina Mi santuario i pa profana Mi nomber santu.

⁴Sinembargo, si e pueblo di e tera sera su wowo di kualke manera pa e homber ei ora ku e ta duna algun di su yunan na Molok, i no mat'e,

⁵e ora ei Ami mes lo pone Mi kara kontra e homber ei i kontra su famia; i lo Mi korta kita for di meimei di nan pueblo tantu e komo tur esnan ku ta siguie, dor di prostitui nan mes ku Molok.

⁶'Pa loke ta e persona ku bira bai tras di montado i spiritista pa prostitui su mes dor di sigui nan, lo Mi pone Mi kara kontra e persona ei tambe i kort'e kit'e for di meimei di su pueblo.

⁷'Pesei boso mester konsagra boso mes i sea santu, pasobra Ami ta SENOR boso Dios.

⁸I boso mester warda Mi statutonan i praktika nan; Ami ta SENOR, Kende ta santifika boso.

⁹'Si un hende maldishona su tata of su mama, e mester wordu mata sigur; el a maldishona su tata of su mama; su kulpa di sanger ta riba dje.

¹⁰'Si un homber komete adulterio ku esposa di un otro homber, esta, komete adulterio ku esposa di su amigu, tantu e homber komo e muhe ku komete adulterio mester wordu mata sigur.

¹¹'Si un homber drumi ku esposa di su tata, el a deskubri sunu di su tata; tur dos mester wordu mata sigur; nan kulpa di sanger ta riba nan.

¹²'Si un homber drumi ku su nuera, tur dos mester wordu mata sigur; nan a komete insest; nan kulpa di sanger ta riba nan.

¹³'Si un homber drumi ku un homber, manera esnan ku ta drumi ku un muhe, nan tur dos a komete un akto abominabel; nan mester wordu mata sigur. Nan kulpa di sanger ta riba nan.

¹⁴'Si un homber kasa ku un muhe, i tambe ku mama di e muhe, esei ta inmoralidat; tantu e komo nan mester wordu kima ku kandela, pa no tin inmoralidat meimei di boso.

¹⁵'Si un homber tene relashon seksual ku bestia, e mester wordu mata sigur; tambe boso mester mata e bestia.

¹⁶'Si un muhe aserka un bestia pa tene relashon seksual kune, bo mester mata tantu e muhe komo e bestia; nan mester wordu mata sigur. Nan kulpa di sanger ta riba nan.

¹⁷'Si un homber tuma su ruman muhe, yu muhe di su tata of yu muhe di su mama, asina ku e ta mira su sunu i e muhe ta mira sunu di e homber, ta un berguensa; i nan mester wordu korta kita for di bista di e yu hombernan di nan pueblo. El a deskubri sunu di su ruman muhe; e ta karga su kulpa.

¹⁸'Si un homber drumi ku un muhe durante di su menstruashon i deskubri su sunu, el a deskubri su fluho, i e muhe a ekspone e fluho di su sanger; asina nan tur dos mester wordu korta kita for di meimei di nan pueblo.

¹⁹'Tampoko bo no mester deskubri sunu di ruman muhe di bo mama, ni di ruman muhe di bo tata, pasobra un hende asina a deskubri sunu di su famia yega; nan mester karga nan kulpa.

²⁰'Si un homber drumi ku esposa di su tio, el a deskubri sunu di su tio; nan mester karga nan pika. Nan lo muri sin hana yu.

²¹'Si un homber tuma esposa di su ruman homber, esei ta un akto abominabel; el a deskubri sunu di su ruman homber. Nan lo keda sin hana yu.

²²'Pesei boso mester warda tur Mi statutonan i tur Mi ordenansanan i hasi nan, pa e tera kaminda Mi ta hiba boso pa biba no skupi boso afo.

²³Ademas, boso no mester sigui e kustumbernan di e nashon ku Mi ta bai kore kune sak'e for di boso dilanti; pasobra nan a hasi tur e kosnan aki, i ta pesei Mi a aborese nan.

²⁴Ma Mi a bisa boso: "Boso mester podera di nan tera, i Ami mes lo duna boso esaki pa boso podera di dje, un tera ku tin lechi i miel na abundansia." Ami ta SENOR boso Dios, Kende a separa boso for di e pueblonan.

²⁵'Pesei boso mester hasi distinshon entre e bestia limpi i esun impuru, i entre e parha impuru i esun limpi; i no kontamina boso mes ku bestia of ku parha of ku kualke kos ku ta lastra riba suela, kualnan Mi a separa for di boso komo impuru.

²⁶Asina boso mester ta santu pa Mi, pasobra Ami, SENOR, ta santu; i Mi a aparta boso for di e pueblonan pa boso ta di Mi.

²⁷'Awor un homber of un muhe ku ta montado of spiritista mester wordu mata sigur. Nan mester wordu piedra ku piedra; nan kulpa di sanger ta riba nan.'"