Read Papantla Totonac Levitiko 21 Bible Online

Levitiko 21 - Papantla Totonac bible

Levitiko 21

¹E ora ei SENOR a bisa Moises: "Papia ku e saserdotenan, yu hombernan di Aaron, i bisa nan: 'Ni un hende no mester kontamina su mes pa un morto meimei di su pueblo,

²ku eksepshon di su famianan di mas yega: su mama, su tata, su yu homber, su yu muhe i su ruman homber;

³tambe su ruman muhe birgen ku ta su famia yega, pasobra e no tabatin esposo; pa esaki e mag kontamina su mes.

⁴Komo famia dor di matrimonio e no mester kontamina su mes meimei di su pueblo, i asina profana su mes.

⁵'Nan no mester traha ningun pleki pelon riba nan kabes, ni feita e rantnan di nan barba, ni hasi ningun korta na nan kurpa.

⁶Nan mester ta santu pa nan Dios i no profana e nomber di nan Dios, pasobra ta nan ta presenta e ofrendanan di kandela na SENOR, e pan di nan Dios; pesei nan mester ta santu.

⁷'Nan no mester tuma un muhe ku ta keda profana dor di prostitushon, ni tuma un muhe ku ta diborsia di su esposo; pasobra e saserdote ta santu pa su Dios.

⁸Pesei bo mester konsagr'e, pasobra t'e ta ofrese e pan di bo Dios; e mester ta santu pa bo; pasobra Ami SENOR, Kende ta santifika boso, ta santu.

⁹'Tambe yu muhe di un saserdote, si e profana su mes dor di prostitushon, e ta profana su tata; e mester wordu kima ku kandela.

¹⁰'I e saserdote ku ta esun di mas haltu entre su rumannan, riba kende su kabes e zeta di unshon a wordu basha i ku a wordu konsagra pa bisti e pananan, no mester kita kabes sunu, ni sker su pananan;

¹¹ni e no mester aserka ningun morto, ni kontamina su mes pa su tata of pa su mama;

¹²ni e no mester sali for di e santuario, ni profana e santuario di su Dios; pasobra e konsagrashon di e zeta di unshon di su Dios ta riba dje: Ami ta SENOR.

¹³'I e mester tuma un muhe birgen komo esposa.

¹⁴Un biuda of un muhe diborsia of un muhe ku ta keda profana dor di prostitushon, esakinan e no mag tuma; ma mas bien e mester kasa ku un birgen di su mes pueblo,

¹⁵pa e no profana su desendensia entre su pueblo, pasobra Ami ta SENOR, Kende ta santifik'e.'"

¹⁶E ora ei SENOR a papia ku Moises, bisando:

¹⁷"Papia ku Aaron, bisando: 'Ningun homber di bo desendensia durante di tur nan generashonnan, ku tin un defekto, no mag yega serka pa ofrese e pan di su Dios.

¹⁸Pasobra ningun homber ku tin un defekto no mag yega serka: un homber siegu, of un homber lam, of un homber ku tin kara desfigura of kualke miembro di kurpa mal forma,

¹⁹of un homber ku tin un pia kibra of man kibra,

²⁰of un homber ku tin lomba di bahul, of un enano, of un homber ku tin un defekto na su wowo of eksema of sarna of testikulo plecha.

²¹Ningun homber den e desendensia di saserdote Aaron ku tin un defekto no mag yega serka pa ofrese e ofrendanan di kandela di SENOR; siendo ku e tin un defekto, e no mag yega serka pa ofrese e pan di su Dios.

²²E mag kome e pan di su Dios, tantu esun di mas santu komo esun santu;

²³solamente e no mester bai tras di e velo ni yega serka di e altar, pasobra e tin un defekto, pa e no profana Mi santuarionan. Pasobra Ami ta SENOR, Kende ta santifika nan.'"

²⁴Asina Moises a papia ku Aaron i ku su yu hombernan i ku tur e yunan di Israel.