Read Papantla Totonac Levitiko 22 Bible Online

Levitiko 22 - Papantla Totonac bible

Levitiko 22

¹E ora ei SENOR a papia ku Moises, bisando:

²"Bisa Aaron ku su yu hombernan pa tene kuidou ku e ofrendanan santu di e yunan di Israel ku nan ta dedika na Mi, pa no profana Mi nomber santu; Ami ta SENOR.

³"Bisa nan: 'Si un homber den henter boso desendensia, durante di tur boso generashonnan, aserka e ofrendanan santu ku e yunan di Israel ta dedika na SENOR, mientras ku e tin un impuresa, e persona ei mester wordu korta kita for di Mi dilanti. Ami ta SENOR.

⁴'Ningun homber di e desendensia di Aaron ku ta un leproso of ku tin un derama no mag kome di e ofrendanan santu, te ora ku e ta limpi. I si un hende mishi ku kualke kos ku a wordu hasi impuru dor di un kadaver, of si un homber tin un emishon di simia,

⁵of si un homber mishi ku kualke di e kosnan ku ta kriul den otro, ku a hasie impuru, of kualke hende ku a hasie impuru, kiko ku su impuresa por ta,

⁶e persona ku mishi ku tal kos lo ta impuru te ora nochi sera, i no mag kome di e ofrendanan santu te ora ku el a bana su kurpa den awa.

⁷Ma ora solo baha e lo ta limpi, i despues e mag kome di e ofrendanan santu, pasobra ta su kuminda esei ta.

⁸E no mag kome ningun bestia ku muri, of ku bestia a habraka, i bira impuru dor di dje; Ami ta SENOR.

⁹'Pesei nan mester kumpli ku Mi enkargo, pa nan no karga pika pa motibu di dje i muri pa esei, pasobra nan ta profan'e; Ami ta SENOR, Kende ta santifika nan.

¹⁰'Ningun stranhero no mag kome e ofrenda santu; un persona ku ta keda biba pa un tempu serka e saserdote of un homber kontrata no mag kome di e ofrenda santu.

¹¹Ma si un saserdote kumpra ku su plaka un esklabu komo su propiedat, e esklabu ei mag kome di dje, i esnan ku nase den su kas mag kome di su kuminda.

¹²I si yu muhe di un saserdote ta kasa ku un stranhero, e no mag kome di e ofrenda di zoyamentu.

¹³Ma si yu muhe di un saserdote bira biuda of ta diborsia, i no tin yu i ta bolbe kas di su tata manera den su hubentut, e mag kome di e kuminda di su tata; ma ningun stranhero no mag kome di dje.

¹⁴'Ma si un homber kome un ofrenda santu no intenshonalmente, e ora ei e mester anadi na dje un di sinku parti di dje i duna e saserdote e ofrenda santu.

¹⁵I nan no mester profana e ofrendanan santu di e yunan di Israel ku nan ta ofrese na SENOR,

¹⁶i asina hasi nan karga kastigu pa kulpa dor di kome nan ofrendanan santu; pasobra Ami ta SENOR, Kende ta santifika nan.'"

¹⁷E ora ei SENOR a papia ku Moises, bisando:

¹⁸"Papia ku Aaron i ku su yu hombernan i ku tur e yunan di Israel i bisa nan: 'Ora ku un homber di kas di Israel of di e stranheronan den Israel presenta su ofrenda, sea ku ta kualke di nan ofrendanan di promesa of kualke di nan ofrendanan boluntario ku nan ta presenta na SENOR komo un ofrenda kima--

¹⁹esaki mester ta un bestia machu sin defekto for di e bakanan, e karnenan of e kabritunan, pa boso wordu asepta.

²⁰Nada ku tin un defekto boso no mag ofrese, pasobra e lo no wordu asepta pa boso.

²¹I ora ku un homber ofrese un sakrifisio di ofrendanan di pas na SENOR pa kumpli ku un promesa spesial, of komo un ofrenda boluntario di e kria di baka of di e kria di bestia chikitu, esaki mester ta perfekto pa wordu asepta; e no mag tin defekto.

²²Esnan ku ta siegu, fraktura, manka, of ku tin un yaga ku ta basha of eksema of sarna, no ofrese ni un di esakinan na SENOR, ni hasi di nan un ofrenda di kandela riba e altar na SENOR.

²³Enkuanto un buey of un lamchi ku tin parti di kurpa ku ta muchu largu of muchu kortiku, bo mag presenta esaki komo un ofrenda boluntario, ma komo un promesa e lo no wordu asepta.

²⁴Tambe nada ku tin testikulo herida, plecha, kibra of korta, boso no mester ofrese na SENOR, ni sakrifika den boso tera,

²⁵ni asepta algu asina for di man di un stranhero pa ofrese esaki komo kuminda di boso Dios; pasobra nan korupshon ta den nan, nan tin un defekto; nan lo no wordu asepta pa boso.'"

²⁶E ora ei SENOR a papia ku Moises, bisando:

²⁷"Ora ku un buey of un karne of un kabritu nase, e mester keda shete dia serka su mama, i for di e di ocho dia padilanti e lo wordu asepta komo un sakrifisio di un ofrenda di kandela na SENOR.

²⁸Ma, sea ku ta un buey of un karne, boso no mag mata esaki i su yu riba e mesun dia.

²⁹"I ora boso ta ofrese un sakrifisio di gradisimentu na SENOR, boso mester ofrese esaki di tal manera ku boso lo wordu asepta.

³⁰Mester kom'e riba e mesun dia; no laga nada di dje te su manise: Ami ta SENOR.

³¹"Asina boso mester warda Mi mandamentunan i hasi nan: Ami ta SENOR.

³²No profana Mi nomber santu. Mi mester wordu santifika meimei di e yunan di Israel: Ami ta SENOR,Kende ta santifika boso,

³³Kende a saka boso for di tera di Egipto, pa ta boso Dios: Ami ta SENOR."