Read Papantla Totonac Levitiko 23 Bible Online

Levitiko 23 - Papantla Totonac bible

Levitiko 23

¹SENOR a bolbe papia ku Moises, bisando:

²"Papia ku e yunan di Israel i bisa nan: 'E tempunan stipula di SENOR, ku boso mester proklama komo konvokashonnan santu--Mi tempunan stipula ta esakinan:

³'Seis dia boso mag hasi trabou, ma riba e di shete dia tin un sabat di sosiegu kompleto, un konvokashon santu. Boso no mag hasi ningun trabou; ta un sabat na SENOR den tur boso luganan di biba.

⁴'Esakinan ta e tempunan stipula di SENOR, konvokashonnan santu ku boso mester proklama na e tempunan stipula pa nan.

⁵Den e prome luna, riba e di dieskuater dia di e luna, ora ku solo drenta, ta e Pasku di SENOR.

⁶E ora ei riba e di diesinku dia di e mesun luna tin e Fiesta di Pan Sin Zurdeg na SENOR; shete dia boso mester kome pan sin zurdeg.

⁷Riba e prome dia boso mester tene un konvokashon santu; boso no mag hasi ningun trabou pisa.

⁸Ma pa shete dia boso mester presenta un ofrenda di kandela na SENOR. Riba e di shete dia tin un konvokashon santu; boso no mag hasi ningun trabou pisa.'"

⁹E ora ei SENOR a papia ku Moises, bisando:

¹⁰"Papia ku e yunan di Israel i bisa nan: 'Ora boso drenta e tera ku Mi ta bai duna boso i ta kosecha su kosecha, e ora ei boso mester hiba e bohi di e prome frutanan di boso kosecha pa e saserdote.

¹¹I e mester zoya e bohi dilanti di SENOR pa boso wordu asepta; riba e dia despues di sabat e saserdote mester zoy'e.

¹²Awor riba e dia ku boso zoya e bohi, boso mester ofrese un lamchi machu di un ana, sin defekto, komo un ofrenda kima na SENOR.

¹³Anto su ofrenda di mainshi mester ta dos desimo parti di un efa di harina fini meskla ku zeta, un ofrenda di kandela na SENOR komo un holo dushi, huntu ku su ofrenda di bibida, un di kuater parti di un hin di bina.

¹⁴Te na e dia aki, te ora ku boso a kaba di trese e ofrenda pa boso Dios, boso no mester kome ni pan, ni mainshi tosta, ni mainshi fresku. Esaki mester ta un statuto perpetuo durante di tur boso generashonnan den tur boso luganan di biba.

¹⁵'Tambe boso mester konta pa boso mes for di e dia despues di sabat, for di e dia ku boso a trese e bohi di e ofrenda di zoyamentu: shete dia kompleto di sabat.

¹⁶Konta sinkuenta dia te na e dia despues di e di shete sabat, i e ora ei presenta un ofrenda di mainshi fresku na SENOR.

¹⁷Trese for di boso luganan di biba dos pan traha di dos desimo parti di un efa komo un ofrenda di zoyamentu; nan mester ta di harina fini, horna ku zurdeg komo prome frutanan pa SENOR.

¹⁸I presenta huntu ku e pan shete lamchi machu di un ana, sin defekto, i un bishe machu for di e kria di baka i dos karne chubatu; nan mester ta un ofrenda kima na SENOR, huntu ku nan ofrenda di mainshi i nan ofrendanan di bibida, un ofrenda di kandela di holo dushi na SENOR.

¹⁹Ofrese tambe un kabritu chubatu komo un ofrenda pa pika i dos lamchi machu di un ana komo un sakrifisio di e ofrendanan di pas.

²⁰E ora ei e saserdote mester zoya nan huntu ku e pan di e prome frutanan komo un ofrenda di zoyamentu, huntu ku dos lamchi, dilanti di SENOR; nan mester ta santu na SENOR pa e saserdote.

²¹Riba e mesun dia aki boso mester hasi un proklamashon tambe; boso mester tene un konvokashon santu. Boso no mag hasi trabou pisa. Esaki mester ta un statuto perpetuo den tur boso luganan di biba durante di tur boso generashonnan.

²²'Ademas, ora boso ta kosecha e kosecha di boso tera, no kosecha te den skinanan di boso kunuku, ni rekohe loke resta di boso kosecha; boso mester laga nan pa esun den nesesidat i pa e stranhero. Ami ta SENOR boso Dios.'"

²³Atrobe SENOR a papia ku Moises, bisando:

²⁴"Papia ku e yunan di Israel, bisando: 'Den e di shete luna, riba e prome dia di e luna, boso mester tene un sosiegu, un konmemorashon ku tokamentu di trompet, un konvokashon santu.

²⁵Boso no mag hasi ningun trabou pisa, ma presenta un ofrenda di kandela na SENOR.'"

²⁶I SENOR a papia ku Moises, bisando:

²⁷"Riba eksaktamente e di dies dia di e di shete luna aki ta e dia di ekspiashon; esaki mester ta un konvokashon santu pa boso, i boso mester umiya boso alma i presenta un ofrenda di kandela na SENOR.

²⁸Tampoko boso no mag hasi ningun trabou riba e dia aki, pasobra ta un dia di ekspiashon, pa hasi ekspiashon pa boso dilanti di SENOR boso Dios.

²⁹Si tin kualke persona ku no kier umiya su mes riba e dia aki, e mester wordu korta kita for di su pueblo.

³⁰I ken ku hasi kualke trabou riba e dia aki, e persona ei lo Mi destrui for di meimei di su pueblo.

³¹Boso no mag hasi ningun trabou. Esaki mester ta un statuto perpetuo durante di tur boso generashonnan den tur boso luganan di biba.

³²E mester ta pa boso un sabat di sosiegu kompleto, i boso mester umiya boso alma; riba e di nuebe dia di e luna, atardi, for di atardi te atardi boso mester warda boso sabat."

³³Atrobe SENOR a papia ku Moises, bisando:

³⁴"Papia ku e yunan di Israel, bisando: 'E di diesinku dia di e di shete luna aki ta e Fiesta di Tabernakelnan, shete dia largu na SENOR.

³⁵Riba e prome dia tin un konvokashon santu; boso no mag hasi ningun sorto di trabou pisa.

³⁶Pa shete dia boso mester presenta un ofrenda di kandela na SENOR. Riba e di ocho dia boso mester tene un konvokashon santu i presenta un ofrenda di kandela na SENOR; ta un asamblea. Boso no mag hasi trabou pisa.

³⁷'Esakinan ta e tempunan stipula di SENOR ku boso mester proklama komo konvokashonnan santu, pa presenta ofrendanan di kandela na SENOR--e ofrendanan kima i ofrendanan di mainshi, sakrifisionan i ofrendanan di bibida ku a wordu stipula pa kada dia--

³⁸ademas di e sabatnan di SENOR, i ademas di boso regalonan, i ademas di tur boso ofrendanan di promesa i ofrendanan boluntario ku boso ta duna SENOR.

³⁹'Riba eksaktamente e di diesinku dia di e di shete luna, ora boso a kaba di rekohe e kosechanan di e tera, boso mester selebra e fiesta di SENOR shete dia largu, ku un sosiegu riba e prome dia i un sosiegu riba e di ocho dia.

⁴⁰Awor riba e prome dia boso mester piki pa boso mes blachi di palu bunita, rama di palma, rama di palu yen di blachi i palu ku ta krese kantu di roi, i boso mester regosiha dilanti di SENOR boso Dios shete dia largu.

⁴¹Asina boso mester selebra esaki komo un fiesta na SENOR shete dia den ana. Esaki mester ta un statuto perpetuo durante di tur boso generashonnan; boso mester selebr'e den e di shete luna.

⁴²Boso mester biba den tabernakel shete dia largu. Tur yu di tera na Israel mester biba den tabernakel,

⁴³pa boso generashonnan por sa ku Mi a laga e yunan di Israel biba den tabernakel tempu ku Mi a saka nan for di tera di Egipto. Ami ta SENOR boso Dios.'"

⁴⁴Asina Moises a deklara na e yunan di Israel e tempunan stipula di SENOR.