Read Papantla Totonac Levitiko 24 Bible Online

Levitiko 24 - Papantla Totonac bible

Levitiko 24

¹E ora ei SENOR a papia ku Moises, bisando:

²"Ordena e yunan di Israel pa nan trese pa bo zeta puru di oleifi bati pa e lus, pa laga un lampi sende kontinuamente.

³Pafo di e velo di testimonio den e tent di reunion Aaron mester perkura pa esaki for di atardi te mainta dilanti di SENOR, kontinuamente; esaki mester ta un statuto perpetuo durante di tur boso generashonnan.

⁴E mester perkura pa e lampinan riba e kandela di oro puru dilanti di SENOR, kontinuamente.

⁵"E ora ei bo mester kohe harina fini i horna diesdos pan buskuchi kune; mester tin dos desimo parti di un efa den kada pan buskuchi.

⁶I bo mester pone nan den dos kareda, seis den kada kareda, riba e mesa di oro puru dilanti di SENOR.

⁷I pone sensia puru riba kada kareda, pa e ta un porshon di konmemorashon pa e pan, un ofrenda di kandela na SENOR.

⁸Tur dia di sabat e mester perkura pa esaki dilanti di SENOR, kontinuamente; ta un aliansa eterno pa e yunan di Israel.

⁹I e mester ta pa Aaron ku su yu hombernan, i nan mester kom'e den un luga santu; pasobra pa Aaron esaki ta algu masha santu mes di e ofrendanan di kandela di SENOR, su porshon pa semper."

¹⁰Awor e yu homber di un muhe israelita, kende su tata tabata un egipsio, a sali bai entre e yunan di Israel; i e yu homber di e muhe israelita i un homber di Israel tabata bringa ku otro den e kampamentu.

¹¹I e yu homber di e muhe israelita tabata blasfema e Nomber i tabata maldishona. Pesei nan a hib'e serka Moises. (Awor nomber di su mama tabata Selomit, yu muhe di Dibri, di e tribu di Dan.)

¹²I nan a ser'e den prizon te ora ku e ordu di SENOR a wordu hasi kla na nan.

¹³E ora ei SENOR a papia ku Moises, bisando:

¹⁴"Saka esun ku a maldishona for di e kampamentu, i tur ku a tend'e mester pone nan mannan riba su kabes; anto henter e kongregashon mester piedr'e.

¹⁵I papia ku e yunan di Israel, bisando: 'Ken ku maldishona su Dios mester karga su pika.

¹⁶Ademas, esun ku blasfema e nomber di SENOR mester wordu mata sigur; siguramente henter e kongregashon mester piedr'e. Tantu stranhero komo yu di tera, si e blasfema e Nomber, e mester wordu mata.

¹⁷'I si un homber kita bida di un ser humano, e mester wordu mata sigur.

¹⁸I esun ku kita bida di un bestia mester hasi restitushon: bida pa bida.

¹⁹I si un hende hasi dano na su prohimo, meskos ku el a hasi, asina mester hasi kune tambe:

²⁰fraktura pa fraktura, wowo pa wowo, djente pa djente; meskos ku el a hasi dano na un hende, asina mester hasi kune tambe.

²¹Asina esun ku mata un bestia mester hasi restitushon, ma esun ku mata un hende mester wordu mata.

²²Mester tin un lei pa boso; e mester ta tantu pa stranhero komo pa yu di tera, pasobra Ami ta SENOR boso Dios.'"

²³E ora ei Moises a papia ku e yunan di Israel, i nan a saka esun ku a maldishona for di e kampamentu i a piedr'e ku piedra. Asina e yunan di Israel a hasi meskos ku SENOR a ordena Moises.