Read Papantla Totonac Levitiko 25 Bible Online

Levitiko 25 - Papantla Totonac bible

Levitiko 25

¹Anto SENOR a papia ku Moises na Seru Sinai, bisando:

²"Papia ku e yunan di Israel i bisa nan: 'Ora boso bin den e tera ku Mi lo duna boso, e tera mester warda un sabat pa SENOR.

³Seis ana bo mester sembra bo kunuku, i seis ana bo mester snui bo plantashon di wendruif i rekohe su fruta,

⁴ma durante di e di shete ana e tera mester tene un sabat di sosiegu, un sabat pa SENOR; bo no mag sembra bo kunuku ni snui bo plantashon di wendruif.

⁵No rekohe loke nase di su mes despues di kosecha, ni kosecha bo wendruifnan di mata di wendruif ku bo no a snui; e tera mester hana un ana di sosiegu.

⁶I boso tur mester hana e kosecha di sabat di e tera pa kuminda; abo mes, bo esklabunan homber i muhe, bo hombernan kontrata i e stranhero ku ta keda biba pa un tempu serka bo.

⁷Tambe bo bakanan i e bestianan ku ta den bo tera mag hana tur su kosecha pa kome.

⁸'Bo mester konta tambe shete sabat di ana pa bo mes, shete bes shete ana, asina ku bo tin e periodo di e shete sabatnan di ana, esta, kuarent'i nuebe ana.

⁹E ora ei bo mester laga un kachu di karne chubatu zona tur kaminda riba e di dies dia di e di shete luna; riba e dia di ekspiashon boso mester laga un kachu zona den henter boso tera.

¹⁰Asina boso mester konsagra e di sinkuenta ana i proklama libertat den e tera pa tur su habitantenan. E mester ta un hubileo pa boso, i kada un di boso mester bolbe na su mes propiedat, i kada un di boso mester bolbe serka su famia.

¹¹E di sinkuenta ana mester ta un hubileo pa boso; no sembra, ni kosecha loke nase di su mes despues di kosecha, ni rekohe fruta di su matanan di wendruif ku no ta gesnui.

¹²Pasobra ta un hubileo e ta; e mester ta santu pa boso. Boso mag kome solamente e kosecha di e kunuku.

¹³'Den e ana di hubileo aki kada un di boso mester bolbe na su mes propiedat.

¹⁴'Ademas, si boso bende algu ku boso amigu of kumpra algu for di dje, no probecha di otro.

¹⁵Konforme e kantidat di ana despues di e hubileo bo mester kumpra for di bo amigu; e mester bende ku bo konforme e kantidat di ana di kosecha.

¹⁶Segun e kantidat di ana bo mester oumenta su preis, i segun ku e kantidat di e ananan bira menos, bo mester baha su preis; pasobra ta un kantidat di kosecha e ta bende ku bo.

¹⁷Pesei boso no mester probecha di otro, ma boso mester teme boso Dios, pasobra Ami ta SENOR boso Dios.

¹⁸'Asina boso mester ehekuta Mi statutonan i warda Mi ordenansanan pa kumpli ku nan, pa boso biba trankil den e tera.

¹⁹E ora ei e tera lo duna su fruta, asina ku boso por kome barika yen i biba trankil den dje.

²⁰Ma si boso bisa: "Kiko nos ta bai kome den e di shete ana, si nos no sembra ni rekohe nos kosecha?"

²¹e ora ei lo Mi manda Mi bendishon pa boso den e di seis ana pa e duna kosecha pa tres ana.

²²Mientras ku boso ta sembra durante di e di ocho ana, ainda boso lo kome kosnan bieu di e kosecha; boso lo sigui kome e bieu te na e di nuebe ana ora su kosecha drenta.

²³'Ademas, e tera no mester keda bendi permanentemente, pasobra e tera ta di Mi; pasobra boso ta stranhero i hende ku ta keda biba pa un tempu serka Mi.

²⁴Asina pa kada pida di boso propiedat boso mester provee pa redenshon di e tera.

²⁵'Si un paisano di bo bira asina pober ku e mester bende parti di su propiedat, e ora ei su famia di mas yega mester bin i kumpra bek loke su famia a bende.

²⁶Of si akaso un homber no tin famia, ma ta rekobra su medionan, di tal manera ku e ta hana sufisiente pa redenshon di su propiedat,

²⁷e ora ei e mester kalkula e ananan for di benta di e propiedat i debolbe loke a keda na e homber ku el a bend'e kune, i asina bolbe na su propiedat.

²⁸Ma si e no hana sufisiente medionan pa han'e bek pa su mes, e ora ei loke ku el a bende mester keda den man di e kumprado te na e ana di hubileo; ma na e hubileo e mester wordu debolbi, pa e dono por bolbe na su propiedat.

²⁹'Di e mesun manera, si un homber bende un kas pa biba aden den un stat ku tin muraya ront di dje, e ora ei su derecho di redenshon ta dura pa henter un ana despues di a bend'e; su derecho di redenshon ta keda pa henter un ana.

³⁰Ma si e no wordu kumpra bek p'e denter di termino di henter un ana, e ora ei e kas den e stat ku tin muraya ront di dje ta pasa permanentemente ofer pa esun ku a kumpr'e, durante di tur su generashonnan; e no mag wordu debolbi den e hubileo.

³¹Sinembargo, e kasnan di e pueblitonan ku no tin muraya ront di nan mester wordu konsidera komo kunukunan habri; nan tin derechonan di redenshon, i mester wordu debolbi den e hubileo.

³²'Pa loke ta e statnan di e levitanan, e levitanan tin un derecho permanente di redenshon pa e kasnan di e statnan ku ta nan propiedat.

³³Pesei, loke ta pertenese na e levitanan por wordu redimi, i un kas bendi den e stat di e propiedat aki mester wordu debolbi den e ana di hubileo, pasobra e kasnan den e statnan di e levitanan ta nan propiedat meimei di e yunan di Israel.

³⁴Ma e luganan di yerba berde di nan statnan no mester wordu bendi, pasobra esei ta nan propiedat perpetuo.

³⁵'Awor si akaso un paisano di bo bira pober i no por kumpli ku su obligashonnan pa ku bo, e ora ei bo mester sosten'e manera bo ta sostene un stranhero of un hende ku ta keda biba pa un tempu serka bo, pa e keda biba serka bo.

³⁶No tuma ningun sorto di interes for di dje, ma teme bo Dios, pa bo paisano keda na bida serka bo.

³⁷No dun'e bo plaka ku interes, ni bo kuminda pa ganashi.

³⁸Ami ta SENOR boso Dios, Kende a saka boso for di tera di Egipto pa duna boso tera di Kanaan i pa ta boso Dios.

³⁹'I si un paisano di bo bira asina pober serka bo ku e ta bende su mes ku bo, no pon'e sirbi komo esklabu.

⁴⁰E mester ta serka bo komo un homber kontrata, komo si fuera e tabata un hende ku ta keda biba pa un tempu serka bo; e mester sirbibo te na e ana di hubileo.

⁴¹E ora ei e mester bai for di bo, e ku su yu hombernan huntu kune, i bolbe serka su famia, pa e bolbe na e propiedat di su tatanan.

⁴²Pasobra nan ta Mi sirbidonan ku Mi a saka for di tera di Egipto; nan no mag wordu bendi komo esklabu.

⁴³No goberna riba dje ku severidat, ma teme bo Dios.

⁴⁴'Pa loke ta bo esklabunan homber i muhe ku bo tin--bo mag buska esklabunan homber i muhe for di e nashonnan pagano ku ta keda ront di boso.

⁴⁵Tambe di e yunan di esnan ku ta keda biba pa un tempu komo stranhero meimei di boso, ta for di nan boso mag kumpra nan, i for di nan famianan ku ta serka boso, ku nan lo a engendra den boso tera; nan tambe por bira boso propiedat.

⁴⁶Boso por duna nan komo erensia na boso yu hombernan despues di boso, pa risibi nan komo propiedat; boso por uza nan komo esklabu permanente. Ma enkuanto boso paisanonan, e yunan di Israel, boso no mester goberna riba otro ku severidat.

⁴⁷'Awor si un stranhero of un hende ku ta keda biba pa un tempu serka bo, bira riku, i un paisano di bo bira pober i ta bende su mes ku e stranhero ku ta keda biba pa un tempu serka bo, of ku e desendientenan di famia di un stranhero,

⁴⁸e ora ei e ta keda ku e derecho di redenshon despues ku el a wordu bendi. Un di su ruman hombernan por redimie,

⁴⁹of su tio, of yu homber di su tio por redimie, of un di su famianan yega por redimie; of si e prospera, e mes por redimi su mes.

⁵⁰E ora ei e, huntu ku esun ku a kumpr'e, mester hasi un kalkulashon for di e ana ku el a bende su mes kune te na e ana di hubileo; i e preis di su benta mester ta konforme e kantidat di ana. Manera e dianan di un homber kontrata e mester ta serka dje.

⁵¹Si ainda ta keda hopi ana, e ora ei e mester debolbe parti di e plaka ku nan a kumpr'e kune, konforme e ananan pa su mes redenshon;

⁵²i si keda poko ana te na e ana di hubileo, e ora ei e mester hasi un kalkulashon huntu kune. Konforme su ananan e mester debolbe e preis di su redenshon.

⁵³Mester trat'e manera un homber kontrata di ana pa ana; mira pa su dono no goberna ku severidat riba dje.

⁵⁴'I maske e no wordu redimi durante di e ananan aki, tog e mester sali den e ana di hubileo, e ku su yu hombernan huntu kune.

⁵⁵Pasobra e yunan di Israel ta Mi sirbidonan; nan ta Mi sirbidonan ku Mi a saka for di tera di Egipto. Ami ta SENOR boso Dios.