Read Papantla Totonac Levitiko 26 Bible Online

Levitiko 26 - Papantla Totonac bible

Levitiko 26

¹'No traha idolo pa boso mes, ni lanta un imagen ni un pilar sagrado pa boso mes, i no pone un piedra graba den boso tera pa buig p'e; pasobra Ami ta SENOR boso Dios.

²'Warda Mi sabatnan i duna reverensia na Mi santuario; Ami ta SENOR.

³'Si boso kana den Mi statutonan i warda Mi mandamentunan pa kumpli ku nan,

⁴e ora ei lo Mi duna boso awaseru na su tempu, asina ku e tera lo duna su kosecha i e palunan di kunuku lo karga nan fruta.

⁵Di berdat, boso tempu di bati mainshi lo dura pa boso te na e tempu di rekohe wendruif, i e tempu di rekohe wendruif lo dura te na e tempu di sembra. Asina boso lo kome barika yen i biba trankil den boso tera.

⁶'Tambe lo Mi duna pas den e tera, asina ku boso por kai drumi sin ku ningun hende ta hasi boso tembla. Tambe lo Mi elimina for di e tera tur mal bestia, i ningun spada lo no pasa dor di boso tera.

⁷Ma boso lo kore ku boso enemigunan, i nan lo muri boso dilanti pa medio di spada;

⁸sinku di boso lo kore ku shen, i shen di boso lo kore ku dies mil, i boso enemigunan lo muri boso dilanti pa medio di spada.

⁹'Asina lo Mi bolbe serka boso i hasi boso fruktifero i multiplika boso, i lo Mi konfirma Mi aliansa ku boso.

¹⁰I boso lo kome e provishon bieu i deshasi di e bieu pa motibu di e nobo.

¹¹Ademas, lo Mi pone Mi luga di biba meimei di boso, i Mi alma lo no aborese boso.

¹²Tambe lo Mi kana meimei di boso i lo ta boso Dios, i boso lo ta Mi pueblo.

¹³Ami ta SENOR boso Dios, Kende a saka boso for di tera di Egipto pa boso no ta nan esklabu, i Mi a kibra e baranan di boso yugo i a hasi boso kana regt.

¹⁴'Ma si boso no obedeseMi i no kumpli ku tur e mandamentunan aki,

¹⁵ma na luga di esei boso rechasa Mi statutonan, i si boso alma aborese Mi ordenansanan, asina ku boso no ta kumpli ku tur Mi mandamentunan, i asina ta kibra Mi aliansa,

¹⁶Ami, na Mi turno, lo hasi esaki ku boso: lo Mi manda riba boso un teror repentino, tuberkulosis i keintura ku lo kaba ku boso wowo i kousa pena na kurason; tambe boso lo sembra boso simia en bano, pasobra boso enemigunan lo kom'e.

¹⁷I lo Mi pone Mi kara kontra boso, asina ku boso lo wordu derota dilanti di boso enemigunan; i esnan ku ta odia boso lo goberna riba boso, i boso lo hui sin ku ningun hende ta persigui boso.

¹⁸'Si tambe despues di e kosnan aki boso no obedeseMi, e ora ei lo Mi kastiga boso shete biaha mas tantu pa boso pikanan.

¹⁹I tambe lo Mi kibra e orguyo di boso poder; tambe lo Mi hasi boso shelu manera heru i boso tera manera brons.

²⁰I boso forsa lo wordu gasta en bano, pasobra boso tera lo no duna su kosecha i e palunan di e tera lo no duna nan fruta.

²¹'Si e ora ei boso aktua ku enemistat kontra Mi i no ta dispuesto pa obedeseMi, lo Mi oumenta e plaga shete biaha riba boso segun boso pikanan.

²²I lo Mi los meimei di boso e bestianan di mondi, ku lo horta boso yunan kita for di boso i destrui boso bakanan i redusi boso kantidat di hende, asina ku boso kamindanan lo keda bandona.

²³'I si pa medio di e kosnan aki ainda boso no bolbe serka Mi, ma ta aktua ku enemistat kontra Mi,

²⁴e ora ei lo Mi aktua ku enemistat kontra boso; i Ami, si Ami, lo kastiga boso shete biaha pa boso pikanan.

²⁵Tambe lo Mi trese un spada riba boso pa venga e kibramentu di e aliansa; i ora boso reuni den boso statnan lo Mi manda pest meimei di boso, asina ku boso lo wordu entrega den man di enemigu.

²⁶Ora Mi kita boso provishon di pan, dies muhe lo horna boso pan den un solo fornu, i nan lo debolbe boso pan den kantidatnan ku a wordu midi, asina ku boso lo kome sin keda satisfecho.

²⁷'Si apesar di esaki tog boso no obedeseMi, ma ta aktua ku enemistat kontra Mi,

²⁸e ora ei lo Mi aktua ku enemistat yen di furia kontra boso; i Ami, si Ami, lo kastiga boso shete biaha pa boso pikanan.

²⁹Ademas, boso lo kome e karni di boso yu hombernan, i e karni di boso yu muhenan boso lo kome.

³⁰E ora ei lo Mi destrui boso luganan haltu, i basha boso altarnan di sensia abou, i montona boso restunan riba e restunan di boso ldolonan, pasobra Mi alma lo aborese boso.

³¹Tambe lo Mi hasi boso statnan bira ruina i hasi boso santuarionan desola; i lo Mi no hole boso holonan dushi mas.

³²I lo Mi hasi e tera keda desola, asina ku boso enemigunan ku ta bin keda biba den dje lo keda tur babuka di mira esaki.

³³Ma boso lo Mi plama entre e nashonnan i lo Mi saka spada tras di boso, i boso tera lo keda desola i boso statnan lo keda ruina.

³⁴E ora ei e tera lo gosa su sabatnan tur e dianan di e desolashon, mientras ku boso ta den e tera di boso enemigunan; e ora ei e tera lo sosega i gosa su sabatnan.

³⁵Tur e dianan di su desolashon e tera lo hana e sosiegu ku e no a hana riba boso sabatnan, tempu ku boso tabata biba den dje.

³⁶'Pa loke ta esnan di boso ku a keda, lo Mi pone debilidat tambe den nan kurason na e teranan di nan enemigunan. I zonidu di un blachi ku bientu ta supla bai kune lo kore ku nan, i asta ora ningun hende no ta persigui, nan lo hui manera ta hui pa spada, i nan lo muri.

³⁷Pesei nan lo trompeka un riba otro manera ta pa spada nan ta kore, ounke no tin ningun hende ta persigui nan; i boso lo no tin forsa pa para dilanti di boso enemigunan.

³⁸Ma boso lo perese meimei di e nashonnan, i e tera di boso enemigunan lo kaba ku boso.

³⁹Asina esnan di boso ku keda lo kaba na nada pa motibu di nan inikidat na e teranan di boso enemigunan; i tambe pa motibu di e inikidatnan di nan tatanan nan lo kaba na nada huntu ku nan.

⁴⁰'Si nan konfesa nan inikidat i e inikidat di nan tatanan den nan infieldat ku nan a komete kontra Mi, i tambe den nan aktonan di enemistat kontra Mi

⁴¹(loke a hasi ku Ami a aktua ku enemistat kontra nan, pa hiba nan na e tera di nan enemigunan); anto si nan kurason insirkumsida wordu umiya, asina ku nan ta paga pa nan inikidat,

⁴²e ora ei lo Mi korda riba Mi aliansa ku Jakob, i tambe lo Mi korda riba Mi aliansa ku Isaak, i Mi aliansa ku Abraham, i lo Mi korda riba e tera.

⁴³Pasobra e tera lo wordu bandona pa nan motibu i lo gosa su sabatnan, mientras ku e ta keda desola sin nan. Mientras tantu nan lo paga pa nan inikidat, pasobra nan a rechasa Mi ordenansanan i nan alma a aborese Mi statutonan.

⁴⁴Tog, apesar di esaki, ora nan ta na e tera di nan enemigunan, lo Mi no rechasa nan, ni lo Mi no aborese nan di tal manera ku Mi lo a destrui nan dor di kibra Mi aliansa ku nan; pasobra Ami ta SENOR nan Dios.

⁴⁵Ma pa nan kousa lo Mi korda riba e aliansa ku nan antepasadonan, kendenan Mi a saka for di tera di Egipto den bista di e nashonnan, pa Ami por ta nan Dios. Ami ta SENOR.'"

⁴⁶Esakinan ta e statutonan, ordenansanan i leinan ku SENOR a stablese entre Su mes i e yunan di Israel pa medio di Moises na Seru Sinai.