Read Papantla Totonac Levitiko 27 Bible Online

Levitiko 27 - Papantla Totonac bible

Levitiko 27

¹Atrobe SENOR a papia ku Moises, bisando:

²"Papia ku e yunan di Israel i bisa nan: 'Ora ku un hende hasi un promesa difisil, e mester wordu balora segun bo baluashon di personanan ku ta pertenese na SENOR.

³Si bo baluashon ta pa hende homber for di binti ana te sesenta ana di edat, e ora ei bo baluashon mester ta sinkuenta siklo di plata, segun e siklo di e santuario.

⁴I si ta un hende muhe, e ora ei bo baluashon mester ta trinta siklo.

⁵I si ta un hende di sinku ana te binti ana di edat, e ora ei bo baluashon pa hende homber mester ta binti siklo, i pa hende muhe dies siklo.

⁶Ma si nan ta di un luna te ku sinku ana di edat, e ora ei bo baluashon mester ta sinku siklo di plata pa hende homber, i pa hende muhe bo baluashon mester ta tres siklo di plata.

⁷I si nan ta di sesenta ana p'ariba, si ta un hende homber, e ora ei bo baluashon mester ta diesinku siklo, i pa hende muhe dies siklo.

⁸Ma si e ta mas pober ku bo baluashon, e ora ei nan mester pon'e dilanti di e saserdote, i e saserdote mester balor'e; segun e medionan di esun ku a hasi promesa e saserdote mester balor'e.

⁹'Awor si ta un bestia di e sorto ku hende por presenta komo ofrenda na SENOR, e ora ei tur bestia asina ku hende duna SENOR lo ta santu.

¹⁰E no mester remplas'e ni kambi'e, ni bon pa malu, ni malu pa bon; of si e kambia un bestia pa un otro bestia, e ora ei tantu esaki komo su supstituto lo bira santu.

¹¹Ma si ta un bestia impuru di e sorto ku hende no ta presenta komo ofrenda na SENOR, e ora ei e mester pone e bestia dilanti di e saserdote.

¹²I e saserdote mester balora esaki komo bon of malu; manera abo, e saserdote, balor'e, asina e lo ta.

¹³Ma si un dia e kier redimie, e ora ei e mester anadi un di sinku parti na bo baluashon.

¹⁴'Awor ora un hende konsagra su kas komo santu na SENOR, e saserdote mester balora esaki komo bon of malu; manera e saserdote balor'e, asina e lo keda.

¹⁵Ma si esun ku konsagr'e kier redimi su kas, e mester anadi un di sinku parti di e preis di bo baluashon, pa asina esaki por ta di dje.

¹⁶'Si un hende konsagra parti di e kunukunan di su mes propiedat na SENOR, bo baluashon mester ta konforme e kantidat di simia nesesario pa e kunuku: un homer di simia di puspas, balora na sinkuenta siklo di plata.

¹⁷Si e konsagra su kunuku for di e ana di hubileo, konforme bo baluashon e mester keda.

¹⁸Ma si e konsagra su kunuku despues di e hubileo, e saserdote mester kalkula e preis p'e konforme e ananan ku falta pa e ana di hubileo; i esaki lo wordu rebaha for di bo baluashon.

¹⁹I si un dia esun ku konsagra e kunuku kier redimi esaki, e mester anadi un di sinku parti di e preis di bo baluashon, asina ku e kunuku lo bira di dje.

²⁰Ma si e no kier redimi e kunuku, ma a bende e kunuku ku otro hende, esaki no por wordu redimi mas;

²¹i ora ku e wordu debolbi den e ana di hubileo, e kunuku lo bira santu pa SENOR, manera un kunuku aparta; e lo bira propiedat di e saserdote.

²²'I si e konsagra na SENOR un kunuku ku el a kumpra, ku no ta parti di e kunuku di su mes propiedat,

²³e saserdote mester kalkula p'e e suma di bo baluashon te na e ana di hubileo; i e dia ei e mester duna bo baluashon komo santu na SENOR.

²⁴Den e ana di hubileo e kunuku lo bolbe na esun serka ken el a kumpr'e, na esun ku tabatin e tera komo propiedat.

²⁵Ademas, tur bo baluashon mester ta segun e siklo di e santuario. E siklo lo ta binti gera.

²⁶'Sinembargo, un primogenito di e bestianan, ku komo primogenito ta pertenese na SENOR, ningun hende no mag konsagra esaki; sea buey of karne, ta di SENOR e ta.

²⁷Ma si ta di bestia impuru e ta, e dono mag redimi esaki konforme bo baluashon, i anadi un di sinku parti di esei na dje; i si e no wordu redimi, e mester wordu bendi konforme bo baluashon.

²⁸'Sinembargo, nada ku un hende aparta pa SENOR for di tur loke ku e tin, di hende of di bestia, of di e kunukunan di su mes propiedat, no mag wordu bendi ni redimi. Tur kos dedika asina ta masha santu mes pa SENOR.

²⁹'Ningun hende ku a wordu poni bou di maldishon no mag wordu reskata; e mester wordu mata sigur.

³⁰'Asina henter e diesmo di e tera, di e simia di e tera of di e fruta di palu, ta di SENOR; esaki ta santu pa SENOR.

³¹Pesei, si un homber kier redimi parti di su diesmo, e mester anadi na dje un di sinku parti di dje.

³²I pa kada dies parti di e kria di baka of di e kria di bestia chikitu, tur loke pasa bou di bara, esun di dies lo ta santu pa SENOR.

³³E no mester investiga si esaki ta bon of malu, ni kambia esaki; of si e kambi'e, e ora ei tantu e komo su supstituto lo ta santu. E no mag wordu redimi.'"

³⁴Esakinan ta e mandamentunan ku SENOR a ordena Moises pa e yunan di Israel na Seru Sinai.