Read Papantla Totonac Levitiko 3 Bible Online

Levitiko 3 - Papantla Totonac bible

Levitiko 3

¹'Awor si su ofrenda ta un sakrifisio di e ofrendanan di pas, si e ta bai ofrese esaki for di e kria di baka, sea machu of muhe, e mester ofrese esaki sin defekto dilanti di SENOR.

²I e mester pone su man riba kabes di su ofrenda i mat'e na entrada di e tent di reunion, i Aaron su yu hombernan, e saserdotenan, mester sprengu e sanger tur ront riba e altar.

³Anto for di e sakrifisio di e ofrendanan di pas, e mester presenta un ofrenda di kandela na SENOR, e vet ku ta tapa e shirishiri i tur e vet ku tin na e shirishiri,

⁴i e dos nirnan huntu ku e vet ku tin na nan, ku tin na e lomo, i e vet di e higra, ku e mester kita huntu ku e nirnan.

⁵E ora ei Aaron su yu hombernan mester kim'e riba e altar riba e ofrenda kima ku tin riba e palu ku ta riba e kandela; ta un ofrenda di kandela di un holo dushi na SENOR.

⁶'Ma si su ofrenda pa un sakrifisio di e ofrendanan di pas na SENOR ta for di e kria di bestia chikitu, e mester ofrese esaki, machu of muhe, sin defekto.

⁷Si e ta bai ofrese un lamchi komo su ofrenda, e ora ei e mester ofrese esaki dilanti di SENOR,

⁸i e mester pone su man riba kabes di su ofrenda, i mat'e dilanti di e tent di reunion; i Aaron su yu hombernan mester sprengu su sanger tur ront riba e altar.

⁹I for di e sakrifisio di ofrendanan di pas e mester hiba komo un ofrenda di kandela na SENOR: su vet, henter e rabu gordo ku e mester kit'afo pega ku e wesu di lomba, i e vet ku ta tapa e shirishiri i tur e vet ku tin na e shirishiri,

¹⁰i e dos nirnan huntu ku e vet ku tin na nan, ku tin na e lomo, i e vet di e higra ku e mester kita huntu ku e nirnan.

¹¹E ora ei e saserdote mester kima esaki riba e altar, komo kuminda, un ofrenda di kandela na SENOR.

¹²'Ademas, si su ofrenda ta un kabritu, e ora ei e mester ofrese esaki dilanti di SENOR,

¹³i e mester pone su man riba kabes di e kabritu i mat'e dilanti di e tent di reunion; i e yu hombernan di Aaron mester sprengu su sanger tur ront riba e altar.

¹⁴For di esaki e mester presenta su ofrenda komo un ofrenda di kandela na SENOR: e vet ku ta tapa e shirishiri i tur e vet ku tin na e shirishiri,

¹⁵i e dos nirnan huntu ku e vet ku tin na nan, ku tin na e lomo, i e vet di e higra ku e mester kita huntu ku e nirnan.

¹⁶I e saserdote mester kima nan riba e altar komo kuminda, un ofrenda di kandela komo un holo dushi; tur e vet ta di SENOR.

¹⁷'Esaki ta un statuto perpetuo durante di tur boso generashonnan den tur boso luganan di biba: boso no mag kome ni vet ni sanger.'"