Read Papantla Totonac Levitiko 4 Bible Online

Levitiko 4 - Papantla Totonac bible

Levitiko 4

¹E ora ei SENOR a papia ku Moises, bisando:

²"Papia ku e yunan di Israel, bisando: 'Si un persona peka no intenshonalmente den un di e kosnan ku SENOR a ordena pa no hasi, i e komete un di nan

³'Si e saserdote ungi peka di tal manera ku e ta trese kulpa riba e pueblo, e mester ofrese na SENOR, pa e pika ku el a komete, un bishe machu sin defekto komo un ofrenda pa pika.

⁴E mester hiba e bishe machu na entrada di e tent di reunion dilanti di SENOR, i e mester pone su man riba kabes di e bishe machu i mata e bishe machu dilanti di SENOR.

⁵E ora ei e saserdote ungi mester kohe poko di e sanger di e bishe machu hiba na e tent di reunion,

⁶i e saserdote mester dop su dede den e sanger i sprengu poko di e sanger shete biaha dilanti di SENOR, dilanti di e velo di e santuario.

⁷Tambe e saserdote mester pone poko di e sanger na e kachunan di e altar di sensia aromatiko ku ta keda dilanti di SENOR den e tent di reunion; i tur e sanger di e bishe machu e mester basha na pia di e altar di ofrenda kima ku ta keda na entrada di e tent di reunion.

⁸I e mester kita tur e vet for di e bishe machu di e ofrenda pa pika: e vet ku ta tapa e shirishiri i tur e vet ku tin na e shirishiri,

⁹i e dos nirnan huntu ku e vet ku tin na nan, ku tin na e lomo, i e vet di e higra ku e mester kita huntu ku e nirnan

¹⁰(meskos ku ta kita esaki for di e buey di e sakrifisio di e ofrendanan di pas), i e saserdote mester kima nan riba e altar di ofrenda kima.

¹¹Ma e kueru di e bishe machu i tur su karni, huntu ku su kabes, su patanan, su shirishiri i su mest,

¹²esta, tur sobra di e bishe machu, e mester hiba na un luga limpi pafo di e kampamentu, kaminda ta basha shinishi, i kima esaki riba kandela di palu; kaminda ta basha shinishi e mester wordu kima.

¹³'Awor si henter e kongregashon di Israel komete eror, i e asamblea no ripara e asunto aki, i nan komete un di e kosnan ku SENOR a ordena pa no hasi, i nan bira kulpabel,

¹⁴ora ku e pika ku nan a komete bira konosi, e asamblea mester ofrese un bishe machu di e kria di baka komo un ofrenda pa pika i hiba esaki dilanti di e tent di reunion.

¹⁵E ora ei e ansianonan di e kongregashon mester pone nan mannan riba kabes di e bishe machu dilanti di SENOR, i e bishe machu mester wordu mata dilanti di SENOR.

¹⁶Anto e saserdote ungi mester hiba poko di e sanger di e bishe machu na e tent di reunion;

¹⁷i e saserdote mester dop su dede den e sanger, i sprengu esaki shete biaha dilanti di SENOR, dilanti di e velo.

¹⁸I e mester pone poko di e sanger na e kachunan di e altar ku ta keda dilanti di SENOR den e tent di reunion; i e mester basha tur e sanger na pia di e altar di ofrenda kima ku ta keda na entrada di e tent di reunion.

¹⁹I e mester kita tur su vet for di dje i kima esaki riba e altar,

²⁰i hasi ku e bishe machu meskos ku el a hasi ku e bishe machu di e ofrenda pa pika; asina e mester hasi kune. Asina e saserdote mester hasi ekspiashon pa nan, i nan lo wordu pordona.

²¹E ora ei e mester hiba e bishe machu na un luga pafo di e kampamentu, i kim'e manera el a kima e prome bishe machu; esaki ta un ofrenda pa pika pa e asamblea.

²²'Ora ku un lider peka, i no intenshonalmente hasi un di tur e kosnan ku SENOR Dios a ordena pa no hasi, i e bira kulpabel,

²³si su pika ku el a komete bira konosi p'e, e mester hiba komo su ofrenda un kabritu chubatu sin defekto.

²⁴I e mester pone su mannan riba kabes di e kabritu chubatu i mat'e na e luga kaminda nan ta mata e ofrenda kima dilanti di SENOR; ta un ofrenda pa pika.

²⁵E ora ei e saserdote mester kohe poko di e sanger di e ofrenda pa pika ku su dede i pone esaki na e kachunan di e altar di ofrenda kima; i sobra di su sanger e mester basha na pia di e altar di ofrenda kima.

²⁶I tur su vet e mester kima riba e altar, manera e vet di e sakrifisio di ofrendanan di pas. Asina e saserdote mester hasi ekspiashon p'e enkuanto su pika, i e lo wordu pordona.

²⁷'Awor si un persona di e pueblo peka no intenshonalmente, i si e hasi un di e kosnan ku SENOR a ordena pa no hasi, i e bira kulpabel,

²⁸si su pika ku el a komete bira konosi p'e, e ora ei e mester hiba un kabritu muhe sin defekto komo su ofrenda, pa su pika ku el a komete.

²⁹I e mester pone su mannan riba kabes di e ofrenda pa pika i mata e ofrenda pa pika na e luga di ofrenda kima.

³⁰I e saserdote mester kohe poko di e sanger ku su dede i pone esaki na e kachunan di e altar di ofrenda kima; i tur sobra di e sanger e mester basha na pia di e altar.

³¹E ora ei e mester kita tur su vet, meskos ku e vet a wordu kita for di e sakrifisio di ofrendanan di pas; i e saserdote mester kim'e riba e altar komo un holo dushi na SENOR. Asina e saserdote mester hasi ekspiashon p'e, i e lo wordu pordona.

³²'Ma si e hiba un lamchi komo su ofrenda pa un ofrenda pa pika, e mester hiba un lamchi muhe sin defekto.

³³I e mester pone su mannan riba kabes di e ofrenda pa pika i mat'e komo un ofrenda pa pika na e luga kaminda ta mata ofrenda kima.

³⁴I e saserdote mester kohe poko di e sanger di e ofrenda pa pika ku su dede i pone esaki na e kachunan di e altar di ofrenda kima; i tur sobra di e sanger e mester basha na pia di e altar.

³⁵E ora ei e mester kita tur su vet, meskos ku e vet di e lamchi a wordu kita for di e sakrifisio di e ofrendanan di pas, i e saserdote mester kima nan riba e altar, riba e ofrendanan di kandela na SENOR. Asina e saserdote mester hasi ekspiashon p'e enkuanto su pika ku el a komete, i e lo wordu pordona.