Read Papantla Totonac Levitiko 5 Bible Online

Levitiko 5 - Papantla Totonac bible

Levitiko 5

¹'Awor si un persona peka pasobra e no ta papia despues ku el a tende un yamada publiko pa testifika enkuanto un kos ku el a mira of a tende di dje, e ora ei e mester karga su kulpa.

²'Of si un persona mishi ku un kos impuru, sea kadaver di un bestia impuru, of kadaver di baka impuru, of kadaver di bestia impuru ku ta kriul den otro, ounke ku e no a ripara esaki, i e ta impuru, e ora ei e lo ta kulpabel.

³'Of si e mishi ku impuresa di hende, of loke sea su impuresa ku ta hasie impuru, i e no ripara esaki, i despues e hana sa, e lo ta kulpabel.

⁴'Of si un persona hura ku su lepnan sin pensa, pa hasi maldat of pa hasi bon, den kualke asunto ku un hende ta papia sin pensa pa medio di un huramentu, i e no ta konsiente di esaki, i despues e hana sa di esaki, e lo ta kulpabel den un di e kosnan aki.

⁵'I lo t'asina ku ora e bira kulpabel den un di e kosnan aki, e mester konfesa ku den esei el a peka.

⁶Tambe e mester hiba pa SENOR su ofrenda pa kulpa pa su pika ku el a komete, un bestia muhe for di e kria di bestia chikitu, un lamchi of un kabritu komo un ofrenda pa pika. Asina e saserdote mester hasi ekspiashon p'e pa su pika.

⁷'Ma si e no por duna un lamchi, e ora ei e mester hiba pa SENOR, komo su ofrenda pa kulpa pa su pika ku el a komete, dos tortelduif of dos pichon, esun komo un ofrenda pa pika i e otro komo un ofrenda kima.

⁸I e mester hiba nan pa e saserdote, kende mester ofrese prome esun ku ta pa e ofrenda pa pika, i e mester trose su kabes kita for di su nek, sin kit'e kompletamente for di otro.

⁹Tambe e mester sprengu poko di e sanger di e ofrenda pa pika kontra e banda di e altar, mientras ku sobra di e sanger mester wordu basha na pia di e altar; ta un ofrenda pa pika.

¹⁰Esun di dos e mester prepara e ora ei komo un ofrenda kima segun e ordenansa. I e saserdote mester hasi ekspiashon p'e, pa su pika ku el a komete, i e lo wordu pordona.

¹¹'Ma si su medionan ta insufisiente pa dos tortelduif of dos pichon, e ora ei e mester hiba komo su ofrenda pa e pika ku el a komete, e desimo parti di un efa di harina fini komo un ofrenda pa pika; e no mester pone zeta riba dje ni pone sensia riba dje, pasobra ta un ofrenda pa pika.

¹²I e mester hiba esaki pa e saserdote, i e saserdote mester kohe un man yen di dje komo e porshon di konmemorashon i kim'e riba e altar, huntu ku e ofrendanan di kandela di SENOR; ta un ofrenda pa pika.

¹³Asina e saserdote mester hasi ekspiashon p'e enkuanto su pika ku el a komete den un di e kosnan aki, i e lo wordu pordona; anto e sobra mester keda pa e saserdote, meskos ku e ofrenda di mainshi.'"

¹⁴E ora ei SENOR a papia ku Moises, bisando:

¹⁵"Si un persona aktua infielmente i peka no intenshonalmente kontra e kosnan santu di SENOR, e ora ei e mester hiba su ofrenda pa kulpa pa SENOR: un karne chubatu sin defekto for di e kria di bestia chikitu, segun bo baluashon na siklo di plata, segun e siklo di e santuario, komo un ofrenda pa kulpa.

¹⁶I e mester hasi restitushon pa e pika ku el a hasi kontra e kos santu, i mester anadi un di sinku parti di dje i duna esaki na e saserdote. E ora ei e saserdote mester hasi ekspiashon p'e ku e karne chubatu di e ofrenda pa kulpa, i e lo wordu pordona.

¹⁷"Awor si un persona peka i hasi un di e kosnan ku SENOR a ordena pa no hasi, ounke ku e no tabata sa, tog e ta kulpabel i mester karga su kastigu.

¹⁸E ora ei e mester hiba pa e saserdote un karne chubatu sin defekto for di e kria di bestia chikitu, segun bo baluashon, komo un ofrenda pa kulpa. Asina e saserdote mester hasi ekspiashon p'e enkuanto su eror den kual el a peka no intenshonalmente, sin ku e tabata sa; i e lo wordu pordona.

¹⁹Ta un ofrenda pa kulpa; siguramente e tabata kulpabel dilanti di SENOR."