Read Papantla Totonac Levitiko 6 Bible Online

Levitiko 6 - Papantla Totonac bible

Levitiko 6

¹E ora ei SENOR a papia ku Moises, bisando:

²"Ora ku un persona peka i aktua infielmente kontra SENOR, i ta gana su kompanero enkuanto un asunto di deposito of un kos ku el a dun'e warda p'e, of enkuanto un kos ku el a horta, of si el a kita un kos for di su kompanero ku violensia,

³of si el a hana loke tabata perdi i a gana tokante di esaki i a hasi huramentu falsu, asina ku e ta peka enkuanto un di e kosnan ku un hende por hasi,

⁴e ora ei mester t'asina ku ora e peka i bira kulpabel, e mester debolbe loke ku el a kohe dor di horta, of loke ku el a hana pa medio di violensia, of e deposito ku el a wordu konfia kune, of e kos perdi ku el a hana,

⁵of tur kos ku el a hura falsu p'e; e mester hasi restitushon kompleto p'e i anadi un di sinku parti mas, i duna esaki na esun ku e ta pertenese na dje riba e dia ku e ta presenta su ofrenda pa kulpa.

⁶E ora ei e mester hiba pa e saserdote su ofrenda pa kulpa na SENOR, un karne chubatu sin defekto for di e kria di bestia chikitu, konforme bo baluashon, komo un ofrenda pa kulpa,

⁷i e saserdote mester hasi ekspiashon p'e dilanti di SENOR, i e lo wordu pordona pa kualke di e kosnan ku e por a hasi, ku kual el a trese kulpa riba su mes."

⁸E ora ei SENOR a papia ku Moises, bisando:

⁹"Ordena Aaron ku su yu hombernan, bisando: 'Esaki ta e lei pa e ofrenda kima: e ofrenda kima mes mester keda riba fogon riba e altar henter anochi te mainta, i e kandela riba e altar mester keda sendi riba dje.

¹⁰I e saserdote mester bisti su mantel di lino, i bisti pana djabou na su kurpa; i e mester kohe e shinishi di e ofrenda kima, ku e kandela a laga riba e altar, i pone esaki banda di e altar.

¹¹E ora ei e mester kita su pana i bisti otro pana, i hiba e shinishi pafo di e kampamentu na un luga limpi.

¹²I e kandela riba e altar mester keda sendi riba dje. E no mag paga, ma e saserdote mester kima palu riba dje tur mainta; i e mester akomoda e ofrenda kima riba dje i kima e porshonnan di vet di e ofrendanan di pas riba dje.

¹³Mester tin kandela sendi kontinuamente riba e altar; e no mag paga.

¹⁴'Awor esaki ta e lei di e ofrenda di mainshi: e yu hombernan di Aaron mester present'd dilanti di SENOR dilanti di e altar.

¹⁵E ora ei un di nan mester saka for di dje un man yen di harina fini di e ofrenda di mainshi, huntu ku su zeta i tur e sensia ku tin riba e ofrenda di mainshi, i kima esaki riba e altar, un holo dushi, komo su ofrenda di konmemorashon na SENOR.

¹⁶I loke sobra di dje Aaron ku su yu hombernan mester kome. Nan mester kom'e komo pan buskuchi sin zurdeg den un luga santu; nan mester kom'e riba plenchi di e tent di reunion.

¹⁷E no mester wordu horna ku zurdeg. Mi a duna esaki komo nan parti for di Mi ofrendanan di kandela; e ta masha santu mes, meskos ku e ofrenda pa pika i e ofrenda pa kulpa.

¹⁸Tur hende homber entre e yunan di Aaron mag kom'e; ta un statuto pa semper durante di tur boso generashonnan, for di e ofrendanan di kandela na SENOR. Ken ku mishi ku nan, lo ta konsagra.'"

¹⁹E ora ei SENOR a papia ku Moises, bisando:

²⁰"Esaki ta e ofrenda ku Aaron i su yu hombernan mester presenta na SENOR riba e dia ku e ta wordu ungi: e desimo parti di un efa di harina fini komo un ofrenda regular di mainshi, mitar di dje mainta i mitar di dje atardi.

²¹E mester wordu prepara ku zeta riba kasuela. Ora ku e ta bon meskla, bo mester tres'e. Bo mester presenta e ofrenda di mainshi horna na pida-pida komo un holo dushi na SENOR.

²²I e saserdote ungi, ku lo ta na luga di Aaron meimei di su yu hombernan, mester ofrese esaki. Pa medio di un statuto pa semper e mester wordu kima kompletamente na SENOR.

²³Asina tur ofrenda di mainshi di e saserdote mester wordu kima kompletamente. No mag kom'e."

²⁴E ora ei SENOR a papia ku Moises, bisando:

²⁵"Papia ku Aaron i ku su yu hombernan, bisando: 'Esaki ta e lei di ofrenda pa pika: na e luga kaminda e ofrenda kima ta wordu mata, e ofrenda pa pika mester wordu mata dilanti di SENOR; e ta masha santu mes.

²⁶E saserdote ku ofrese esaki pa pika, mester kom'e. Mester kom'e den un luga santu, riba plenchi di e tent di reunion.

²⁷Ken ku mishi ku su karni lo ta konsagra; i ora algu di su sanger spat riba un pana, bo mester laba loke ku el a spat ariba den un luga santu.

²⁸Tambe e wea di klei den kual el a wordu herebi mester wordu kibra; i si el a wordu herebi den un wea di brons, e ora ei esaki mester wordu frega i spula ku awa.

²⁹Tur hende homber entre e saserdotenan mag kome di dje; e ta masha santu mes.

³⁰Ma no mester kome ningun ofrenda pa pika, for di kual sanger a wordu hiba den e tent di reunion pa hasi ekspiashon den e luga santu; mester kima esaki ku kandela.