Read Papantla Totonac Levitiko 7 Bible Online

Levitiko 7 - Papantla Totonac bible

Levitiko 7

¹'Awor esaki ta e lei di e ofrenda pa kulpa; e ta masha santu mes.

²Den e luga kaminda ta mata e ofrenda kima, nan mester mata e ofrenda pa kulpa, i e mester sprengu su sanger tur ront riba e altar.

³I e mester ofrese tur su vet: e rabu gordo i e vet ku ta tapa e shirishiri,

⁴e dos nirnan huntu ku e vet ku tin na nan, ku tin na e lomo, i e vet ku tin na e higra e mester kita huntu ku e nirnan.

⁵I e saserdote mester kima nan riba e altar komo un ofrenda di kandela na SENOR; ta un ofrenda pa kulpa.

⁶Tur hende homber entre e saserdotenan mag kome di dje. Mester kom'e den un luga santu; e ta masha santu mes.

⁷'E ofrenda pa kulpa ta meskos ku e ofrenda pa pika; pa nan tur dos tin e mesun lei; e saserdote ku hasi ekspiashon kune, mester han'e.

⁸Tambe e saserdote ku presenta e ofrenda kima di un hende, e saserdote ei mester hana e kueru di e ofrenda kima ku el a presenta.

⁹Di e mesun manera tur ofrenda di mainshi ku ta wordu horna den fornu, i tur loke ta prepara den panchi of riba kasuela, mester ta pa e saserdote ku ta present'e.

¹⁰I tur ofrenda di mainshi meskla ku zeta, of ku ta seku, mester ta pa tur e yu hombernan di Aaron, pa tur igual.

¹¹'Awor esaki ta e lei di e sakrifisio di e ofrendanan di pas ku mester wordu presenta na SENOR.

¹²'Si e ofrese esaki komo un gradisimentu, e ora ei huntu ku e sakrifisio di gradisimentu e mester ofrese pan buskuchi sin zurdeg, meskla ku zeta, oblea sin zurdeg hunta ku zeta i pan buskuchi di harina fini, meskla ku zeta.

¹³Huntu ku e sakrifisio di su ofrendanan di pas pa gradisimentu e mester presenta su ofrenda huntu ku pan buskuchi ku zurdeg aden.

¹⁴I di esaki e mester presenta un di kada ofrenda komo un ofrenda di halsamentu na SENOR; esaki mester ta pa e saserdote ku ta sprengu e sanger di e ofrendanan di pas.

¹⁵Awor pa loke ta e karni di e sakrifisio di su ofrendanan di pas pa gradisimentu, mester kome esaki riba e dia ku e wordu ofresi; e no mag laga nada di dje keda te su manise.

¹⁶'Ma si e sakrifisio di su ofrenda ta un promesa of un ofrenda boluntario, mester kom'e riba e mesun dia ku e ta ofrese su sakrifisio; i su siguiente dia mag kome loke a sobra di dje;

¹⁷ma loke a sobra di e karni di e sakrifisio riba e di tres dia mester wordu kima ku kandela.

¹⁸Pesei, si kome un parti di e karni di e sakrifisio di su ofrendanan di pas riba e di tres dia, esun ku ofrese esaki lo no wordu asepta, i esaki lo no wordu konta pa su benefisio. Lo ta un abominashon, i e persona ku kome di dje mester karga su mes inikidat.

¹⁹'Tampoko no mester kome karni ku bin den kontakto ku kos impuru; esaki mester wordu kima den kandela. I pa loke ta otro karni, ken ku ta limpi mag kome di dje.

²⁰Ma e persona ku kome e karni di e sakrifisio di e ofrendanan di pas ku ta pertenese na SENOR, mientras ku e ta impuru, e persona ei mester wordu korta kita for di su pueblo.

²¹I ora ku un persona bin den kontakto ku algu impuru, sea impuresa di hende, of un bestia impuru, of kualke kos abominabel ku ta impuru, i si e kome di e karni di e sakrifisio di ofrendanan di pas ku ta pertenese na SENOR, e persona ei mester wordu korta kita for di su pueblo.'"

²²Anto SENOR a papia ku Moises, bisando:

²³"Papia ku e yunan di Israel, bisando: 'No kome nada di e vet di baka, karne of kabritu.

²⁴E vet di un bestia ku muri, i e vet di un bestia ku un bestia di mondi a habraka, mag wordu uza pa kualke otro kos, ma di ningun manera bo no mester kom'e.

²⁵Pasobra ken ku kome e vet di un bestia di kual un ofrenda kima a wordu ofresi na SENOR, e persona ku kome esaki mester wordu korta kita for di su pueblo.

²⁶I boso no mester kome nada-nada di sanger, sea di parha of di animal, den ningun di boso luganan di biba.

²⁷Kualke persona ku kome sanger, e persona ei mester wordu korta kita for di su pueblo.'"

²⁸E ora ei SENOR a papia ku Moises, bisando:

²⁹"Papia ku e yunan di Israel, bisando: 'Esun ku ofrese e sakrifisio di su ofrendanan di pas na SENOR mester hiba su ofrenda na SENOR for di e sakrifisio di su ofrendanan di pas.

³⁰Su mes mannan mester hiba ofrendanan di kandela na SENOR. E mester hiba e vet huntu ku e pechu, pa e pechu wordu presenta komo un ofrenda di zoyamentu dilanti di SENOR.

³¹I e saserdote mester kima e vet riba e altar; ma e pechu mester ta pa Aaron ku su yu hombernan.

³²I e pia drechi di patras boso mester duna e saserdote komo un ofrenda di halsamentu for di e sakrifisionan di boso ofrendanan di pas.

³³Esun entre e yu hombernan di Aaron ku ofrese e sanger di e ofrendanan di pas i e vet, e pia drechi mester ta di dje komo su porshon.

³⁴Pasobra Mi a tuma e pechu di e ofrenda di zoyamentu i e pia di e ofrenda di halsamentu for di e yunan di Israel, for di e sakrifisionan di nan ofrendanan di pas, i a duna nan na saserdote Aaron i na su yu hombernan komo nan derecho pa semper for di e yunan di Israel.

³⁵'Esaki ta loke ta konsagra na Aaron i loke ta konsagra na su yu hombernan for di e ofrendanan di kandela na SENOR, riba e dia ku el a presenta nan pa sirbi SENOR komo saserdote.

³⁶Esakinan SENOR a ordena pa duna nan for di e yunan di Israel riba e dia ku El a ungi nan. Ta nan derecho pa semper durante di tur nan generashonnan.'"

³⁷Esaki ta e lei di e ofrenda kima, e ofrenda di mainshi, e ofrenda pa pika, e ofrenda pa kulpa, e ofrenda di konsagrashon i e sakrifisio di e ofrendanan di pas,

³⁸ku SENOR a ordena Moises na Seru Sinai riba e dia ku El a ordena e yunan di Israel pa presenta nan ofrendanan na SENOR den e desierto di Sinai.