Read Papantla Totonac Levitiko 8 Bible Online

Levitiko 8 - Papantla Totonac bible

Levitiko 8

¹E ora ei SENOR a papia ku Moises, bisando:

²"Hiba Aaron ku su yu hombernan huntu kune i e pananan, e zeta di unshon, e bishe machu di e ofrenda pa pika, e dos karnenan chubatu i e makutu di pan sin zurdeg,

³i reuni henter e kongregashon na entrada di e tent di reunion."

⁴Asina Moises a hasi meskos ku SENOR a orden'e. I e kongregashon a reuni na entrada di e tent di reunion.

⁵I Moises a bisa e kongregashon: "Esaki ta loke SENOR a ordena pa hasi."

⁶E ora ei Moises a hasi Aaron ku su yu hombernan hala serka, i a laba nan ku awa.

⁷I el a bistie e tunika, a fah'e ku e faha, a bistie e mantel i a bistie e efod; i el a fah'e ku e banchi masha fini gewef di e efod, ku kual el a mara e efod na dje.

⁸E ora ei el a bistie e pechero, i den e pechero el a pone e Urim i e Tumim.

⁹Tambe el a pone e tulban riba su kabes, i riba e tulban, na su parti dilanti, el a pone e plachi di oro, e korona santu, meskos ku SENOR a ordena Moises.

¹⁰E ora ei Moises a kohe e zeta di unshon i a ungi e tabernakel i tur loke tabatin den dje, i a konsagra nan.

¹¹I el a sprengu poko di dje riba e altar shete biaha i a ungi e altar i tur su artikulonan-di-uzo, i e labamano ku su pia, pa konsagra nan.

¹²E ora ei el a basha poko di e zeta di unshon riba Aaron su kabes i a ungie, pa konsagr'e.

¹³Kaba Moises a hasi Aaron su yu hombernan hala serka i a bisti nan e tunikanan, i a faha nan ku faha i a mara pana na nan kabes, meskos ku SENOR a ordena Moises.

¹⁴E ora ei el a trese e bishe machu di e ofrenda pa pika, i Aaron ku su yu hombernan a pone nan mannan riba kabes di e bishe machu di e ofrenda pa pika.

¹⁵Kaba Moises a mat'e i a kohe e sanger, i ku su dede el a pone poko di esaki tur ront riba e kachunan di e altar i a purifika e altar. E ora ei el a basha sobra di e sanger na pia di e altar i a konsagra esaki, pa hasi ekspiashon pa esaki.

¹⁶Tambe el a kohe tur e vet ku tabatin na e shirishiri, e vet di e higra, e dos nirnan i nan vet; i Moises a kima esaki riba e altar.

¹⁷Ma e bishe machu, su kueru, su karni i su mest el a kima den kandela pafo di e kampamentu, meskos ku SENOR a ordena Moises.

¹⁸E ora ei el a presenta e karne chubatu di e ofrenda kima, i Aaron ku su yu hombernan a pone nan mannan riba kabes di e karne chubatu.

¹⁹I Moises a mat'e i a sprengu e sanger tur ront riba e altar.

²⁰Ora ku el a korta e karne chubatu den su diferente pidanan, Moises a kima e kabes, e pidanan i e sebu.

²¹Despues ku el a kaba di laba e shirishiri i e patanan ku awa, Moises a kima henter e karne chubatu riba e altar. Esaki tabata un ofrenda kima komo un holo dushi; e tabata un ofrenda di kandela na SENOR, meskos ku SENOR a ordena Moises.

²²E ora ei el a presenta e di dos karne chubatu, e karne chubatu di konsagrashon; i Aaron ku su yu hombernan a pone nan mannan riba kabes di e karne chubatu.

²³I Moises a mat'e i a kohe poko di su sanger i a pone esaki na klep di Aaron su orea drechi, na duim di su man drechi i na dede grandi di su pia drechi.

²⁴Tambe el a hasi Aaron su yu hombernan hala serka; i Moises a pone poko di e sanger na klep di nan orea drechi, na duim di nan man drechi i na dede grandi di nan pia drechi. E ora ei Moises a sprengu sobra di e sanger tur ront riba e altar.

²⁵I el a tuma e vet, e rabu gordo i tur e vet ku tabatin na e shirishiri, e vet di e higra, e dos nirnan i nan vet i e pia drechi.

²⁶I for di e makutu di pan sin zurdeg ku tabata dilanti di SENOR, el a kohe un pan buskuchi sin zurdeg, un pan buskuchi meskla ku zeta i un oblea, i a pone nan riba e porshonnan di vet i riba e pia drechi.

²⁷E ora ei el a pone tur esakinan riba mannan di Aaron i riba mannan di su yu hombernan, i a presenta nan komo un ofrenda di zoyamentu dilanti di SENOR.

²⁸E ora ei Moises a tuma nan for di nan man i a kima nan riba e altar huntu ku e ofrenda kima. Nan tabata un ofrenda di konsagrashon komo un holo dushi; tabata un ofrenda di kandela na SENOR.

²⁹Tambe Moises a kohe e pechu i a present'e komo un ofrenda di zoyamentu dilanti di SENOR; esaki tabata Moises su porshon di e karne chubatu di konsagrashon, meskos ku SENOR a ordena Moises.

³⁰Asina Moises a kohe poko di e zeta di unshon i poko di e sanger ku tabatin riba e altar i a sprengu esaki riba Aaron, riba su pananan, riba su yu hombernan i riba e pananan di su yu hombernan huntu kune; i el a konsagra Aaron, su pananan, su yu hombernan i e pananan di su yu hombernan huntu kune.

³¹E ora ei Moises a bisa Aaron ku su yu hombernan: "Herebe e karni na entrada di e tent di reunion i kom'e ayanan huntu ku e pan ku ta den e makutu di e ofrenda di konsagrashon, meskos ku mi a ordena, bisando: 'Aaron ku su yu hombernan mester kom'e.'

³²I sobra di e karni i di e pan boso mester kima den kandela.

³³I shete dia largu boso no mag sali for di entrada di e tent di reunion, te na e dia ku e periodo di boso konsagrashon keda kumpli; pasobra durante di shete dia e lo konsagra boso.

³⁴Manera a wordu hasi awe, asina SENOR a ordena pa hasi, pa hasi ekspiashon pa boso.

³⁵Ademas, na entrada di e tent di reunion boso mester keda di dia i anochi, shete dia largu, i kumpli ku e enkargo di SENOR, pa boso no muri, pasobra t'asina mi a wordu ordena."

³⁶Asina Aaron ku su yu hombernan a hasi tur e kosnan ku SENOR a ordena pa medio di Moises.