Read Papantla Totonac Levitiko 9 Bible Online

Levitiko 9 - Papantla Totonac bible

Levitiko 9

¹Awor a sosode ku riba e di ocho dia Moises a yama Aaron ku su yu hombernan i e ansianonan di Israel;

²i el a bisa Aaron: "Kohe pa bo mes un bishe machu komo un ofrenda pa pika i un karne chubatu komo un ofrenda kima, tur dos sin defekto, i ofrese nan dilanti di SENOR.

³E ora ei papia ku e yunan di Israel, bisando: 'Kohe un kabritu chubatu komo un ofrenda pa pika i un bishe i un lamchi, tur dos di un ana, sin defekto, komo un ofrenda kima,

⁴i un buey i un karne chubatu komo ofrendanan di pas, pa ofrese sakrifisio dilanti di SENOR, i un ofrenda di mainshi meskla ku zeta; pasobra awe SENOR lo parese na boso.'"

⁵Asina nan a hiba loke Moises a ordena na e parti dilanti di e tent di reunion, i henter e kongregashon a hala serka i a bai para dilanti di SENOR.

⁶I Moises a bisa: "Esaki ta loke SENOR a ordena boso pa hasi, pa e gloria di SENOR parese na boso."

⁷E ora ei Moises a bisa Aaron: "Hala serka di e altar i ofrese bo ofrenda pa pika i bo ofrenda kima, pa bo hasi ekspiashon pa bo mes i pa e pueblo; despues ofrese e ofrenda pa e pueblo, pa bo hasi ekspiashon pa nan, meskos ku SENOR a ordena."

⁸Asina Aaron a bai na e altar i a mata e bishe di e ofrenda pa pika ku tabata pa su mes.

⁹I Aaron su yu hombernan a presenta e sanger na dje; anto el a dop su dede den e sanger i a pone poko na e kachunan di e altar, i a basha sobra di e sanger na pia di e altar.

¹⁰Ma e vet, e nirnan i e vet di e higra di e ofrenda pa pika el a kima riba e altar, meskos ku SENOR a ordena Moises.

¹¹Ma e karni i e kueru el a kima ku kandela pafo di e kampamentu.

¹²E ora ei el a mata e ofrenda kima, i Aaron su yu hombernan a presenta e sanger na dje, i el a sprengu esaki tur ront riba e altar.

¹³I nan a presenta e ofrenda kima na dje, na pida-pida huntu ku e kabes, i el a kima nan riba e altar.

¹⁴Tambe el a laba e shirishiri i e patanan, i a kima nan huntu ku e ofrenda kima riba e altar.

¹⁵E ora ei el a presenta e ofrenda di e pueblo, i a kohe e kabritu di e ofrenda pa pika ku tabata pa e pueblo, i a mat'e i a ofres'e pa pika, meskos ku esun di prome.

¹⁶Tambe el a presenta e ofrenda kima i a ofrese esaki konforme e ordenansa.

¹⁷Kaba el a presenta e ofrenda di mainshi i a kohe un man yen for di dje i a kima esaki riba e altar, ademas di e ofrenda kima di mainta.

¹⁸E ora ei el a mata e buey i e karne chubatu, e sakrifisio di e ofrendanan di pas ku tabata pa e pueblo; i Aaron su yu hombernan a presenta e sanger na dje, i el a sprengu esaki tur ront riba e altar.

¹⁹Pa loke ta e porshonnan di vet di e buey i di e karne chubatu, e rabu gordo, e vet ku ta tapa e shirishiri, e nirnan i e vet di e higra,

²⁰nan a pone e porshonnan di vet riba e pechunan; i el a kima nan riba e altar.

²¹Ma e pechunan i e pia drechi Aaron a presenta komo un ofrenda di zoyamentu dilanti di SENOR, meskos ku Moises a ordena.

²²E ora ei Aaron a halsa su mannan den direkshon di e pueblo i a bendishona nan, i despues di a ofrese e ofrenda pa pika, e ofrenda kima i e ofrendanan di pas, el a bah'abou.

²³Anto Moises i Aaron a bai den e tent di reunion. Ora nan a sali i a bendishona e pueblo, e gloria di SENOR a parese na henter e pueblo.

²⁴E ora ei kandela a sali for di dilanti di SENOR i a kima e ofrenda kima i e porshonnan di vet i a kaba ku nan riba e altar; i ora henter e pueblo a mira esaki, nan a dal un gritu i a tira nan kurpa abou ku nan kara te na suela.