Read Papantla Totonac Jeremias 1 Bible Online

Jeremias 1 - Papantla Totonac bible

Jeremias 1

¹E palabranan di Jeremias, yu homber di Hilkias, di e saserdotenan ku tabata na Anatot na e tera di Benjamin,

²na kende e palabra di SENOR a yega den e dianan di Josias, yu homber di Amon, rei di Juda, den e di diestres ana di su reinado.

³Esaki a bin tambe den e dianan di Joakim, yu homber di Josias, rei di Juda, te na fin di e di diesun ana di Sedekias, yu homber di Josias, rei di Juda, te na e eksilio di Jerusalem den e di sinku luna.

⁴Awor e palabra di SENOR a yega na mi, bisando:

⁵"Prome ku Mi a formabo den barika, Mi tabata konosebo, i prome ku bo a nase, Mi a konsagrabo; Mi a nombrabo komo profeta pa e nashonnan."

⁶E ora ei mi a bisa: "Ai, Senor DIOS! Mira, mi no sa kon pa papia, pasobra mi ta un mucha."

⁷Ma SENOR a bisami: "No bisa: 'Mi ta un mucha,' pasobra unda ku Ami mandabo, lo bo bai, i tur loke Ami mandabo papia, lo bo papia.

⁸No tene miedu di nan, pasobra Ami ta ku bo pa librabo," SENOR ta deklara.

⁹Anto SENOR a saka Su man i a mishi ku mi boka, i SENOR a bisami: "Ata, Mi a pone Mi palabranan den bo boka.

¹⁰Mira, awe Mi a nombrabo riba e nashonnan i riba e reinonan, pa ranka ku rais ku tur, i pa kibra bash'abou, pa destrui i pa tumba, pa edifika i pa planta."

¹¹I e palabra di SENOR a yega na mi, bisando: "Jeremias, kiko bo ta mira?" I mi a kontesta: "Mi ta mira un bara di palu di amandel."

¹²Anto SENOR a bisami: "Bo a mira bon, pasobra Mi ta perkura pa Mi palabra, pa kumpli kuné."

¹³I e palabra di SENOR a yega na mi pa di dos biaha, bisando: "Kiko bo ta mira?" I mi a kontesta: "Mi ta mira un wea ta herebe i e ta kenter for di den direkshon di nort."

¹⁴E ora ei SENOR a bisami: "For di nort maldat lo basha bin riba tur habitante di e tera.

¹⁵Pasobra, mira, Mi ta yama tur e famianan di e reinonan di nort," SENOR ta deklara. "I nan lo bin. I kada un lo pone su trono na entrada di e portanan di Jerusalem, kontra tur su murayanan tur ront, i kontra tur e statnan di Juda.

¹⁶I lo Mi dikta Mi huisionan kontra nan pa motibu di tur nan maldat, pasobra nan a bandonaMi i a ofrese sakrifisionan na otro diosnan, i a adora e obranan di nan mes man.

¹⁷"Awor, faha bo hep, lanta i bisa nan tur loke Mi ordenabo. No spanta pa nan, pa Mi no tin ku ponebo spanta nan dilanti.

¹⁸Pasobra mira, awe Mi a hasibo manera un stat fortifika, manera un pilar di heru i manera murayanan di brons kontra henter e tera, kontra e reinan di Juda, kontra su prensnan, kontra su saserdotenan i kontra e pueblo di e tera.

¹⁹I nan lo bringa kontra bo, ma nan lo no vensebo, pasobra Ami ta ku bo pa librabo," SENOR ta deklara.