Read Papantla Totonac Jeremias 10 Bible Online

Jeremias 10 - Papantla Totonac bible

Jeremias 10

¹Skucha e palabra ku SENOR ta papia ku bo, O kas di Israel.

²Asina SENOR ta bisa: "No sina e kustumbernan di e nashonnan, i no spanta pa e senalnan di e shelunan, maske e nashonnan ta morto spanta pa nan;

³pasobra kustumber di e pueblonan ta banidat; nan ta kap un palu den mondi-sera, i ku su herment un homber di ofishi ta korta un forma den dje.

⁴Nan ta dorn'e ku plata i oro; nan ta pegu'e ku klabu i martiu, pa e no kenter.

⁵Nan ta manera un spantaparha den kunuku di konkomber, i nan no por papia; nan mester wordu karga, pasobra nan no por kana! No tene miedu di nan, pasobra nan no por hasi ningun dano, ni nan no por hasi nada bon."

⁶No tin ningun manera Bo, O SENOR; grandi Bo ta, i Bo nomber ta grandi den poder.

⁷Ken lo no tin temor di Bo, O Rei di nashonnan? Di berdat, Bo merese esaki! Pasobra entre tur e hendenan sabi di e nashonnan i den tur nan reinonan, no tin ni un manera Bo.

⁸Ma nan tur ta sin sinti i bobo den nan sinansa bano-- nan idolo ta pida palu!

⁹Nan ta trese plata bati for di Tarsis, i oro for di Ufaz, e obra di un homber di ofishi i di man di un plate; nan bisti ta kolo lila i purpura; tur esaki ta e obra di hende eksperto.

¹⁰Ma SENOR ta e Dios berdadero; E ta e Dios bibu i e Rei eterno. Ora ku E rabia, tera ta sakudi, i e nashonnan no por soporta Su indignashon.

¹¹Asina lo bo bisa nan: "E diosnan ku no a traha e shelunan i tera lo perese for di riba tera i for di bou di e shelunan."

¹²Ta El a traha tera ku Su poder, El a stablese mundu ku Su sabiduria; i ku Su konosementu El a span e shelunan.

¹³Ora ku E laga Su bos resona, tin un tumulto di awanan den e shelunan, i E ta hasi e nubianan lanta for di e fin di tera; E ta traha strena pa awaseru, i ta trese bientu for di Su depositonan.

¹⁴Tur hende ta sin sinti, sin komprendementu; tur plate ta keda na berguensa pa motibu di nan idolonan; pasobra nan imagennan basha ta enganoso, i no tin rosea den nan.

¹⁵Nan ta sin balor, kos ridikulo; na tempu di nan kastigu nan lo perese.

¹⁶E porshon di Jakob no ta manera esakinan, pasobra E ta Esun ku ta traha tur kos, i Israel ta e tribu di Su erensia; e SENOR di ehersitonan ta Su nomber.

¹⁷Hisa bo bonder for di suela, abo ku ta biba rondona pa enemigunan!

¹⁸Pasobra asina SENOR ta bisa: "Ata, e biaha aki Mi ta bai zwai e habitantenan di e tera tir'afo, i lo Mi afligi nan pa nan sinti."

¹⁹Ai di mi, pa motibu di mi fraktura! Mi herida ta inkurabel. Ma mi a bisa: "Di berdat, esaki ta un malesa, i mi tin ku soport'e."

²⁰Mi tent a keda destrui, i tur mi kabuyanan ta kibra; mi yu hombernan a bai for di mi i nan no t'ei mas. No tin ni un pa span mi tent atrobe, ni pa kologa mi kortinanan.

²¹Pasobra e wardadonan ta sin sinti i nan no a buska SENOR; pesei nan no a prospera, i henter nan tou ta plama.

²²Tende un rumor! At'e ta bin-- un gran boroto for di e tera di nort-- pa hasi e statnan di Juda un desolashon, un luga pa chakal biba aden.

²³O SENOR, mi sa ku e kaminda di hende no ta di dje mes; tampoko no ta keda na hende pa dirigi su pasonan.

²⁴Koregimi, O SENOR, ma ku huisio; no ku Bo rabia, pa Bo no kaba ku mi.

²⁵Drama Bo furia riba e nashonnan ku no konoseBo, i riba e famianan ku no ta invoka Bo nomber, pasobra nan a devora Jakob; nan a devor'e i a kaba kune, i a laga su luga di biba keda desola.