Read Papantla Totonac Jeremias 12 Bible Online

Jeremias 12 - Papantla Totonac bible

Jeremias 12

¹Bo ta semper hustu, O SENOR, ora mi trese mi kaso Bo dilanti; di berdat, lo mi kier a diskuti asuntonan di huisio ku Bo: pakiko e malbado ta prospera den su kaminda? Pakiko tur esnan ku ta trata ku traishon ta biba trankil?

²Abo a planta nan i nan a kria rais tambe; nan ta krese i asta ta duna fruta. Bo ta semper riba nan lepnan, ma leu for di nan kurason.

³Ma Bo konosemi, O SENOR, Bo ta mirami; Bo ta samina e sintimentunan di mi kurason pa ku Bo. Lastra nan bai ku nan manera karne ku ta wordu hiba pa mata, i aparta nan pa e dia di matansa!

⁴Kuantu tempu mas e tera mester lamenta i yerba di sabana marchita? Pa motibu di e maldat di esnan ku ta biba einan, bestia i parha a disparse, pasobra hende a bisa: "E lo no mira nos fin."

⁵"Si bo kore huntu ku hende na pia i eseinan lagabo morto kansa, anto kon bo por kompeti ku kabai? Si asta den un tera di pas bo kai, kon lo bo hasi den e mondi-sera di Jordan?

⁶Pasobra asta bo ruman hombernan i esnan di kas di bo tata, asta nan a traishonabo, asta nan a grita duru kontra bo. No kere nan, maske kon bunita nan papia ku bo."

⁷"Mi a laga Mi kas, Mi a bandona Mi erensia; Mi a entrega e stima di Mi alma den man di su enemigunan.

⁸Mi erensia a bira pa Mi manera un leon den mondi-sera; el a grunaMi; pesei Mi ta odi'e.

⁹Mi erensia no ta pa Mi manera un parha di rapina tur pinta? No tin parha di rapina kontra dje na tur banda? Bai, hunta tur e bestianan di kunuku, trese nan bin kome!

¹⁰Hopi wardado a ruina Mi kunuku di wendruif, nan a kana trapa Mi kunuku; nan a hasi Mi kunuku bunita bira un desolashon.

¹¹Nan a hasie un desolashon, tur desola e ta lamenta Mi dilanti; henter e tera a keda desola, pasobra ningun hende tin e na kurason.

¹²Destruidonan a yega riba tur e halturanan pelon den desierto, pasobra e spada di SENOR ta devora for di un punta di tera te na e otro; no tin pas pa ningun hende.

¹³Nan a sembra trigo i a kosecha sumpina; nan a kansa nan kurpa pornada. Ma tene berguensa di bo kosecha pa motibu di e rabia ardiente di SENOR."

¹⁴Asina SENOR ta bisa tokante di Mi bisinanan malbado, kendenan kier horta e erensia ku Mi a duna Mi pueblo Israel: "Mira, Mi ta serka di ranka nan ku rais ku tur kita nan for di nan tera; i lo Mi ranka e kas di Juda ku rais ku tur kita for di meimei di nan.

¹⁵I lo sosode ku despues ku Mi a ranka nan ku rais ku tur, lo Mi bolbe tene kompashon ku nan; i lo Mi trese nan bek, kada un na su erensia i kada un na su tera.

¹⁶Anto lo sosode ku si di berdat nan kier sina e kamindanan di Mi pueblo, pa hura den Mi nomber: 'Manera SENOR ta biba,' meskos ku nan a sina Mi pueblo pa hura na Baal, e ora ei nan lo wordu stables! meimei di Mi pueblo.

¹⁷Ma si nan no skucha, e ora ei lo Mi ranka e nashon ei kit'e ku rais ku tur, i destruie," SENOR ta deklara.