Read Papantla Totonac Jeremias 13 Bible Online

Jeremias 13 - Papantla Totonac bible

Jeremias 13

¹Asina SENOR a bisami: "Bai kumpra un faha di lino i pon'e na bo sintura, ma no hink'e den awa."

²Anto mi a kumpra e faha, di akuerdo ku e palabra di SENOR, i a pon'e na mi sintura.

³E ora ei e palabra di SENOR a yega na mi pa di dos biaha, bisando:

⁴"Kohe e faha ku bo a kumpra i ku ta ront di bo sintura, i bai mesora na Riu Eufrates, i skond'e ayanan den un spleit den baranka."

⁵Asina mi a bai skond'e banda di Riu Eufrates, manera SENOR a ordenami.

⁶I a sosode ku despues di hopi dia SENOR a bisami: "Bai mesora na Riu Eufrates i kohe for djei e faha ku Mi a ordenabo pa skonde einan."

⁷E ora ei mi a bai na Riu Eufrates i a koba, i mi a kohe e faha for di e luga kaminda mi a skond'e; i at'e faha tabata tur dana! E no tabata sirbi pa nada mas.

⁸E ora ei e palabra di SENOR a yega na mi, bisando:

⁹"Asina SENOR ta bisa: 'Na e mesun manera lo Mi destrui e orguyo di Juda i e gran orguyo di Jerusalem.

¹⁰Laga e pueblo malbado aki, ku ta nenga di skucha Mi palabranan, ku ta kana segun e kapricho di nan mes kurason i ta sigui tras di otro diosnan pa sirbi nan i pa buig dilanti di nan, ta meskos ku e faha aki ku no ta sirbi pa nada mas.

¹¹Pasobra meskos ku un faha ta pega na sintura di un hende, asina Mi a hasi henter e kas di Israel i henter e kas di Juda pega na Mi, pa nan ta un pueblo pa Mi, pa fama, pa alabansa i pa gloria; ma nan no a skucha,' SENOR ta deklara.

¹²"Pesei, bisa nan e palabra aki: 'Asina SENOR, e Dios di Israel, ta bisa: "Tur butishi mester wordu yena ku bina."' I ora nan bisabo: 'Nos no sa masha bon ku tur butishi mester wordu yena ku bina?'

¹³e ora ei bisa nan: 'Asina SENOR ta bisa: "Mira, Mi ta bai yena tur habitante di e tera aki ku buracheria--e reinan ku ta sinta pa David riba su trono, e saserdotenan, e profetanan i tur habitante di Jerusalem!

¹⁴I lo Mi dal nan un kontra otro, tatanan i yu hombernan tur huntu," SENOR ta deklara. "Lo Mi no tene piedat, ni duele ni kompashon, ma lo Mi destrui nan.

¹⁵Skucha i paga tino, no sea arogante, pasobra SENOR a papia.

¹⁶Duna gloria na SENOR boso Dios prome ku E trese skuridat, i prome ku boso pia trompeka riba e serunan skur, i mientras ku boso ta spera riba klaridat, E ta hasi esaki bira skuridat profundo i ta hasie bira tiniebla.

¹⁷Ma si boso no kier skucha esaki, mi alma lo yora den sekreto pa motibu di boso orguyo; mi wowonan lo yora amargamente i basha lagrima, pasobra e tou di SENOR a wordu kaptura.

¹⁸Bisa rei i reina mama: "Baha for di boso trono, pasobra boso korona bunita a kai for di boso kabes."

¹⁹E statnan di Negev a wordu sera, i no tin ningun hende pa habri nan; henter Juda a wordu hiba den eksilio, kompletamente hiba den eksilio.

²⁰"Hisa boso kara i wak esnan ku ta bin for di nort. Unda e tou ta ku a wordu duna na bo, bo karnenan bunita?

²¹Kiko lo bo bisa ora ku E nombra kompaneronan di antes, ku bo mes a sina, pa manda riba bo? Dolo lo no serabo manera dolo di un muhe na ora di parto?

²²I si bo bisa den bo kurason: 'Pakiko e kosnan aki a sosode ku mi?' Pa motibu di e magnitut di bo inikidat bo sayanan a wordu kita i bo hilchinan a keda bisto.

²³Un etiope por kambia su kueru of un leopardo su manchanan? E ora ei boso tambe por hasi loke ta bon, boso ku ta kustumbra di hasi malu.

²⁴"Pesei lo Mi plama nan manera yerba seku ku ta bula bai ku bientu di desierto.

²⁵Esaki ta bo suerte, e porshon ku Mi a midi pa bo," SENOR ta deklara, "pasobra bo a lubidaMi i a konfia den mentira.

²⁶Asina tambe Mi mes a hisa bo sayanan tapa bo kara kune, pa hende mira bo berguensa.

²⁷Pa loke ta bo adulterionan i bo relinchanan, e maldat di bo prostitushon riba e serunan den kunuku, Mi a mira bo abominashonnan. Ai di bo, O Jerusalem! Kuantu tempu mas lo bo keda impuru?"