Read Papantla Totonac Jeremias 14 Bible Online

Jeremias 14 - Papantla Totonac bible

Jeremias 14

¹Loke a yega na Jeremias komo e palabra di SENOR tokante di e sekura:

²"Juda ta lamenta, i su portanan ta kologa. E hendenan ta sinta abou na suela ta tene rou, i e klamor di Jerusalem a subi bai ariba.

³I nan nobelnan a manda nan sirbidonan pa buska awa; nan a yega na e rembaknan i no a hana awa. Nan a bolbe ku purun bashi; nan a keda na berguensa i a sinti nan mes umiya, i nan a tapa nan kabes.

⁴Tera a sker, pasobra no tin awaseru riba tera; kunukeronan a keda na berguensa; nan a tapa nan kabes.

⁵Asta e bina den mondi a werp i a bandona su yu, pasobra no tin yerba.

⁶Burikunan di mondi ta para riba serunan pelon; nan ta snuif bientu meskos ku chakal; nan wowo ta bira skur, pasobra no tin yerba.

⁷"Maske nos inikidatnan ta testigua kontra nos, aktua, O SENOR, pa kousa di Bo nomber! Di berdat, nos apostasia ta grandi, nos a peka kontra Bo.

⁸Abo, Speransa di Israel, su Salbador den tempu di angustia, pakiko Bo ta manera un stranhero den e tera, of manera un biahero ku a span su tent pa pasa nochi?

⁹Pakiko Bo ta manera un homber desanima, manera un homber poderoso ku no por salba? O SENOR, tog Bo ta meimei di nos, i nos ta wordu yama na Bo nomber; no bandona nos!"

¹⁰Asina SENOR ta bisa tokante di e pueblo aki: "Nan tabata gusta kana dwal; no a importa nan na unda nan pia tabata hiba nan. Pesei SENOR no ta asepta nan; awor E lo korda nan inikidat i kastiga nan pikanan."

¹¹Asina SENOR a bisami: "No hasi orashon pa bienestar di e pueblo aki.

¹²Ora nan yuna, lo Mi no skucha nan klamor. I ora nan ofrese ofrenda kima i ofrenda di mainshi, lo Mi no asepta nan. Alkontrario, Mi ta bai kaba ku nan pa medio di spada, hamber i pest."

¹³Ma mi a bisa: "Ai, Senor DIOS! At'e profetanan ta bisa nan: 'Boso lo no mira spada, ni boso lo no pasa hamber, ma Ami lo duna pas berdadero den e luga aki.'"

¹⁴Anto SENOR a bisami: "E profetanan ta profetisa mentira den Mi nomber. Mi no a manda nan, ni a duna nan ordu, ni a papia ku nan; un vishon falsu, adivinashon, kos sin ningun balor i desepshon di nan mes mente nan ta profetisa na boso.

¹⁵Pesei, asina SENOR ta bisa tokante di e profetanan ku ta profetisa den Mi nomber, sin ku ta Ami a manda nan, i ku tog ta sigui bisa: 'Lo no tin ni spada ni hamber den e tera aki.' Pa medio di spada i hamber e profetanan ei lo yega na nan fin!

¹⁶E pueblo tambe, na kende nan ta profetisa, lo keda benta abou den e kayanan di Jerusalem, pa motibu di hamber i spada. Lo no tin ningun hende pa dera nan--ni nan, ni nan esposanan, ni nan yu hombernan, ni nan yu muhenan, pasobra lo Mi basha nan mes maldat riba nan.

¹⁷"I abo lo bisa nan e palabra aki: 'Laga lagrima basha for di mi wowo di dia i anochi sin stop; pasobra e yu muhe birgen di mi pueblo a wordu destrosa ku un sla duru, ku un herida masha infekta mes.

¹⁸Si mi bai pafo di stat, mi ta mira esnan mata ku spada! Of si mi bai den stat, mi ta mira esnan ku ta malu pa motibu di hamber! Pasobra tantu profeta komo saserdote ta dwal ront den un tera ku nan no konose.'"

¹⁹Bo a rechasa Juda kompletamente? Bo a aborese Sion? Pakiko Bo a dal nos di tal manera ku no tin kura mas pa nos? Nos tabata spera pas, ma nada bon no a bin, i tempu pa kura, ma ata, teror!

²⁰O SENOR, nos ta rekonose nos maldat, e inikidat di nos tatanan, pasobra nos a peka kontra Bo.

²¹No despresia nos pa kousa di Bo mes nomber; no desonra e trono di Bo gloria; rekorda, i no anula Bo aliansa ku nos.

²²Tin sikiera un entre e idolonan di e nashonnan ku ta duna awaseru? Of e shelunan por duna yobida? No ta Abo, O SENOR nos Dios? Pesei nos ta spera den Bo, pasobra ta Abo ta Esun ku a hasi tur e kosnan aki.