Read Papantla Totonac Jeremias 15 Bible Online

Jeremias 15 - Papantla Totonac bible

Jeremias 15

¹E ora ei SENOR a bisami: "Ni maske Moises i Samuel lo a bin para Mi dilanti, Mi kurason lo no a keda konmovi pa e pueblo aki; kore ku nan for di Mi presensia i laga nan bai!

²I lo t'asina ku ora nan puntrabo: 'Na unda nos lo bai?' E ora ei kontesta nan: 'Asina SENOR ta bisa: "Esnan destina pa morto, na morto; esnan destina pa spada, na spada; esnan destina pa hamber, na hamber; i esnan destina pa koutiverio, na koutiverio."'

³"I lo Mi manda kuater sorto di destrukshon riba nan," SENOR ta deklara: "spada pa mata, kacho pa lastra bai kune, parha di shelu i bestia di mondi pa devora i destrui.

⁴I lo Mi hasi nan un opheto di horor meimei di tur e reinonan di tera pa motibu di Manases, yu homber di Ezekias, rei di Juda, pa loke el a hasi na Jerusalem.

⁵"Pasobra ken lo tin duele di bo, O Jerusalem, of ken lo tene rou pa bo, of ken lo para pa puntra kon ta bai ku bo?

⁶Abo a bandonaMi," SENOR ta deklara, "Bo ta sigui bai atras. Pesei lo Mi saka Mi man kontra bo i destruibo; Mi ta kansa di repenti!

⁷Lo Mi bienta nan ku un forki-pa-bienta, na e portanan di e stat di e tera; lo Mi kita nan yunan for di nan, lo Mi destrui Mi pueblo; nan no a bira for di nan kamindanan.

⁸Nan biudanan lo bira mas numeroso Mi dilanti ku santu di laman; merdia lo Mi manda un destruido kontra nan, kontra mama di un hoben. Di golpi lo Mi trese angustia i teror riba dje.

⁹Esun ku a hana shete yu ta bira swak, i ta hala su ultimo rosea; su solo a drenta mientras ku tabata di dia ainda; el a wordu brongosa i umiya. Asina lo Mi entrega nan sobrebibientenan na spada dilanti di nan enemigunan," SENOR ta deklara.

¹⁰Ai di mi, mi mama, ku bo a ponemi na mundu, un homber ku henter e tera ta lucha kontra dje i ta pleita kune! Nunka mi a duna fiansa, ni nunka hende a fiami plaka; tog tur ta maldishonami.

¹¹SENOR a bisa: " Siguramente lo Mi librabo pa bon; siguramente lo Mi hasi e enemigu bin pidibo yudansa den tempu di desaster i den tempu di angustia.

¹²"Hende por kibra heru, heru for di nort, of brons?

¹³Bo rikesa i bo tesoronan lo Mi duna komo botin sin preis, pa motibu di tur bo pikanan den henter bo teritorio.

¹⁴E ora ei lo Mi hasibo sirbido di bo enemigunan na un tera ku bo no konose, pasobra Mi rabia lo sende un kandela ku lo kima boso."

¹⁵O SENOR, Abo ku sa, korda riba mi i kuidami, i tuma vengansa pa mi riba esnan ku ta persiguimi. Den Bo pasenshi, no kita mi bida; sabi ku ta pa Bo kousa mi ta soporta reproche.

¹⁶Bo palabranan a wordu hana i mi a kome nan, i Bo palabranan a bira un goso pa mi i e delisia di mi kurason; pasobra mi a wordu yama na Bo nomber, O SENOR Dios di ehersitonan.

¹⁷Mi no a sinta huntu ku esnan ku ta hasi bofon, ni mi no a regosiha. Mi tabata sinta mi so, pasobra Bo man tabata riba mi, i Bo a yenami ku indignashon.

¹⁸Pakiko no tin fin na mi dolo, i mi herida ta inkurabel i no kier sera? Lo Bo ta pa mi manera un korida di awa ku bo no por konfia, manera awa ku bo no por depende di dje?

¹⁹Pesei, asina SENOR ta bisa: "Si bo bolbe, e ora ei lo Mi restorabo; lo bo para Mi dilanti; i si bo separa loke ta presioso for di loke ta sin balor, lo bo ta Mi bosero. Nan si por bin serka bo, ma abo no mester bai serka nan.

²⁰Anto lo Mi hasibo un muraya-di-brons fortifika pa e pueblo aki; i maske nan lucha kontra bo, nan lo no triunfa riba bo; pasobra Ami ta ku bo pa salbabo i pa librabo," SENOR ta deklara.

²¹"Asina lo Mi librabo for di man di e malbadonan, i lo Mi redimibo for di gara di hende violento."