Read Papantla Totonac Jeremias 16 Bible Online

Jeremias 16 - Papantla Totonac bible

Jeremias 16

¹Tambe e palabra di SENOR a yega na mi, bisando:

²"Lo bo no tuma un esposa, ni hana yu homber ni yu muhe na e luga aki."

³Pasobra asina SENOR ta bisa tokante di e yu hombernan i e yu muhenan ku nase na e luga aki, i tokante di nan mamanan ku hana nan i nan tatanan ku engendra nan na e tera aki:

⁴"Nan lo muri di malesanan mortal. Lo no tin lamentashon pa nan, ni nan lo no wordu dera. Nan lo ta manera mest riba superfisio di tera, i spada i hamber lo kaba ku nan, i nan kadavernan lo bira kuminda pa parha di shelu i pa bestia di mondi."

⁵Pasobra asina SENOR ta bisa: "No drenta kas di rou, ni bai pa lamenta ni pa konsola nan; pasobra Mi a kita Mi pas, Mi miserikordia i Mi kompashon for di e pueblo aki," SENOR ta deklara.

⁶"Tantu e poderosonan komo e chikitunan lo muri na e tera aki. Nan lo no wordu dera, i lo no tin lamento pa nan. Ni ningun hende lo no korta su kurpa ni feita su kabes pa nan motibu.

⁷Ningun hende lo no parti pan pa esnan ku ta na rou, pa konsola nan pa nan defuntonan, ni duna nan bebe e kopa di konsolashon pa nan tata of nan mama.

⁸"Tampoko bo no mester drenta un kas kaminda tin fiesta, pa sinta kome i bebe ku nan."

⁹Pasobra asina e SENOR di ehersitonan, e Dios di Israel, ta bisa: "Mira, dilanti di bo bista i den bo dianan Mi ta bai kita e bos di alegria i e bos di goso, e bos di bruidehom i e bos di bruit for di e luga aki.

¹⁰"I lo sosode ku ora bo bisa e pueblo aki tur e palabranan aki, nan lo puntrabo: 'Pa ki motibu SENOR a deklara un kalamidat asina grandi kontra nos? Kiko ta nos inikidat of kiko ta e pika ku nos a komete kontra SENOR nos Dios?'

¹¹E ora ei bo mester bisa nan: 'Ta pasobra boso antepasadonan a bandonaMi i a sigui otro diosnan, i a sirbi nan i a buig nan dilanti; ma Ami nan a bandona i no a warda Mi lei,' SENOR ta deklara.

¹²'Boso tambe a hasi malu, mas pio ainda ku boso antepasadonan, pasobra mira, kada un di boso ta kana segun e kapricho di su kurason malbado, sin skucha na Mi.

¹³Pesei lo Mi zwai boso for di e tera aki benta na un tera ku ni boso ni boso tatanan tabata konose. Aya boso lo sirbi otro diosnan di dia i anochi, pasobra lo Mi no mustra boso ningun fabor.'

¹⁴"Pesei, ata, e dianan ta bin," SENOR ta deklara, "ku lo no wordu bisa mas: 'Manera SENOR ta biba, Kende a saka e yunan di Israel for di tera di Egipto,'

¹⁵sino: 'Manera SENOR ta biba, Kende a saka e yunan di Israel for di tera di nort i for di tur e paisnan pa unda El a kore ku nan manda nan bai.' Pasobra lo Mi trese nan bek na nan mes tera ku Mi a duna nan tatanan.

¹⁶"Mira, Mi ta bai manda buska hopi piskado," SENOR ta deklara, "i nan lo piska nan. Despues lo Mi manda buska hopi yagdo, i nan lo yag nan for di riba tur seru i tur seritu i for di den e spleitnan den baranka.

¹⁷Pasobra Mi wowo ta riba tur nan kamindanan. Nan no ta skondi for di Mi bista, ni nan inikidat no ta tapa pa Mi wowo no mira.

¹⁸Prome lo Mi paga nan dobel pa nan inikidat i pa nan pika, pasobra nan a kontamina Mi tera. Nan a yena Mi erensia ku e kadaveman di nan idolonan repugnante i ku nan abominashonnan."

¹⁹O SENOR, mi fortalesa i mi forti, mi refugio den e dia di angustia, serka Bo e nashonnan lo bin for di e finnan di mundu, i lo bisa: "Nos tatanan no a ereda nada otro sino mentira, banidat i kosnan sin ningun probecho."

²⁰Akaso hende por traha diosnan pa su mes? E por, ma nan no ta dios si!

²¹"Pesei mira, Mi ta bai mustra nan-- e biaha aki lo Mi laga nan konose Mi poder i Mi forsa; i nan lo sa ku Mi nomber ta SENOR."