Read Papantla Totonac Jeremias 17 Bible Online

Jeremias 17 - Papantla Totonac bible

Jeremias 17

¹E pika di Juda ta skirbi ku pen di heru; ku punta di djamanta e ta graba riba tabla di nan kurason, i riba e kachunan di nan altarnan.

²Manera nan ta korda riba nan yunan, asina nan ta korda riba nan altarnan i nan imagennan di Asera banda di palunan berde riba serunan haltu.

³O Mi seru den sabana, lo Mi entrega bo rikesa i tur bo tesoronan komo botin, huntu ku bo luganan haltu, pa motibu di pika den henter bo teritorio.

⁴I pa bo mes falta lo bo perde bo erensia ku Mi a dunabo; i lo Mi ponebo sirbi bo enemigunan na e tera ku bo no konose; pasobra boso a sende un kandela den Mi rabia ku lo kima pa semper.

⁵Asina SENOR ta bisa: "Maldishona ta esun ku ta konfia den hende i ta hasi karni su fortalesa, i kende su kurason ta aleha for di SENOR.

⁶Pasobra e lo ta manera un mata den desierto, ku lo no ripara ora prosperidat bin, ma lo biba den luganan seku den desierto, un tera di salpeter, sin habitante.

⁷"Bendishona ta e hende ku ta konfia den SENOR, i kende su konfiansa ta den SENOR.

⁸Pasobra e lo ta manera un palu planta kantu di awa, ku ta manda su raisnan bai na un korida di awa, i ku lo no tin miedu ora kalor bin; ma su blachinan lo ta berde, i den e ana di sekura e no ta preokupa, ni laga di duna fruta.

⁹"E kurason ta mas enganoso ku tur kos i ta totalmente korupto; ken por komprend'e?

¹⁰"Ami, SENOR, ta skudrina kurason, Mi ta samina mente, pa duna kada un segun su kondukta, segun e fruta di su echonan.

¹¹"Manera patrishi ku ta brui webu ku e no a pone, asina e hende ta ku ta montona rikesa ku engano; na mitar di su bida esei lo lagu'e, i na fin e lo ta un bobo."

¹²Un trono glorioso halsa for di prinsipio ta e luga di nos santuario.

¹³O SENOR, e speransa di Israel, tur esnan ku bandonaBo lo keda na berguensa; "Esnan ku aparta nan mes for di Mi lo wordu skirbi den tera, pasobra nan a bandona SENOR, e fuente di awa bibu."

¹⁴Kurami, O SENOR, i lo mi ta kura; salbami i lo mi ta salba, pasobra Bo ta mi alabansa.

¹⁵Mira, ketu bai nan ta bisami: "Unda e palabra di SENOR ta? Laga esaki bin awor!"

¹⁶Ma pa loke t'ami, mi no a buska manera di skapa pa no ta un wardado ku ta siguiBo, ni mi no a anhela na e dia di kalamidat; Abo mes sa ku e palabranan ku a sali for di mi lepnan tabata Bo dilanti.

¹⁷No sea un teror pa mi; Bo ta mi refugio den e dia di desaster.

¹⁸Laga esnan ku ta persiguimi keda na berguensa, ma pa loke t'ami, no lagami keda na berguensa; laga nan keda desmaya, ma no laga ami keda desmaya. Trese un dia di desaster riba nan i destrui nan ku destrukshon dobel.

¹⁹Asina SENOR a bisami: "Bai para den e porta publiko di e yunan di e pueblo, dor di kual e reinan di Juda ta drenta i sali, i tambe den tur e portanan di Jerusalem,

²⁰i bisa nan: 'Skucha e palabra di SENOR, reinan di Juda i henter Juda, i tur habitante di Jerusalem ku ta drenta dor di e portanan aki:

²¹asina SENOR ta bisa: "Perkura pa boso no karga ningun karga riba dia di sabat, ni drenta ku nada dor di e portanan di Jerusalem.

²²I no saka ningun karga for di boso kasnan riba dia di sabat, ni hasi ningun trabou, ma santifika dia di sabat, manera Mi a ordena boso antepasadonan.

²³Tog nan no a skucha ni a inklina nan orea, ma a hasi nan nek steif i no kier a skucha ni asepta korekshon.

²⁴Ma lo sosode ku si boso skuchaMi ku atenshon," SENOR ta deklara, "i no drenta ku karga dor di e portanan di e stat aki riba dia di sabat, ma santifika dia di sabat dor di no hasi ningun trabou riba e dia ei,

²⁵e ora ei reinan i prensnan, sinta riba e trono di David, lo drenta dor di e portanan di e stat aki den garoshi i riba kabai, nan i nan prensnan, e hombernan di Juda i e habitantenan di Jerusalem; i e stat aki lo keda habita pa semper.

²⁶Nan lo bin for di e statnan di Juda i for di e luganan ront di Jerusalem, for di e tera di Benjamin, for di e sabananan, for di e serunan i for di Negev. Nan lo trese ofrendanan kima, sakrifisionan, ofrendanan di mainshi i sensia, i tambe nan lo trese sakrifisionan di gradisimentu na e kas di SENOR.

²⁷Ma si boso no tende na Mi pa santifika dia di sabat i pa no karga ningun karga i pa no pasa dor di e portanan di Jerusalem riba dia di sabat, e ora ei lo Mi sende un kandela den su portanan, i esaki lo devora e palasionan di Jerusalem sin ku e wordu paga.