Read Papantla Totonac Jeremias 18 Bible Online

Jeremias 18 - Papantla Totonac bible

Jeremias 18

¹E palabra di SENOR a yega na Jeremias, bisando:

²"Lanta i baha bai na kas di e alfarero i ayanan lo Mi anunsia Mi palabranan na bo."

³E ora ei mi a baha bai na kas di e alfarero i net e tabata hasi un trabou riba e wil.

⁴Ma e pochi ku e alfarero tabata forma ku e klei a frakasa den su man; asina el a traha un otro pochi ku e klei, manera tabata parse bon den bista di e alfarero pa trah'e.

⁵E ora ei e palabra di SENOR a yega na mi, bisando:

⁶"Mi no por hasi ku boso, O kas di Israel, manera e alfarero aki ta hasi?" SENOR ta deklara. "Mira, meskos ku e klei ta den man di e alfarero, asina boso ta den Mi man, O kas di Israel.

⁷Si na un dado momento Mi deklara ku un nashon of un reino mester wordu ranka afo, tumba of destrui,

⁸anto e nashon ei ku Mi a spierta bira for di su maldat, lo Mi repent! di e kalamidat ku Mi a plania pa trese riba dje.

⁹Of si na un otro momento Mi deklara tokante di un nashon of un reino, pa edifik'e of pa plant'e,

¹⁰anto esaki hasi maldat den Mi bista dor di no obedese Mi bos, e ora ei lo Mi repent! di e bondat ku Mi a priminti di bendishon'e kune.

¹¹"Pesei, papia awor ku e hombernan di Juda i kontra e habitantenan di Jerusalem, i bisa nan: 'Asina SENOR ta bisa: "Mira, Mi ta preparando kalamidat kontra boso i ta trahando un plan kontra boso. O bolbe bek, kada un di boso for di su mal kaminda i kambia boso kondukta i boso echonan."'

¹²Ma nan lo bisa: 'Esei no ta yuda ku nada! Pasobra nos ta bai sigui nos mes plannan, i kada un di nos lo aktua segun e kapricho di su kurason malbado.'

¹³"Pesei, asina SENOR ta bisa: 'Puntra awor entre e nashonnan, ken a yega di tende un kos asina? E birgen Israel a hasi algu masha horibel mes.

¹⁴E sneu di Libano lo disparse for di e bahadanan di seru yen di baranka? Of e awa friu ku ta kore for di teranan leu lo seka?

¹⁵Pasobra Mi pueblo a lubidaMi; nan ta kima sensia na diosnan ku no bal nada, ku a hasi nan trompeka den nan kamindanan, den e berehanan di antes, pa kana den hanchi i no riba kaminda grandi,

¹⁶pa hasi nan tera un desolashon, un opheto di bofon pa semper; ken ku pasa banda di dje lo keda asombra i lo sakudi kabes.

¹⁷Manera un bientu di pariba lo Mi plama nan dilanti di e enemigu; lo Mi laga nan mira Mi lomba i no Mi kara den e dia di nan kalamidat.'"

¹⁸E ora ei nan a bisa: "Laga nos ban traha komplot kontra Jeremias. Siguramente e lei lo no ta perdi pa e saserdotenan, ni konseho pa e homber sabi, ni e palabra dibino pa e profeta! Laga nos ban atak'e ku nos lenga i no paga tino na ningun di su palabranan."

¹⁹Skuchami, O SENOR, i tende loke mi oponentenan ta bisa!

²⁰Mester paga bon ku malu? Pasobra nan a koba un pos pa mi. Korda kon mi a para Bo dilanti pa papia na nan fabor, pa kita Bo furia for di riba nan.

²¹Pesei, entrega nan yunan na hamber, i entrega nan na e poder di spada; i laga nan esposanan keda sin yu i bira biuda. Laga nan hombernan tambe wordu mata, nan hobennan mata ku spada den bataya.

²²Laga un gritu wordu tend! for di nan kasnan, ora ku Abo laga sakeadonan bin riba nan direpiente; pasobra nan a koba un pos pa kohemi prezo, i a skonde trampa pa kohe mi pia aden.

²³Ma Abo, O SENOR, konose tur nan plannan pa matami; no pordona nan inikidat, ni kita nan pika for di Bo bista. Ma laga nan wordu tumba Bo dilanti; trata ku nan den e tempu di Bo rabia!