Read Papantla Totonac Jeremias 19 Bible Online

Jeremias 19 - Papantla Totonac bible

Jeremias 19

¹Asina SENOR ta bisa: "Bai kumpra un butishi di klei serka e alfarero i hiba algun ansiano di e pueblo i algun ansiano di e saserdotenan.

²Anto bai na Vaye di Ben-hinom, ku ta keda na entrada di e Porta Pariba, i proklama ayanan e palabranan ku Ami lo dunabo,

³i bisa: 'Skucha e palabra di SENOR, O reinan di Juda i habitantenan di Jerusalem: asina e SENOR di ehersitonan, e Dios di Israel, ta bisa: "Mira, Mi ta bai manda kalamidat riba e luga aki, ku lo pone orea di tur esnan ku tende di dje fluit.

⁴Pasobra nan a bandonaMi i a profana e luga aki i a kima sakrifisionan den dje na otro diosnan ku nunka nan ni nan antepasadonan, ni e reinan di Juda a yega di konose; i pasobra nan a yena e luga aki ku sanger di hende inosente,

⁵i a traha e luganan haltu di Baal, pa kima nan yu hombernan den kandela komo ofrenda kima na Baal, un kos ku nunka Mi a ordena ni papia di dje, ni nunka a bin den Mi pensamentu.

⁶Pesei, ata, e dianan ta bin," SENOR ta deklara, "ku e luga aki lo no wordu yama Tofet ni Vaye di Ben-hinom mas, sino Vaye di Matansa.

⁷"I lo Mi anula e konseho di Juda i di Jerusalem na e luga aki, i lo Mi laga nan kai pa medio di spada dilanti di nan enemigunan i na man di esnan ku ta buska nan pa mata. I lo Mi entrega nan kadavernan pa parha di shelu i bestia di mondi kome.

⁸Tambe lo Mi hasi e stat aki un desolashon i un opheto di bofon. Ken ku pasa banda di dje lo keda tur asombra i lo hasi bofon di tur su desasternan.

⁹I lo Mi pone nan kome karni di nan yu hombernan i karni di nan yu muhenan, i un lo kome karni di otro mientras ku nan enemigunan ta ront di nan, i mientras ku nan ta den e ansha ku nan enemigunan i esnan ku ta buska nan pa mata ta pone nan aden."'

¹⁰"E ora ei bo mester kibra e butishi den bista di esnan ku ta huntu ku bo,

¹¹i bisa nan: 'Asina e SENOR di ehersitonan ta bisa: "Manera ta kibra pochi ku un alfarero a traha, i ku no por wordu drecha mas, asina lo Mi kibra e pueblo i e stat aki. Nan lo dera na Tofet, pasobra no tin otro luga pa dera.

¹²Asin'aki lo Mi trata ku e luga aki i ku su habitantenan," SENOR ta deklara, "i hasi e stat aki meskos ku Tofet.

¹³I e kasnan di Jerusalem i e kasnan di e reinan di Juda lo keda kontamina meskos ku e luga Tofet, pa motibu di tur e kasnan kaminda nan a kima sakrifisio riba dak pa henter e ehersito di shelu, i a basha ofrendanan di bibida na otro diosnan.

¹⁴E ora ei Jeremias a bolbe for di Tofet, kaminda SENOR a mand'e bai profetisa. I el a para riba plenchi di e kas di SENOR, i a bisa henter e pueblo:

¹⁵"Asina e SENOR di ehersitonan, e Dios di Israel, ta bisa: 'Mira, Mi ta bai manda riba e stat aki i riba tur su statnan chikitu henter e kalamidat ku Mi a deklara kontra dje, pasobra nan a hasi nan nek steif i no kier a tende na Mi palabranan.'"