Read Papantla Totonac Jeremias 2 Bible Online

Jeremias 2 - Papantla Totonac bible

Jeremias 2

¹E palabra di SENOR a yega na mi, bisando:

²"Bai i proklama pa Jerusalem tende, i bisa: 'Asina SENOR ta bisa: "Mi ta korda e fieldat di bo hubentut, e amor tempu ku bo tabata bruit, kon bo a siguiMi den desierto, dor di un tera ku no a wordu sembra.

³Israel tabata santu pa SENOR, e prome fruta di Su kosecha; tur ku a kome for di dje a bira kulpabel; maldat a bin riba nan," SENOR ta deklara.'"

⁴Skucha e palabra di SENOR, O kas di Jakob, i tur e famianan di e kas di Israel.

⁵Asina SENOR ta bisa: "Ki inhustisia boso tatanan a hana den Mi, ku nan a bai leu for di Mi, i a sigui tras di banidat i a bira bano?

⁶I nan no a puntra: 'Unda SENOR ta, Kende a saka nos for di tera di Egipto, Kende a guia nos dor di e desierto, dor di un tera desola i yen di buraku, dor di un tera seku i di sombra di morto, dor di un tera kaminda ningun hende a yega di pasa, kaminda ningun hende a yega di biba?'

⁷I Mi a hiba boso na un tera fruktifero, pa boso kome di su fruta i di tur loke ta bon den dje. Ma boso a bin kontamina Mi tera, i boso a hasi Mi erensia un abominashon.

⁸E saserdotenan no a puntra: 'Unda SENOR ta?' I esnan ku tabatin e lei den nan poder no tabata konoseMi; e gobernantenan tambe a transgresa kontra Mi, i e profetanan a profetisa den e nomber di Baal, i a sigui tras di kosnan ku no ta di probecho.

⁹"Pesei lo Mi sigui pleita ku boso," SENOR ta deklara. "I ku yunan di boso yunan lo Mi pleita.

¹⁰Pasa anto bai na e teranan na kosta di Kitim i mira, i manda mensahero na Kedar i opserva di serka, i mira si algu manera esaki a yega di sosode!

¹¹Akaso un nashon a yega di kambia su diosnan, maske nan no tabata dios? Ma Mi pueblo a kambia nan gloria pa kosnan ku no ta di probecho.

¹²Keda babuka pa motibu di esaki, O shelunan, tembla i keda masha desola," SENOR ta deklara.

¹³"Pasobra Mi pueblo a komete dos echo di maldat: Nan a bandonaMi, e fuente di awa bibu, pa traha rembak pa nan mes, rembak kibra ku no por tene awa.

¹⁴Israel ta un esklabu? Of e ta un sirbido for di nasementu? Pakiko el a bira proi?

¹⁵Leon chikitu a gruna kontra dje, nan a gruna duru. Nan a laga su tera keda desola; su statnan a keda destrui, sin habitante.

¹⁶Tambe e hombernan di Menfis i Tafnes a feita korona di bo kabes.

¹⁷No ta bo mes a buska esaki dor di bandona SENOR bo Dios tempu ku El a guiabo den e kaminda?

¹⁸Awor pakiko bai Egipto pa bebe awa di Riu Neil? Of pakiko bai Asiria pa bebe awa di Riu Eufrates?

¹⁹Bo mes maldat lo koregibo, i bo apostasia lo reprendebo; sabi anto i mira ku ta algu malu i amargo ku bo a bandona SENOR bo Dios, i ku bo no tin temor pa Mi," e Senor DIOS di ehersitonan ta deklara.

²⁰"Pasobra hopi tempu pasa Mi a kibra bo yugo i a kibra bo kadenanan; ma bo a bisa: 'Mi no kier sirbi!' Pasobra riba tur seru haltu i bou di tur palu berde bo a kai drumi manera un prostituta.

²¹Tog Mi a plantabo manera un mata di wendruif skohi, un simia kompletamente fiel. Kon anto bo por a kambia bo mes Mi dilanti i bira spreitnan degenera di un mata di wendruif shimaron?

²²Maske bo laba bo mes ku soda brabu i uza hopi habon, tog e mancha di bo inikidat ta Mi dilanti," Senor DIOS ta deklara.

²³"Kon bo por bisa: 'Mi no ta kontamina; mi no a sigui tras di e Baalnan'? Mira bo kondukta den e vaye! Mira kiko bo a hasi! Bo ta un kamel yon i lihe ku ta kore bai bin,

²⁴un yewa shimaron, kustumbra ku mondi, ku den su pashon ta snuif bientu. I den su tempu di dek, ken por kontrol'e? Ken ku busk'e no tin mester di kansa kurpa; den su luna nan lo han'e.

²⁵Perkura pa bo no ta pia abou i pa bo garganta no seka; ma bo a bisa: 'No! No tin speransa! Pasobra mi a stima stranheronan i lo mi sigui nan tras.'

²⁶"Meskos ku un ladron ta keda na berguensa ora ku e wordu atrapa, asina e kas di Israel ta keda na berguensa; nan mes, nan reinan, nan prensnan, nan saserdotenan i nan profetanan,

²⁷kendenan ta bisa pida palu: 'Abo ta mi tata,' i un piedra: 'Ta abo a ponemi na mundu.' Pasobra nan a bira nan lomba pa Mi i no nan kara; ma den tempu di nan kalamidat nan lo bisa: 'Lanta i salba nos.'

²⁸Ma unda bo diosnan ta, ku bo a traha pa bo mes? Laga nan lanta, si nan por salbabo den tempu di bo kalamidat; pasobra bo diosnan, O Juda, ta mes tantu ku bo statnan.

²⁹"Pakiko boso ta pleita ku Mi? Boso tur a transgresa kontra Mi," SENOR ta deklara.

³⁰En bano Mi a kastiga boso yu hombernan; nan no a asepta korekshon. Boso mes spada a devora boso profetanan, manera leon ku ta destrosa.

³¹"O generashon, skucha e palabra di SENOR. "Ta un desierto pa Israel Mi tabata, of un tera di skuridat profundo? Pakiko Mi pueblo ta bisa: 'Nos ta liber; nos no ta bin serka Bo mas'?

³²Un birgen por lubida su adornonan, of un bruit su bisti? Tog Mi pueblo a lubidaMi pa dianan largu.

³³Esta bon bo ta prepara bo kaminda pa buska amor! Pesei asta muhenan malbado bo a sina bo kamindanan.

³⁴Tambe na bo sayanan hende por hana sanger di e pober inosentenan, kendenan bo no a hana ta kibra drenta kasnan. Ma apesar di tur e kosnan aki

³⁵bo ta bisa: 'Ami ta inosente; siguramente Su rabia ta kita for di mi.' Mira, Mi ta bin pa huzgabo, pasobra bo ta bisa: 'Mi no a peka.'

³⁶Pakiko bo ta keda kana ront asina, kambiando bo kaminda? Egipto tambe lo ponebo na berguensa, meskos ku Asiria a ponebo na berguensa.

³⁷For di e luga aki tambe lo bo sali ku man na kabes; pasobra SENOR a rechasa esnan ku bo ta konfia aden, i lo bo no prospera huntu ku nan."