Read Papantla Totonac Jeremias 20 Bible Online

Jeremias 20 - Papantla Totonac bible

Jeremias 20

¹Ora saserdote Pasur, yu homber di Imer, kende tabata e ofisial prinsipal den e kas di SENOR, a tende Jeremias ta profetisa e kosnan aki,

²Pasur a laga bati profeta Jeremias, i a pon'e den e sepanan ku tabatin na e Porta di Benjamin, esun ariba, ku tabata keda banda di e kas di SENOR.

³Anto a sosode ku su manise, ora Pasur a los Jeremias for di e sepanan, Jeremias a bis'e: "Pasur no ta e nomber ku SENOR a dunabo, sino Magor-misabib.

⁴Pasobra asina SENOR ta bisa: 'Mira, Mi ta bai hasibo un teror pa bo mes i pa tur bo amigunan. Mientras ku bo mes wowo ta mira, nan lo kai pa medio di spada di nan enemigunan. Asina lo Mi entrega henter Juda den man di rei di Babilonia i e lo hiba nan Babilonia den eksilio i lo mata nan ku spada.

⁵Tambe lo Mi entrega tur rikesa di e stat aki, tur su produktonan i tur su kosnan kostoso; si, tur e tesoronan di e reinan di Juda lo Mi entrega den man di nan enemigunan, i nan lo plunder nan, bai ku nan i hiba nan Babilonia.

⁶I abo, Pasur, i tur esnan ku ta biba den bo kas, lo bai den koutiverio. Lo bo drenta Babilonia i ayanan lo bo muri i ayanan nan lo derabo, abo i tur bo amigunan, na kendenan bo a profetisa mentira.'"

⁷O SENOR, Bo a desepshonami i mi a keda desepshona; Bo ta mas fuerte ku mi i Bo a prevalese. Mi a bira un kos di hari henter dia; tur hende ta hasi bofon di mi.

⁸Pasobra kada bes ku mi papia, mi ta grita duru; mi ta proklama violensia i destrukshon, pasobra a resulta ku e palabra di SENOR a bira un reproche i bofon pa mi henter dia.

⁹Ma si mi bisa: "Lo mi no korda riba djé, ni papia mas den Su nomber," e ora ei esei ta bira manera kandela den mi kurason, sera den mi wesunan; mi ta kansa di ten'e paden, i mi no por mas.

¹⁰Pasobra mi a tende hopi hende ta papia kuchikuchi ku otro: "Teror na tur banda! Denunsi'e; si, laga nos denunsi'e!" Tur mi amigunan ku mi ta konfia ta spera di mirami kai, i ta bisa: "Kisas e por wordu gana, asina ku nos por prevalese kontra dje, i tuma nos vengansa riba dje."

¹¹Ma SENOR ta ku mi manera un guerero poderoso; pesei esnan ku ta persiguimi lo trompeka i nan lo no prevalese. Nan lo keda masha brongosa, pasobra nan a faya. Nan berguensa eterno hamas lo wordu lubida.

¹²Tog, O SENOR di ehersitonan, Abo ku ta pone e hustunan na prueba, ku ta mira mente i kurason, lagami mira Bo vengansa riba nan, pasobra na Bo mi a presenta mi kaso.

¹³Kanta na SENOR; alaba SENOR, pasobra El a libra alma di esun den nesesidat for di man di hasidonan di maldat.

¹⁴Maldishona sea e dia ku mi a nase; no laga e dia ku mi mama a hanami ta bendishona!

¹⁵Maldishona sea e homber ku a trese e notisia pa mi tata, bisando: "Bo a bira tata di un yu homber", loke a hasie masha kontentu.

¹⁶Laga e homber ei ta manera e statnan ku SENOR a destrui sin repenti, i lagu'e tende gritu mainta i gritu di alarma merdia;

¹⁷pasobra e no a matami prome ku mi a nase, asina ku mi mama lo tabata mi graf, i su matris pa semper na estado.

¹⁸Pakiko anto mi a sali for di matris pa mira trobel i tristesa, asina ku mi dianan lo a kaba na berguensa?