Read Papantla Totonac Jeremias 21 Bible Online

Jeremias 21 - Papantla Totonac bible

Jeremias 21

¹E palabra di SENOR ku a yega na Jeremias, tempu ku rei Sedekias a manda Pasur, yu homber di Malakias, i saserdote Sofonias, yu homber di Maaseias, serka dje, bisando:

²"Pa fabor, konsulta ku SENOR pa nos, pasobra Nabukodonosor, rei di Babilonia, ta bringa kontra nos. Kisas SENOR lo trata ku nos segun tur Su obranan maraviyoso, asina ku e enemigu lo retira for di nos."

³Anto Jeremias a kontesta nan: "Bisa Sedekias asin'aki:

⁴'Asina e SENOR Dios di Israel ta bisa: "Mira, Mi ta bai bira bek riba boso e mesun armanan di guera ei ku boso tin den boso man, ku kualnan boso ta bringa kontra rei di Babilonia i e kaldeonan, kendenan ta rondona boso pafo di e muraya; i lo Mi reuni nan meimei di e stat aki.

⁵I Ami mes lo bringa kontra boso ku un man ekstendi i ku un brasa poderoso, si, ku rabia, furia i gran indignashon.

⁶Tambe lo Mi dal e habitantenan di e stat aki mata, tantu hende komo bestia. Nan lo muri pa kousa di un pest pisa.

⁷Despues di esaki," SENOR ta deklara, "lo Mi entrega Sedekias, rei di Juda, su sirbidonan i e pueblo, si, esnan den e stat aki ku sobrebibi di pest, spada i hamber, den man di Nabukodonosor, rei di Babilonia, den man di nan enemigunan i den man di esnan ku ta buska nan pa mata. I e, Nabukodonosor, lo dal nan mata ku filo di spada. E lo no spar nan, ni tene duele ni kompashon di nan."'

⁸"Tambe bisa e pueblo aki: 'Asina SENOR ta bisa: "Mira, Mi ta pone bo dilanti e kaminda di bida i e kaminda di morto.

⁹Esun ku keda den e stat aki lo muri pa medio di spada, hamber i pest; ma esun ku sali i entrega su mes na e kaldeonan ku ta ataka boso lo biba, i e lo tin su mes bida komo botin.

¹⁰Pasobra Mi a pone Mi kara kontra e stat aki, pa malu i no pa bon," SENOR ta deklara. "E lo wordu entrega den man di rei di Babilonia, kende lo kim'e ku kandela."'

¹¹"Anto bisa e kas di rei di Juda: 'Skucha e palabra di SENOR,

¹²O kas di David, asina SENOR ta bisa: "Atministra hustisia tur mainta; i libra for di man di su opresor esun ku a wordu roba, pa Mi furia no sali manera kandela i kima sin ningun hende pa pagu'e, pa motibu di e maldat di nan echonan.

¹³Mira, Mi ta kontra bo, abo ku ta biba den vaye, O baranka den sabana," SENOR ta deklara, "boso, hombernan ku ta puntra: 'Ken lo sali kontra nos? Of ken lo drenta nos luganan di biba?'

¹⁴Ma lo Mi kastiga boso segun e fruta di boso echonan," SENOR ta deklara, "i lo Mi sende un kandela den su mondi-sera, pa devora tur loke ta ront di dje.