Read Papantla Totonac Jeremias 22 Bible Online

Jeremias 22 - Papantla Totonac bible

Jeremias 22

¹Asina SENOR ta bisa: "Bai na e kas di rei di Juda i hiba e palabra aki,

²i bisa: 'Skucha e palabra di SENOR, O rei di Juda, abo ku ta sinta riba e trono di David, abo, bo sirbidonan i bo pueblo ku ta drenta pa e portanan aki:

³asina SENOR ta bisa: "Hasi huisio i hustisia i libra for di man di su opresor esun ku a wordu roba. Tambe no maltrata ni uza violensia kontra e stranhero, e werfano of e biuda. I no drama sanger inosente den e luga aki.

⁴Pasobra si boso perkura di kumpli ku e mandamentunan aki, e ora ei reinan ku ta sinta riba David su trono lo drenta dor di e portanan di e palasio aki, koriendo den garoshi i riba kabai, akompana pa nan ofisialnan i nan pueblo.

⁵Ma si boso no kier obedese e mandamentunan aki, Mi ta hura pa Mi mes," SENOR ta deklara, "ku e kas aki lo bira un desolashon.

⁶Pasobra asina SENOR ta bisa tokante di e kas di rei di Juda: "Bo ta manera Galaad pa Mi, manera e punta di seru di Libano; tog ta sigur ku lo Mi hasibo manera un desierto, manera statnan ku no ta habita.

⁷Pasobra lo Mi manda destruidonan kontra bo, kada un ku su armanan; i nan lo kap bo miho palunan di seda i tira nan den kandela.

⁸"I hopi nashon lo pasa banda di e stat aki; i nan lo puntra otro: 'Pakiko SENOR a hasi asina ku e gran stat aki?'

⁹E ora ei nan lo kontesta: 'Pasobra nan a bandona e aliansa di SENOR nan Dios, i a buig te na suela pa otro diosnan i a sirbi nan.'"

¹⁰No yora esun ku a muri, ni lamenta p'e; mas bien yora amargamente pa esun ku ta bai, pasobra nunka mas e lo bolbe, ni mira su pais natal.

¹¹Pasobra asina SENOR ta bisa tokante di Salum, yu homber di Josias, rei di Juda, kende a bira rei na luga di su tata Josias, kende a sali for di e luga aki: "Nunka mas e lo bolbe ei,

¹²ma kaminda ku nan a hib'e komo katibu, einan e lo muri; i e lo no mira e tera aki mas.

¹³"Ai di esun ku ta traha su kas ku inhustisia i su salanan ariba, ku mala fe, ku no ta paga pa e trabou ku su prohimo ta hasi p'e, i no ta dun'e su sueldo,

¹⁴ku ta bisa: 'Mi ta bai traha un kas grandi pa mi mes, ku salanan ariba ku hopi espasio; i ta traha su bentananan, i ta fur'e ku palu di seda, anto ta ferf e kora-kora.'

¹⁵Bo ta bira rei pasobra bo ta kompeti den palu di seda? Bo tata no a kome i bebe, i hasi huisio i hustisia? E tempu ei kos tabata bai bon p'e.

¹⁶El a sali na defensa di esnan afligi i den nesesidat; e tempu ei kos tabata bai bon. No ta esei kier men konoseMi?" SENOR ta deklara.

¹⁷"Ma bo wowo i bo kurason ta fiha solamente riba ganashi inhustu pa bo mes, i riba dramamentu di sanger inosente, i riba opreshon i violensia."

¹⁸Pesei, asina SENOR ta bisa tokante di Joakim, yu homber di Josias, rei di Juda: "Nan lo no yor'e, bisando: 'Ai mi ruman homber!' of, 'Ai mi ruman muhe!' Nan lo no lamenta p'e asina: 'Ai mi shon!' of, 'Ai su mahestat!'

¹⁹E lo wordu dera, manera ta dera buriku, lastra i benta pafo di e portanan di Jerusalem.

²⁰"Bai Libano i grita duru, i halsa bo bos na Basan; grita duru tambe for di Abarim, pasobra tur bo amantenan a wordu plecha.

²¹Mi a papia ku bo den e tempu di bo prosperidat, ma bo a bisa: 'Mi no kier tende!' Esei tabata bo kustumber for di bo hubentut, ku bo no tabata obedese Mi bos.

²²Bientu lo supla tur bo wardadonan di karne bai kune, i bo amantenan lo bai den koutiverio; e ora ei si lo bo keda brongosa i umiya pa motibu di tur bo maldat.

²³Abo ku ta biba na Libano, ku bo neishi den palu di seda, mira kon lo bo keha ora dolo bin riba bo, dolo manera dolo di un muhe na ora di parto!

²⁴"Manera Mi ta biba," SENOR ta deklara, "maske Konias, yu homber di Joakim, rei di Juda, tabata un renchi di seyo na Mi man drechi, tog lo Mi a rankabo kitabo afo.

²⁵I lo Mi entregabo den man di esnan ku ta buskabo pa mata, si, den man di esnan ku bo ta teme, asta den man di Nabukodonosor, rei di Babilonia, i den man di e kaldeonan.

²⁶Lo Mi zwai abo i bo mama ku a hanabo benta den un otro pais kaminda bo no a nase; i ei lo bo muri.

²⁷Ma na e tera ku nan ta anhela pa bolbe, nan lo no bolbe.

²⁸"Ta un butishi despresia i kibra e homber Konias aki ta? Of e ta un pochi ku no ta sirbi pa nada? Pakiko e ku su desendientenan a wordu gezwai i benta den un pais ku nan no tabata konose?

²⁹O tera, tera, tera, skucha e palabra di SENOR!

³⁰Asina SENOR ta bisa: 'Registra e homber aki komo un homber sin yu, un homber ku lo no prospera den su dianan; pasobra ningun di su desendientenan lo logra sinta riba trono di David of goberna atrobe na Juda.'"