Read Papantla Totonac Jeremias 23 Bible Online

Jeremias 23 - Papantla Totonac bible

Jeremias 23

¹"Ai di e wardadonan ku ta destrui i ta plama e karnenan ku Mi ta pastoria!" SENOR ta deklara.

²Pesei, asina e SENOR Dios di Israel ta bisa tokante di e wardadonan ku ta kuida Mi pueblo: "Boso a plama Mi tou i a kore ku nan i no a perkura pa nan. Mira, lo Mi trata ku boso pa e maldat di boso echonan," SENOR ta deklara.

³"Anto Ami mes lo reuni e restante di Mi tou for di tur e paisnan kaminda Mi a kore ku nan manda nan bai, i trese nan bek na nan luga di yerba berde; i nan lo ta fruktifero i lo multiplika.

⁴Tambe lo Mi pone wardadonan riba nan i nan lo kuida nan. Nan lo no tin miedu ni spantu mas, i lo no falta ni un," SENOR ta deklara.

⁵"Ata, e dianan ta bin," SENOR ta deklara, "ku lo Mi lanta un Rama hustu pa David. I E lo reina komo rei i aktua ku sabiduria, i hasi huisio i hustisia den e tera.

⁶Den Su dianan Juda lo wordu salba, i Israel lo biba den siguridat; i esaki ta e nomber ku E lo karga: 'SENOR nos hustisia.'

⁷"Pesei, ata, e dianan ta bin," SENOR ta deklara, "ku nan lo no bisa mas: 'Manera SENOR ta biba, Kende a saka e yunan di Israel for di tera di Egipto,'

⁸sino: 'Manera SENOR ta biba, Kende a saka e desendientenan di e kas di Israel afo, i a trese nan bek for di e tera di nort i for di tur e paisnan kaminda Mi a kore ku nan manda nan bai.' E ora ei nan lo biba den nan mes tera."

⁹Pa loke ta e profetanan: Mi kurason ta kibra den mi i tur mi wesunan ta tembla; mi a bira manera un homber burachi, manera un homber ku bina a subi na su kabes, pa motibu di SENOR i pa motibu di Su palabranan santu.

¹⁰Pasobra e tera ta yen di adulteronan; i e tera ta lamenta pa motibu di maldishon. E luganan di yerba berde den desierto a seka. Tambe e rumbo ku nan ta sigui ta malu, i nan ta hasi mal uzo di nan poder.

¹¹"Pasobra tantu profeta komo saserdote ta profano; asta den Mi kas Mi a hana nan maldat," SENOR ta deklara.

¹²"Pesei nan kaminda lo ta pa nan manera kaminda ku ta slep, nan lo wordu manda den skuridat i aya nan lo kai; pasobra lo Mi trese kalamidat riba nan, e ana di nan kastigu," SENOR ta deklara.

¹³"Ademas, entre e profetanan di Samaria Mi a mira algu ofensivo: nan a profetisa den e nomber di Baal i a hasi Mi pueblo Israel desvia.

¹⁴Tambe entre e profetanan di Jerusalem Mi a mira algu horibel: nan ta komete adulterio i ta hiba un bida di engano; i nan ta fortalese man di hasidonan di maldat, di manera ku ningun hende no a bandona su maldat. Pa Mi nan tur a bira manera Sodoma, i su habitantenan manera Gomora.

¹⁵"Pesei, asina e SENOR di ehersitonan ta bisa tokante di e profetanan: 'Mira, Mi ta bai alimenta nan ku apsintus i duna nan awa venenoso pa bebe, pasobra for di e profetanan di Jerusalem sakrilegio a plama den henter e tera.'"

¹⁶Asina e SENOR di ehersitonan ta bisa: "No skucha palabranan di e profetanan ku ta profetisa na boso. Nan ta yena boso ku speransa falsu; nan ta konta vishon di nan mes imaginashon, no for di e boka di SENOR.

¹⁷Ketu bai nan ta bisa esnan ku ta despresiaMi: 'SENOR a bisa: "Boso lo tin pas"'; i na kada un ku ta kana segun e kapricho di su mes kurason, nan ta bisa: 'Kalamidat lo no bin riba boso.'

¹⁸Ma ta ken a para den e konseho di SENOR, ku e lo por a kapta i skucha Su palabra? Ta ken a paga tino na Su palabra i a skucha?

¹⁹Mira, e tempestat di SENOR a sali ku furia, si, un warwaru violento; e lo lora bin abou riba kabes di e malbadonan.

²⁰E rabia di SENOR lo no kita te ora ku E kumpli kompletamente ku e propositonan di Su kurason. Den e ultimo dianan boso lo komprende esaki bon kla.

²¹Mi no a manda e profetanan aki, tog nan a kore; Mi no a papia ku nan, tog nan a profetisa.

²²Ma si nan a para den Mi konseho, nan lo a anunsia Mi palabranan na Mi pueblo, i lo a hasi nan bira for di nan mal kaminda i for di e maldat di nan echonan.

²³"Ami ta un Dios ku ta serka," SENOR ta deklara, "i no un Dios ku ta leu tambe?

²⁴Un hende por skonde den luganan sekreto, asina ku Mi no por mir'e?" SENOR ta deklara. "No ta Ami ta yena shelu i tera?" SENOR ta deklara.

²⁵"Mi a tende loke e profetanan a bisa, ku ta profetisa mentira den Mi nomber, bisando: 'Mi tabatin un sono! Mi tabatin un sono!'

²⁶Kuantu tempu mas esaki lo keda den kurason di e profetanan ku ta profetisa mentira? Si, nan ta profetanan di e engano di nan mes kurason,

²⁷ku ta kere ku nan por hasi Mi pueblo lubida Mi nomber dor di nan sononan ku nan ta konta otro, meskos ku nan tatanan a lubida Mi nomber pa motibu di Baal.

²⁸E profeta ku tin un sono, lagu'e konta su sono, ma laga esun ku tin Mi palabra papia Mi palabra korektamente. Kiko yerba seku tin di hasi ku mainshi?" SENOR ta deklara.

²⁹"Mi palabra no ta manera kandela?" SENOR ta deklara, "i manera un martiu ku ta kibra baranka na pida-pida?

³⁰"Pesei mira, Mi ta kontra e profetanan," SENOR ta deklara, "ku ta horta Mi palabranan for di otro.

³¹Mira, Mi ta kontra e profetanan," SENOR ta deklara, "ku ta uza nan lenga pa bisa: 'SENOR ta deklara.'

³²Mira, Mi ta kontra esnan ku a profetisa sononan falsu," SENOR ta deklara, "i ku a konta nan, i a desvia Mi pueblo ku nan mentiranan i gabamentu iresponsabel. Ami no a manda nan, ni a duna nan ordu; pesei nan lo no ta di ningun probecho pa e pueblo aki," SENOR ta deklara.

³³"Awor ora ku e pueblo aki of e profeta of un saserdote puntrabo, bisando: 'Kiko ta e profesia di SENOR?' e ora ei bo mester kontesta nan: 'Kual profesia?' SENOR ta deklara: 'Lo Mi bandonabo.'

³⁴Pa loke ta e profeta, e saserdote of e pueblo ku bisa: 'E profesia di SENOR,' riba e homber ei i su kas lo Mi manda kastigu.

³⁵Asina kada un di boso mester puntra su prohimo i su ruman: 'Kiko SENOR a kontesta?' of, 'Kiko SENOR a bisa?'

³⁶Pasobra boso lo no korda e profesia di SENOR mas, komo ku kada hende su mes palabra lo bira e profesia, i boso a trose e palabranan di e Dios bibu, e SENOR di ehersitonan, nos Dios.

³⁷Asina lo bo puntra e profeta: 'Kiko SENOR a kontestabo?' i, 'Kiko SENOR a bisa?'

³⁸Pasobra si boso bisa: 'E profesia di SENOR!' siguramente asina SENOR ta bisa: 'Pasobra boso a bisa e palabra aki: "E profesia di SENOR!" Ami a manda bisa boso: "No bisa: 'E profesia di SENOR!'"'

³⁹Pesei mira, lo Mi lubida boso sigur i tira boso for di Mi presensia, huntu ku e stat ku Mi a duna boso i boso tatanan.

⁴⁰I lo Mi pone riba boso un reproche eterno i un umiyashon perpetuo, ku lo no wordu lubida."