Read Papantla Totonac Jeremias 24 Bible Online

Jeremias 24 - Papantla Totonac bible

Jeremias 24

¹Despues ku Nabukodonosor, rei di Babilonia, a kohe komo katibu Jekonias, yu homber di Joakim, rei di Juda, i e ofisialnan di Juda, huntu ku e hombernan di ofishi i smetnan, for di Jerusalem, i a hiba nan Babilonia, SENOR a mustrami dos makutu di figo poni dilanti di e tempel di SENOR!

²Den esun makutu tabatin figo masha bon mes, meskos ku figo ku ta e promenan ku ta hecha; i den e otro makutu tabatin figo masha malu mes, asina malu ku no por a kome nan.

³E ora ei SENOR a puntrami: "Jeremias, kiko bo ta mira?" I mi a kontesta: "Figo, e bon figonan ta masha bon mes, ma e mal figonan ta masha malu mes, asina malu ku no por kome nan."

⁴Anto e palabra di SENOR a yega na mi, bisando:

⁵"Asina SENOR, e Dios di Israel, ta bisa: 'Manera e bon figonan aki, asina bon lo Mi konsidera e prezonan di Juda ku Mi a saka for di e luga aki manda na e tera di e kaldeonan.

⁶Pasobra Mi bista lo ta fiha riba nan pa bon, i lo Mi trese nan atrobe na e tera aki; i lo Mi edifika nan i no destrui nan, i lo Mi planta nan i no ranka nan.

⁷Lo Mi duna nan un kurason pa konoseMi, pasobra Ami ta SENOR; i nan lo ta Mi pueblo, i Ami lo ta nan Dios, pasobra nan lo bolbe serka Mi ku henter nan kurason.

⁸'Ma meskos ku e figonan malu, asina malu ku no por kome nan--pasobra t'asina SENOR ta bisa--asina lo Mi bandona Sedekias, rei di Juda, su ofisialnan i e restante di Jerusalem ku ta keda na e tera aki, i esnan ku ta biba na tera di Egipto.

⁹I lo Mi hasi nan un teror i algu malu pa tur e reinonan di mundu, manera un reproche i un proverbio, un insulto i un maldishon tur kaminda ku Mi ta bai plama nan.

¹⁰I lo Mi manda spada, hamber i pest riba nan te ora ku nan keda destrui for di riba e tera ku Mi a duna nan i nan antepasadonan.'"