Read Papantla Totonac Jeremias 25 Bible Online

Jeremias 25 - Papantla Totonac bible

Jeremias 25

¹E palabra ku a yega na Jeremias tokante di henter e pueblo di Juda, den e di kuater ana di Joakim, yu homber di Josias, rei di Juda, esta, e prome ana di Nabukodonosor, rei di Babilonia,

²ku profeta Jeremias a papia ku henter e pueblo di Juda i ku tur habitante di Jerusalem, bisando:

³"For di e di diestres ana di Josias, yu homber di Amon, rei di Juda, te dia djawe, den e bint'i tres ananan aki e palabra di SENOR a yega na mi, i bes tras bes mi a papia ku boso, ma boso no a skucha.

⁴"I SENOR a manda tur Su sirbidonan, e profetanan, serka boso bes tras bes, ma boso no a tende, ni a inklina boso orea pa skucha.

⁵Nan a bisa: 'Kada un bira awor for di su mal kaminda i for di e maldat di su echonan, i biba na e tera ku SENOR a duna boso i boso antepasadonan pa semper i semper;

⁶i no sigui tras di otro diosnan pa sirbi nan ni pa adora nan, i no probokaMi na rabia ku e obra di boso mannan, i lo Mi no hasi boso dano.'

⁷"Tog boso no a tende na Mi," SENOR ta deklara, "pa boso por a probokaMi na rabia ku e obra di boso mannan, i asina hasi dano na boso mes.

⁸"Pesei, asina e SENOR di ehersitonan ta bisa: 'Pasobra boso no a obedese Mi palabranan,

⁹mira, lo Mi manda buska tur e famianan di nort,' SENOR ta deklara, 'i lo Mi manda buska Mi sirbido Nabukodonosor, rei di Babilonia, i trese nan kontra e tera aki i kontra su habitantenan, i kontra tur e nashonnan aki tur ront. Lo Mi destrui nan kompletamente, i hasi nan un horor, un bofon i un desolashon pa semper.

¹⁰Ademas, lo Mi kita for di nan e bos di goso i e bos di alegria, e bos di bruidehom i e bos di bruit, e zonidu di piedranan di mula i e klaridat di lampi.

¹¹I henter e tera aki lo keda un desolashon i un horor, i e nashonnan aki lo sirbi rei di Babilonia pa setenta ana.

¹²'Anto lo sosode ku ora setenta ana a keda kumpli, lo Mi kastiga rei di Babilonia i e nashon ei,' SENOR ta deklara, 'pa nan inikidat, i pa e tera di e kaldeonan; i lo Mi hasie un desolashon eterno.

¹³Lo Mi trese riba e tera ei tur Mi palabranan ku Mi a pronunsia kontra dje, tur ku ta para skirbi den e buki aki, ku Jeremias a profetisa kontra tur e nashonnan.

¹⁴Pasobra hopi nashon i gran reinan lo hasi nan bira nan esklabu. I Ami lo rekompensa nan segun nan echonan i segun e obra di nan mannan.'"

¹⁵Pasobra asina e SENOR Dios di Israel ta bisami: "Tuma e kopa aki di e bina di furia for di Mi man, i duna tur e nashonnan serka kendenan Mi ta mandabo, pa nan beb'e.

¹⁶I nan lo bebe i zeilu i perde sinti pa motibu di e spada ku lo Mi manda meimei di nan."

¹⁷E ora ei mi a tuma e kopa for di e man di SENOR i a duna tur e nashonnan bebe, esnan ku SENOR a mandami serka nan:

¹⁸Jerusalem i e statnan di Juda, nan reinan i prensnan, pa hasi nan un ruina, un horor, un bofon i un maldishon, manera ta te dia djawe;

¹⁹F arao, rei di Egipto, su sirbidonan, su prensnan i henter su pueblo;

²⁰i tur e pueblonan stranhero, tur e reinan di tera di Uz, tur e reinan di e tera di e filisteonan, esta, Askalon, Gaza, Ekron i e restante di Asdod;

²¹Edom, Moab i e yu hombernan di Amon;

²²tur e reinan di Tiro, tur e reinan di Sidon i e reinan di e teranan na kosta na e otro banda di laman;

²³Dedan, Tema, Buz, i tur ku ta pela e kabei na banda di nan kabes;

²⁴tur e reinan di Arabia i tur e reinan di e pueblonan stranhero ku ta biba den desierto;

²⁵tur e reinan di Zimri, tur e reinan di Elam i tur e reinan di Media;

²⁶tur e reinan di nort, serka i leu, un tras di otro; tur e reinonan di mundu ku ta riba superfisio di tera. I rei di Sesak lo bebe despues di nan.

²⁷"I lo bo bisa nan: 'Asina e SENOR di ehersitonan, e Dios di Israel, ta bisa: "Bebe, bira burachi, saka, kai abou i no lanta mas, pa motibu di e spada ku lo Mi manda meimei di boso."'

²⁸I lo sosode ku si nan nenga di tuma e kopa for di bo man pa bebe, e ora ei lo bo bisa nan: 'Asina e SENOR di ehersitonan ta bisa: "Boso mester beb'e!

²⁹Pasobra mira, Mi ta kuminsa trese kalamidat den e stat aki ku ta wordu yama na Mi nomber, anto boso lo keda kompletamente liber di kastigu? Boso lo no keda liber di kastigu, pasobra Mi ta yama un spada pa bai kontra tur habitante di tera," e SENOR di ehersitonan ta deklara.'

³⁰"Pesei profetisa tur e palabranan aki kontra nan i bisa nan: 'SENOR lo brama for di haltura, i halsa Su bos for di Su habitashon santu; E lo brama fuertemente kontra Su tou. E lo grita manera esnan ku ta trapa wendruif, kontra tur e habitantenan di tera.

³¹Un klamor a yega te na fin di mundu, pasobra SENOR tin un kaso kontra e nashonnan. E ta drenta den huisio ku tur karni; pa loke ta e malbadonan, El a entrega nan na spada,'" SENOR ta deklara.

³²Asina e SENOR di ehersitonan ta bisa: "Ata, maldat ta bai di nashon pa nashon, i un gran tempestat lo wordu lanta for di e partinan mas aleha di mundu.

³³I esnan ku SENOR mata riba e dia ei lo keda benta tur kaminda, for di esun ekstremo di mundu te na e otro. Hende lo no lamenta pa nan ni rekohe nan, ni dera nan; nan lo ta manera mest riba superfisio di tera.

³⁴"Boso, wardadonan, lamenta i sklama; lora abou den shinishi, boso, wardadonan di e tou; pasobra e dianan di boso matansa i plamamentu a yega, i boso lo kai manera un ko'i kibra kostoso.

³⁵E wardadonan lo no tin manera pa hui, i e lidernan di e tou lo no skapa.

³⁶Skucha e zonidu di yoramentu di e wardadonan i e sklamashon di e lidernan di e tou! Pasobra SENOR a destrui nan luga di yerba berde.

³⁷E kuranan trankil di e karnenan a keda destrui pa motibu di e rabia ardiente di SENOR.

³⁸Manera leon El a sali for di Su luga di skonde; pasobra nan tera a bira un horor, pa motibu di e krueldat di e spada violento, i pa motibu di Su rabia ardiente."