Read Papantla Totonac Jeremias 26 Bible Online

Jeremias 26 - Papantla Totonac bible

Jeremias 26

¹Na kuminsamentu di e reinado di Joakim, yu homber di Josias, rei di Juda, e palabra aki a bin for di SENOR, bisando:

²"Asina SENOR ta bisa: 'Para riba plenchi di e kas di SENOR, i papia ku tur e statnan di Juda, ku a bin pa adora den e kas di SENOR, tur e palabranan ku Mi a mandabo papia ku nan. No laga ni un palabra afo!

³Kisas nan lo skucha i tur lo bira for di nan mal kaminda, pa Mi por repenti di e kalamidat ku Mi tin plania pa nan, pa motibu di e maldat di nan echonan!'

⁴I bisa nan: 'Asina SENOR ta bisa: "Si boso no kier tende na Mi, pa kana den Mi lei ku Mi a pone boso dilanti,

⁵pa skucha na e palabranan di Mi sirbidonan, e profetanan ku Mi a manda serka boso bes tras bes sin ku boso a skucha,

⁶e ora ei lo Mi hasi e kas aki manera Silo, i e stat aki lo Mi hasi un maldishon pa tur e nashonnan di tera.

⁷I e saserdotenan i e profetanan i henter e pueblo a tende Jeremias papia e palabranan aki den e kas di SENOR.

⁸Ora Jeremias a kaba di bisa tur hende tur loke SENOR a mand'e papia, e saserdotenan, e profetanan i henter e pueblo a gar'e, bisando: "Bo mester muri!

⁹Pakiko bo a profetisa den e nomber di SENOR, bisando: 'E kas aki lo ta manera Silo i e stat aki lo keda desola, sin habitante'?" I henter e pueblo a reuni ront di Jeremias den e kas di SENOR.

¹⁰Ora ku e prensnan di Juda a tende e kosnan aki, nan a sali for di e kas di rei bai na e kas di SENOR, i a kai sinta na e entrada di Porta Nobo di e kas di SENOR.

¹¹Anto e saserdotenan i e profetanan a papia ku e ofisialnan i ku henter e pueblo, bisando: "Sentensia e homber aki na morto, pasobra el a profetisa kontra e stat aki, manera boso mes a tende."

¹²E ora ei Jeremias a papia ku tur e ofisialnan i ku henter e pueblo, bisando: "SENOR a mandami profetisa kontra e kas aki i kontra e stat aki tur e palabranan ku boso a tende.

¹³Pesei, koregi boso kondukta i boso echonan awor, i obedese e bos di SENOR boso Dios; i SENOR lo repenti enkuanto e kalamidat ku El a pronunsia kontra boso.

¹⁴Ma pa loke t'ami, mira, mi ta den boso man; hasi ku mi manera ta bon i korekto den boso bista.

¹⁵Ma sea sigur ku si boso matami, boso lo hasi boso mes, e stat aki i su habitantenan kulpabel di sanger inosente; pasobra di berdat, ta SENOR a mandami serka boso pa papia tur e palabranan aki pa boso tende."

¹⁶E ora ei e ofisialnan i henter e pueblo a bisa e saserdotenan i e profetanan: "No sentensia e homber aki na morto, pasobra el a papia ku nos den e nomber di SENOR nos Dios."

¹⁷Anto algun di e ansianonan di e tera a lanta i a papia ku henter e pueblo ku tabata reuni, bisando:

¹⁸"Mikeas di Moreset a profetisa den e dianan di Ezekias, rei di Juda; i el a papia ku henter e pueblo di Juda, bisando: 'Asina e SENOR di ehersitonan a bisa: "Nan lo plug Sion manera ta plug kunuku, Jerusalem lo bira montonnan di ruina, i e seru di e tempel manera e luganan haltu di e mondi-sera."'

¹⁹Akaso ta Ezekias, rei di Juda, i henter Juda a laga mat'e? No t'asina ku el a teme SENOR i a pidi fabor di SENOR, anto SENOR a repenti di e kalamidat ku El a pronunsia kontra nan? Ma nos ta komete un gran maldat kontra nos mes."

²⁰I tabatin un homber tambe, kende a profetisa den e nomber di SENOR, Urias, yu homber di Semaias di Kiriat-jearim; i el a profetisa kontra e stat aki i kontra e tera aki palabranan similar na tur esnan di Jeremias.

²¹Ora rei Joakim i tur su hombernan poderoso i tur e ofisialnan a tende su palabranan, rei a busk'e pa mata; ma Urias a tende di esei, a hana miedu i a hui bai Egipto.

²²E ora ei rei Joakim a manda algun homber Egipto: Elnatan, yu homber di Akbor, i algun homber mas a bai Egipto huntu kune.

²³I nan a trese Urias for di Egipto i a hib'e serka rei Joakim, kende a laga mat'e ku spada i a tira su kadaver den e santana di pueblo.

²⁴Ma Ahikam, yu homber di Safan, a proteha Jeremias, asina ku nan no a entregu'e den man di pueblo pa mat'e.