Read Papantla Totonac Jeremias 28 Bible Online

Jeremias 28 - Papantla Totonac bible

Jeremias 28

¹Awor a sosode den e mesun ana ei, na kuminsamentu di e reinado di Sedekias, rei di Juda, den e di kuater ana, den e di sinku luna, ku Hananias, yu homber di Azur, profeta di Gabaon, a papia ku mi den e kas di SENOR, den presensia di e saserdotenan i henter e pueblo, bisando:

²"Asina e SENOR di ehersitonan, e Dios di Israel, ta bisa: 'Mi a kibra e yugo di rei di Babilonia.

³Denter di dos ana lo Mi trese bek na e luga aki tur e artikulonan-di-uzo di e kas di SENOR ku Nabukodonosor, rei di Babilonia, a kohe for di e luga aki, hiba Babilonia.

⁴Tambe Mi ta bai trese Jekonias, yu homber di Joakim, rei di Juda, bek na e luga aki, i tur e eksiliadonan di Juda ku a bai Babilonia,' SENOR ta deklara, 'pasobra lo Mi kibra e yugo di rei di Babilonia.'"

⁵Anto profeta Jeremias a papia ku profeta Hananias den presensia di e saserdotenan i den presensia di henter e pueblo ku tabata para den e kas di SENOR.

⁶I profeta Jeremias a bisa: "Amen! Ku SENOR hasi asina. Ku SENOR konfirma bo palabranan ku bo a profetisa dor di trese e artikulonan-di-uzo di e kas di SENOR i tur e eksiliadonan for di Babilonia bek na e luga aki.

⁷Sinembargo, skucha awor e palabra aki ku mi ta bai papia pa abo i pa henter e pueblo tende!

⁸Desde tempunan pasa e profetanan ku tabata prome ku mi i prome ku bo tabata profetisa guera, kalamidat i pest kontra hopi tera i kontra reinonan grandi.

⁹Pa loke ta e profeta ku ta profetisa pas, ora ku e palabra di e profeta wordu kumpli, e profeta ei lo wordu rekonosi komo un ku SENOR a manda di berdat."

¹⁰Anto profeta Hananias a kita e yugo for di nek di profeta Jeremias i a kibr'e.

¹¹I Hananias a papia den presensia di henter e pueblo, bisando: "Asina SENOR ta bisa: 'Asina tambe lo Mi kibra e yugo di Nabukodonosor, rei di Babilonia, for di nek di tur e nashonnan, denter di dos ana.'" E ora ei profeta Jeremias a sigui su kaminda.

¹²Despues ku profeta Hananias a kibra e yugo for di nek di profeta Jeremias, e palabra di SENOR a yega na Jeremias, bisando:

¹³"Bai i papia ku Hananias, bisando: 'Asina SENOR ta bisa: "Bo a kibra e yugonan di palu, ma na nan luga bo a traha yugonan di heru."

¹⁴Pasobra asina e SENOR di ehersitonan, e Dios di Israel, ta bisa: "Mi a pone un yugo di heru riba nek di tur e nashonnan aki pa nan sirbi Nabukodonosor, rei di Babilonia; i nan lo sirbie. Tambe Mi a dun'e e bestianan di mondi.

¹⁵E ora ei profeta Jeremias a bisa profeta Hananias: "Skucha awor, Hananias, SENOR no a mandabo. I abo a hasi e pueblo aki konfia den mentira.

¹⁶Pesei, asina SENOR ta bisa: 'Mira, lo Mi kitabo for di superfisio di tera. E ana aki bo ta bai muri, pasobra bo a sina e pueblo rebeldia kontra SENOR.'"

¹⁷Asina den e mesun ana, den e di shete luna, profeta Hananias a muri.