Read Papantla Totonac Jeremias 29 Bible Online

Jeremias 29 - Papantla Totonac bible

Jeremias 29

¹Awor esakinan ta e palabranan di e karta ku profeta Jeremias a manda for di Jerusalem pa e ansianonan ku a keda entre e eksiliadonan, e saserdotenan, e profetanan i henter e pueblo ku Nabukodonosor a hiba den eksilio for di Jerusalem pa Babilonia.

²Esaki tabata despues ku rei Jekonias i e reina mama, e ofisialnan di korte, e prensnan di Juda i Jerusalem, e hombernan di ofishi i e smetnan a sali for di Jerusalem.

³E karta a wordu manda ku Elasa, yu homber di Safan, i Gemarias, yu homber di Hilkias, kendenan Sedekias, rei di Juda, a manda Babilonia pa Nabukodonosor, rei di Babilonia. E karta tabata bisa:

⁴"Asina e SENOR di ehersitonan, e Dios di Israel, ta bisa tur e eksiliadonan ku Mi a manda den eksilio for di Jerusalem pa Babilonia:

⁵'Traha kas i biba aden; planta hofi i kome loke nan ta produsi.

⁶Kasa i engendra yu homber i yu muhe; i buska esposanan pa boso yu hombernan i duna boso yu muhenan na esposonan, pa nan hana yu homber i yu muhe, i multiplika ayanan i no mengua.

⁷Buska pas pa e stat kaminda Mi a manda boso den eksilio, i pidi SENOR p'e, pasobra den su pas boso lo tin pas.'

⁸Pasobra asina e SENOR di ehersitonan, e Dios di Israel, ta bisa: 'No laga boso profetanan ku ta meimei di boso i boso adivinadonan gana boso, i no skucha e sononan ku nan ta sona.

⁹Pasobra nan ta profetisa mentira na boso den Mi nomber. Mi no a manda nan,' SENOR ta deklara.

¹⁰"Pasobra asina SENOR ta bisa: 'Despues ku setenta ana wordu kumpli pa Babilonia, lo Mi bishita boso i kumpli ku Mi bon palabra pa ku boso, pa trese boso bek na e luga aki.

¹¹Pasobra Mi sa e plannan ku Mi tin pa boso,' SENOR ta deklara, 'plannan pa pas i no pa kalamidat, pa duna boso un futuro i un speransa.

¹²Anto boso lo sklama na Mi i bin hasi orashon na Mi, i lo Mi skucha boso.

¹³I boso lo buskaMi i hanaMi, ora boso buskaMi ku henter boso kurason.

¹⁴I lo Mi laga boso hanaMi,' SENOR ta deklara, 'i lo Mi trese boso bek for di koutiverio, i lo Mi rekohe boso for di tur e nashonnan i for di tur e luganan kaminda Mi a kore ku boso manda boso bai,' SENOR ta deklara, 'i lo Mi trese boso bek na e luga for di unda Mi a manda boso den eksilio.'

¹⁵"Komo ku boso a bisa: 'SENOR a lanta profetanan pa nos na Babilonia'--

¹⁶pasobra asina SENOR ta bisa tokante di e rei ku ta sinta riba trono di David, i tokante di henter e pueblo ku ta biba den e stat aki, boso rumannan ku no a bai huntu ku boso den eksilio--

¹⁷asina e SENOR di ehersitonan ta bisa: 'Mira, Mi ta bai manda spada, hamber i pest riba nan, i lo Mi hasi nan manera figo putri, asina malu ku no por kome nan.

¹⁸I lo Mi persigui nan ku spada, ku hamber i ku pest. I lo Mi hasi nan un teror pa tur e reinonan di tera, pa nan ta un maldishon, un horor, un bofon i un reproche meimei di tur e nashonnan kaminda Mi a kore ku nan manda nan bai,

¹⁹pasobra nan no a skucha Mi palabranan,' SENOR ta deklara, 'ku Mi a manda pa nan bes tras bes pa medio di Mi sirbidonan, e profetanan; ma boso no a skucha,' SENOR ta deklara.

²⁰"Pesei boso tur, eksiliadonan, kendenan Mi a manda bai for di Jerusalem pa Babilonia, boso tur skucha e palabra di SENOR.

²¹Asina e SENOR di ehersitonan, e Dios di Israel, ta bisa tokante di Akab, yu homber di Kolaias, i tokante di Sedekias, yu homber di Maaseias, kendenan ta profetisa mentira na boso den Mi nomber: 'Mira, lo Mi entrega nan den man di Nabukodonosor, rei di Babilonia, i e lo mata nan dilanti di boso bista.

²²I pa nan motibu tur e eksiliadonan di Juda ku ta na Babilonia lo uza un maldishon, bisando: "Ku SENOR hasi ku bo manera Sedekias i manera Akab, kendenan rei di Babilonia a hasa den kandela,

²³pasobra nan a hasi maldat na Israel i a komete adulterio ku e esposanan di nan prohimonan, i den Mi nomber nan a papia mentira ku Mi no a manda nan papia. I Ami ta Esun ku sa i ku ta testigu di esei," SENOR ta deklara.'"

²⁴I papia ku Semaias di Nehelam, bisando:

²⁵"Asina e SENOR di ehersitonan, e Dios di Israel, ta bisa: 'Pasobra bo a manda kartanan den bo mes nomber pa henter e pueblo ku ta na Jerusalem, i pa saserdote Sofonias, yu homber di Maaseias, i pa tur e saserdotenan, bisando:

²⁶"SENOR a nombra abo komo saserdote na luga di saserdote Joiada, pa bira mayordomo den e kas di SENOR riba kada homber loko ku ta profetisa, pa sera e homber ei den sepa i pa pone banchi di heru na su garganta.

²⁷Awor anto, pakiko bo no a reprende Jeremias di Anatot, kende ta profetisa pa boso?

²⁸Pasobra el a manda bisa nos na Babilonia: 'E tempu di eksilio lo ta largu; traha kas i biba aden, i planta hofi i kome loke nan produsi.

²⁹I saserdote Sofonias a lesa e karta aki pa profeta Jeremias tende.

³⁰I e palabra di SENOR a yega na Jeremias, bisando:

³¹"Manda bisa tur e eksiliadonan: 'Asina SENOR ta bisa tokante di Semaias di Nehelam: "Pasobra Semaias a profetisa na boso, maske Mi no a mand'e, i el a hasi boso kere mentira,"

³²pesei, asina SENOR ta bisa: "Mira, Mi ta bai kastiga Semaias di Nehelam i su desendientenan; e lo no tin ningun di su hendenan ta biba mas meimei di e pueblo aki, i e lo no mira e bon ku Mi ta bai hasi pa Mi pueblo," SENOR ta deklara, "pasobra el a predika rebeldia kontra SENOR.