Read Papantla Totonac Jeremias 3 Bible Online

Jeremias 3 - Papantla Totonac bible

Jeremias 3

¹Dios ta bisa: "Si un esposo diborsia su esposa, i e esposa bai lagu'e i bira esposa di otro homber, su esposo lo bolbe serka dje atrobe? E tera ei lo no keda kompletamente kontamina? Ma abo ta un prostituta ku hopi amante, i tog bo ta bolbe serka Mi," SENOR ta deklara.

²"Hisa bo kara na e halturanan pelon, i wak; unda bo no a wordu viola? Bo a sinta kantu di kaminda warda nan manera un arabir den desierto; i bo a kontamina e tera ku bo prostitushon i bo maldat.

³Pesei awaseru a wordu wanta, i no tabatin yobida di primavera. Ma bo tabatin frenta di prostituta; bo no kier a tene berguensa.

⁴No t'awor aki bo a kaba di yamaMi: 'Mi Tata, Abo ta e amigu di mi hubentut?

⁵Lo E keda rabia pa semper? Lo E keda indigna te na fin?' Ata, bo a papia i a hasi maldat, i bo a hasi manera bo tabata kier."

⁶Den e dianan di rei Josias SENOR a bisami: "Bo a mira kiko e Israel infiel ei a hasi? El a bai riba tur seru haltu i bou di tur palu berde, i einan el a komete adulterio.

⁷I Mi a pensa: 'Despues ku el a hasi tur e kosnan aki, e lo bolbe serka Mi'; ma e no a bolbe, i Juda, su ruman muhe traishonero, a mira esaki.

⁸Mi a mira ku pa motibu di tur e adulterio di Israel infiel, Mi a mand'e bai i a dun'e un karta di diborsio. Tog Juda, su ruman muhe traishonero, no a hana temor, ma el a bai i e tambe a komete adulterio.

⁹I a sosode ku pa motibu ku el a konsidera su inmoralidat algu asina liviano, el a kontamina e tera i a komete adulterio ku piedra i palu.

¹⁰I apesar di tur esaki Juda, su ruman muhe traishonero, no a bolbe serka Mi ku henter su kurason, ma mas bien ku fingimentu," SENOR ta deklara.

¹¹I SENOR a bisami: "Israel infiel a resulta di ta mas hustu ku Juda traishonero.

¹²Bai i proklama e palabranan aki den direkshon di nort, i bisa: 'Bolbe, Israel infiel,' SENOR ta deklara. 'Lo Mi no mira riba bo ku rabia, pasobra Mi ta miserikordioso,' SENOR ta deklara. 'Lo Mi no keda rabia pa semper.

¹³Solamente atmiti bo inikidat, ku bo a transgresa kontra SENOR bo Dios, i a komete adulterio ku kualke stranhero ku ta, bou di tur palu berde, i ku bo no a obedese Mi bos,' SENOR ta deklara.

¹⁴'Bolbe, O yu hombernan infiel,' SENOR ta deklara; 'pasobra Mi ta un maestro pa boso, i lo Mi tuma boso, un for di un stat i dos for di un famia, i lo Mi hiba boso na Sion.'

¹⁵E ora ei lo Mi duna boso wardadonan di karne segun Mi kurason, kendenan lo alimenta boso ku konosementu i komprendementu.

¹⁶I lo sosode den e dianan ei, ora boso multiplika i oumenta den e tera," SENOR ta deklara, "ku nan lo no bisa mas: 'E arka di aliansa di SENOR.' E lo no bin den nan pensamentu, ni nan lo no korda riba dje, ni nan lo no hana su falta, ni e lo no wordu traha mas.

¹⁷Na e tempu ei nan lo yama Jerusalem 'E trono di SENOR,' i tur e nashonnan lo reuni ei na Jerusalem, pa e nomber di SENOR. Tampoko nan lo no kana mas segun e kapricho di nan kurason malbado.

¹⁸Den e dianan ei e kas di Juda lo kana huntu ku e kas di Israel, i nan lo bin huntu for di e tera di nort na e tera ku Mi a duna boso tatanan komo erensia.

¹⁹"E ora ei Mi a bisa: 'Ku muchu gustu lo Mi kier a ponebo entre Mi yu hombernan, i dunabo un tera plasentero, e erensia di mas bunita di e nashonnan!' I Mi a bisa: 'Lo bo yamaMi: Mi Tata, i siguiMi sin bira lomba pa Mi.'

²⁰Manera un muhe traishonero ta bandona su amante, asina abo, O kas di Israel, a traishonaMi," SENOR ta deklara.

²¹Un bos ta wordu tend! riba e halturanan pelon, e yoramentu i e suplikanan di e yunan di Israel; pasobra nan a korumpi nan kaminda, nan a lubida SENOR nan Dios.

²²"Bolbe, O yunan infiel, i lo Mi kura boso infieldat." "Ata, nos ta bin serka Bo, pasobra Abo ta SENOR nos Dios.

²³Di berdat, ta en bano salbashon ta wordu spera for di e seritunan, i for di e multitut di serunan. Di berdat, e salbashon di Israel ta den SENOR nos Dios.

²⁴Ma e kos bergonsoso a kaba ku e trabou di nos tatanan for di nos hubentut-- nan tounan di bestia chikitu, nan krianan di baka, nan yu hombernan i nan yu muhenan.

²⁵Laga nos kai drumi den nos berguensa, i laga nos umiyashon tapa nos; pasobra for di nos hubentut te awe nos a peka kontra SENOR nos Dios, nos i nos tatanan. I nos no a obedese e bos di SENOR nos Dios."