Read Papantla Totonac Jeremias 30 Bible Online

Jeremias 30 - Papantla Totonac bible

Jeremias 30

¹E palabra di SENOR ku a yega na Jeremias, bisando:

²"Asina e SENOR Dios di Israel ta bisa: 'Skirbi tur e palabranan ku Mi a papia ku bo den un buki.

³Pasobra, ata, e dianan ta bin,' SENOR ta deklara, 'ku lo Mi trese Mi pueblo Israel i Juda bek for di koutiverio.' SENOR ta bisa: 'Tambe lo Mi trese nan bek na e tera ku Mi a duna nan antepasadonan, i nan lo podera di dje.'"

⁴Awor esakinan ta e palabranan ku SENOR a papia tokante di Israel i tokante di Juda:

⁵"Pasobra asina SENOR ta bisa: 'Mi a tende e zonidu di teror i di spantu, i no tin pas.

⁶Puntra anto i wak si un homber por duna lus. Pakiko Mi ta mira tur homber ku man na hep, manera un muhe na ora di parto? I pakiko tur kara a bira blek?

⁷Ai, pasobra e dia ei ta grandi, no tin ningun pa kompara kune; esaki ta e tempu di angustia pa Jakob, ma e lo wordu salba for di dje.

⁸'I lo sosode den e dia ei,' e SENOR di ehersitonan ta deklara, 'ku lo Mi kibra su yugo for di riba nan nek, i lo Mi ranka nan kabuyanan kibra; i stranheronan lo no hasi nan esklabu mas.

⁹Ma nan lo sirbi SENOR nan Dios, i David nan rei, kende lo Mi lanta pa nan.

¹⁰'I no tene miedu, O Mi sirbido Jakob,' SENOR ta deklara, 'i no desmaya, O Israel; pasobra mira, lo Mi reskatabo for di leu aya, i bo yunan for di e tera di nan koutiverio. Jakob lo bolbe i lo tin pas i siguridat, i ningun hende lo no spant'e.

¹¹Pasobra Mi ta ku bo pa salbabo,' SENOR ta deklara; 'pasobra lo Mi destrui tur e nashonnan kompletamente, pa unda Mi a plamabo, ma abo si lo Mi no destrui kompletamente. Ma lo Mi kastigabo ku hustisia, i di ningun manera lo Mi no lagabo sin kastigu.'

¹²"Pasobra asina SENOR ta bisa: 'Bo aflikshon ta inkurabel, i no tin remedi pa bo herida.

¹³No tin ningun hende pa pleita bo kaso, no tin kura pa bo yaga, ni rekuperashon pa bo.

¹⁴Tur bo amantenan a lubidabo; nan no ta buskabo; manera un enemigu Mi a heridabo ku kastigu di un hende kruel, pasobra bo inikidat ta grandi i bo pikanan ta asina hopi.

¹⁵Pakiko bo ta sklama pa motibu di bo herida? Bo dolo ta inkurabel. Pa motibu di e multitut di bo inikidatnan, i pa motibu ku bo pikanan a oumenta, Mi a hasi e kosnan aki ku bo.

¹⁶'I pesei tur ku devorabo lo wordu devora; i tur bo atversarionan, kada un di nan, lo bai den koutiverio; esnan ku plunder bo, otro lo plunder nan, i tur ku hortabo, lo Mi laga otro horta nan.

¹⁷Pasobra lo Mi restora bo salu i lo Mi kura bo heridanan,' SENOR ta deklara, 'pasobra nan a yamabo rechasa, bisando: "Esaki ta Sion; ningun hende ta preokupa p'e."'

¹⁸"Asina SENOR ta bisa: 'Mira, lo Mi trese e koutiverio di e tentnan di Jakob bek for di eksilio, i lo Mi tin kompashon ku su luganan di biba; e stat lo wordu traha di nobo riba su ruinanan, i e palasio lo para na su propio luga.

¹⁹I for di nan lo sali gradisimentu i e bos di esnan ku ta regosiha; lo Mi multiplika nan i nan lo no mengua; i lo Mi onra nan i nan lo no ta insignifikante.

²⁰Tambe nan yunan lo ta manera antes, i nan kongregashon lo ta stablesi Mi dilanti; lo Mi kastiga tur nan opresornan.

²¹I nan lider lo ta un di nan mes, i nan gobernante lo ta skohi for di meimei di nan; lo Mi hasie hala serka, i e lo aserkaMi; pasobra ken lo a tribi riska su bida pa aserkaMi?' SENOR ta deklara.

²²'Anto boso lo ta Mi pueblo, i Ami lo ta boso Dios.'"

²³At'e tempestat di SENOR! Furia a sali manera un siklon; e lo lora baha riba kabes di e malbadonan.

²⁴E rabia ardiente di SENOR lo no wordu kita te ora ku E hasi i kumpli ku e intento di Su kurason; den e ultimo dianan boso lo komprende esaki.