Read Papantla Totonac Jeremias 31 Bible Online

Jeremias 31 - Papantla Totonac bible

Jeremias 31

¹"Den e tempu ei," SENOR ta deklara, "Ami lo ta e Dios di tur e famianan di Israel, i nan lo ta Mi pueblo."

²Asina SENOR ta bisa: "E pueblo ku a sobrebibi spada a hana grasia den desierto-- Israel, ora ku el a bai pa buska su sosiegu."

³For di leu aya SENOR a parese na dje, bisando: "Mi a stimabo ku un amor eterno; pesei ku miserikordia Mi a halabo.

⁴Atrobe lo Mi trahabo, i lo bo wordu traha di nobo, O birgen di Israel! Atrobe lo bo kohe bo tambureinnan, i sali pa balia ku hendenan kontentu.

⁵Atrobe lo bo planta kunukunan di wendruif riba e serunan di Samaria; i e plantadonan lo planta i disfruta di nan.

⁶Pasobra lo yega un dia ku guardianan riba e serunan di Efrain lo grita: 'Laga nos lanta bai Sion, serka SENOR nos Dios.'"

⁷Pasobra asina SENOR ta bisa: "Kanta duru ku alegria pa Jakob, i grita meimei di e hefenan di e nashonnan; proklama, duna alabansa, i bisa: 'O SENOR, salba Bo pueblo, e restante di Israel.'

⁸Mira, Mi ta bai trese nan for di e tera di nort, i lo Mi rekohe nan for di e partinan mas aleha di tera, entre nan e hendenan siegu i lam, e muhe na estado i esun ku dolo di parto, tur huntu; na gran kantidat nan lo bolbe aki.

⁹Na yoramentu nan lo bin, i ku suplika lo Mi guia nan. Lo Mi hasi nan kana banda di koridanan di awa, riba un kaminda lizu unda nan lo no trompeka; pasobra Mi ta un tata pa Israel, i Efrain ta Mi primogenito."

¹⁰Skucha e palabra di SENOR, O nashonnan, i proklama den e teranan na kosta ku ta keda te leu aya, i bisa: "Esun ku a plama Israel lo rekoh'e, i kuid'e manera un wardado ta kuida su tou."

¹¹Pasobra SENOR a reskata Jakob, i a redimie for di man di esun ku tabata mas fuerte kune.

¹²"I nan lo bin i grita di goso riba e haltura di Sion, i nan lo ta radiante pa motibu di e bondat di SENOR-- pa motibu di e trigo, e bina nobo i e zeta, i pa motibu di e yunan di e tou di bestia chikitu i di e kria di baka; nan bida lo ta manera un hofi ku a wordu muha, i nunka mas nan lo tin tristesa.

¹³E ora ei e birgen lo balia i regosiha, i e hobennan i e ansianonan tur huntu; lo Mi kambia nan lamento hasie bira goso, i konsola nan i duna nan goso na luga di nan tristesa.

¹⁴Lo Mi yena alma di e saserdotenan ku abundansia, i Mi pueblo lo keda satisfecho ku Mi bondat," SENOR ta deklara.

¹⁵Asina SENOR ta bisa: "Un bos ta wordu tend! na Rama, lamentashon i yoramentu amargo. Raquel ta yora su yunan, i no kier wordu konsola pa su yunan, pasobra nan no t'ei mas."

¹⁶Asina SENOR ta bisa: "Domina bo bos pa bo no yora, i bo wowonan pa nan no basha lagrima, pasobra bo obra lo wordu rekompensa," SENOR ta deklara, "i nan lo bolbe for di tera di e enemigu.

¹⁷I tin speransa pa bo futuro," SENOR ta deklara, "i bo yunan lo bolbe na nan mes teritorio.

¹⁸"Siguramente Mi a tende Efrain su kehamentu: 'Bo a kastigami, i mi a keda kastiga, manera un bishe ku nan no a hasi mansu; tresemi bek pa mi por wordu restora, pasobra Abo ta SENOR mi Dios.

¹⁹Despues ku mi a bin bek, mi a repenti; i despues ku mi a hana instrukshon, mi a dal mi mes riba mi hep; mi a keda brongosa i tambe umiya, pasobra mi a karga e reproche di mi hubentut.'

²⁰Ta Efrain ta Mi yu homber stima? E ta mi yu faborito? Maske Mi papia hopi biaha kontra dje, tog Mi ta korda riba dje; pesei Mi kurason ta anhela na dje; siguramente lo Mi tin miserikordia di dje," SENOR ta deklara.

²¹"Marka bo kaminda ku senalnan, pone borchi pa guiabo; paga bon tino riba e kaminda grandi, riba kual bo a bai. Bolbe, O birgen di Israel, bolbe na bo statnan aki.

²²Kuantu tempu mas lo bo sigui bai p'aki p'aya, O yu muhe infiel? Pasobra SENOR a krea algu nobo riba tera: muhe ta konkista homber."

²³Asina e SENOR di ehersitonan, e Dios di Israel, ta bisa: "Atrobe nan lo papia e palabra aki na tera di Juda i den su statnan, ora Mi trese nan bek for di koutiverio: 'Ku SENOR bendishonabo, O habitashon di hustisia, O seru santu!'

²⁴I ayanan Juda i tur su statnan lo biba huntu, e kunukero i esnan ku ta sali bai ku e tounan di karne.

²⁵Pasobra Mi ta satisfase esnan kansa i ta refreska tur ku tin tristesa."

²⁶I aki mi a spierta i a wak ront, i mi a hana mi sono agradabel.

²⁷"Ata, e dianan ta bin," SENOR ta deklara, "ku lo Mi sembra e kas di Israel i e kas di Juda ku e simia di hende i ku e simia di bestia.

²⁸I lo sosode ku meskos ku Mi a vigila nan pa ranka nan afo, kibra, tira abou, destrui i trese desaster riba nan, asina lo Mi vigila nan pa edifika i planta nan," SENOR ta deklara.

²⁹"Den e dianan ei nan lo no bisa mas: 'E tatanan a kome wendruif zur, i djente di e yunan ta kohe rel.'

³⁰Ma kada hende lo muri pa su mes inikidat; ken ku kome wendruif zur, su mes djentenan lo kohe rel.

³¹"Ata, e dianan ta bin," SENOR ta deklara, "ku lo Mi sera un aliansa nobo ku e kas di Israel i ku e kas di Juda,

³²no manera e aliansa ku Mi a sera ku nan tatanan den e dia ku Mi a kohe nan na nan man pa saka nan for di tera di Egipto, Mi aliansa ku nan a kibra, ounke ku Mi tabata un esposo pa nan," SENOR ta deklara.

³³"Ma esaki ta e aliansa ku lo Mi sera ku e kas di Israel despues di e dianan ei," SENOR ta deklara. "Lo Mi pone Mi lei den nan i lo Mi skirbie riba nan kurason; i Ami lo ta nan Dios i nan lo ta Mi pueblo.

³⁴Ni prohimo ni ruman lo no sina otro mas, bisando: 'Konose SENOR,' pasobra nan tur lo konoseMi, for di esun di mas menos te na esun di mas grandi," SENOR ta deklara, "pasobra lo Mi pordona nan inikidat, i nan pika lo Mi no korda mas."

³⁵Asina SENOR ta bisa, Kende ta duna solo komo lus di dia, i e lei fiho di luna i streanan komo lus anochi, Kende ta hasi laman bira brutu, asina ku su olanan ta ronka; e SENOR di ehersitonan ta Su nomber:

³⁶"Si e lei fiho aki disparse for di Mi bista," SENOR ta deklara, "e ora ei e yunan di Israel nunka mas lo ta un nashon Mi dilanti."

³⁷Asina SENOR ta bisa: "Si e shelunan ariba por wordu midi, i e fundeshinan di e tera abou, eksplora, e ora ei lo Mi benta tambe tur e yunan di Israel afo, pa tur loke nan a hasi," SENOR ta deklara.

³⁸"Ata, e dianan ta bin," SENOR ta deklara, "ku e stat lo wordu rekonstrui pa SENOR for di e Toren di Hananeel te na e Porta di Skina.

³⁹I e lina-di-midi lo sigui bai stret dilanti te na e seru di Gareb; i djei bira bai Goa.

⁴⁰I henter e vaye di kadaver i di shinishi, i tur e kunukunan te na Roi Kedron, te na e skina di Porta Kabai bai pariba, lo ta santu pa SENOR; nunka mas e lo wordu ranka afo ni tira abou."