Read Papantla Totonac Jeremias 32 Bible Online

Jeremias 32 - Papantla Totonac bible

Jeremias 32

¹E palabra di SENOR ku a yega na Jeremias den e di dies ana di Sedekias, rei di Juda, kual tabata e di diesocho ana di Nabukodonosor.

²Awor na e tempu ei e ehersito di rei di Babilonia tabatin Jerusalem rondona, i profeta Jeremias tabata sera den e plenchi di prizon ku tabata den e kas di rei di Juda,

³pasobra Sedekias, rei di Juda, a ser'e, bisando: "Pakiko bo ta profetisa, bisando: 'Asina SENOR ta bisa: "Mira, Mi ta bai entrega e stat aki den man di rei di Babilonia, i e lo tum'e.

⁴I Sedekias, rei di Juda, lo no skapa for di man di e kaldeonan, ma siguramente e lo wordu entrega den man di rei di Babilonia, i e lo papia kara-kara kune i wak e ku su mes wowo.

⁵I e lo hiba Sedekias na Babilonia, i e lo keda ayanan te ora Mi bishit'e," SENOR ta deklara. "Si bo bringa kontra e kaldeonan, lo bo no tin eksito"'?"

⁶I Jeremias a bisa: "E palabra di SENOR a yega na mi, bisando:

⁷'Mira, Hanameel, yu homber di bo tio Salum, ta bin serka bo, bisando: "Kumpra pa bo mes mi kunuku ku ta keda na Anatot, pasobra bo tin e derecho di redenshon pa kumpr'e."'

⁸"Anto Hanameel, yu homber di mi tio, a bin serka mi den e plenchi di prizon, segun e palabra di SENOR, i a bisami: 'Pa fabor, kumpra mi kunuku ku ta keda na Anatot, ku ta na tera di Benjamin, pasobra abo tin e derecho di erensia i ta toka na bo pa redimie; kumpr'e pa bo mes anto.' "E ora ei mi a komprende ku esaki tabata e palabra di SENOR.

⁹I mi a kumpra e kunuku ku ta keda na Anatot for di Hanameel, yu homber di mi tio, i mi a pisa e plata p'e, dieshete siklo di plata.

¹⁰I mi a firma i seya e dokumento, i a laga testigunan konfirma esaki i a pisa e plata den balansa.

¹¹E ora ei mi a kohe e dokumentonan di benta, tantu e kopia seya ku ta kontene e terminonan i e kondishonnan, komo e kopia habri.

¹²I mi a duna Baruk, yu homber di Nerias, yu homber di Maaseias, e dokumento di benta den presensia di Hanameel, yu homber di mi tio, i den presensia di e testigunan ku a firma e dokumento di benta, dilanti di tur e hudiunan ku tabata sinta den e plenchi di prizon.

¹³"I den nan presensia mi a duna Baruk ordu, bisando:

¹⁴'Asina e SENOR di ehersitonan, e Dios di Israel, ta bisa: "Tuma e dokumentonan aki, tantu e kopia seya komo esun habri di e dokumento di benta, i hinka nan den un butishi di klei, pa nan keda konserva pa hopi tempu."

¹⁵Pasobra asina e SENOR di ehersitonan, e Dios di Israel, ta bisa: "Kasnan, kunukunan i plantashonnan di wendruif lo wordu kumpra atrobe den e tera aki."'

¹⁶"Despues ku mi a entrega Baruk, yu homber di Nerias, e dokumento di benta, mi a hasi orashon na SENOR, bisando:

¹⁷'Ai Senor DIOS! Mira, ta Abo a traha e shelunan i tera pa medio di Bo gran poder i pa medio di Bo brasa ekstendi! Nada ta muchu difisil pa Bo.

¹⁸Bo ta mustra miserikordia na milnan, ma ta paga bek e inikidat di tatanan den skochi di nan yunan despues di nan, O Dios grandi i poderoso, Kende Su nomber ta e SENOR di ehersitonan.

¹⁹Bo ta grandi den konseho i poderoso den echo, pasobra Bo wowo ta habri pa tur e kamindanan di e yunan di hende, pa rekompensa kada un segun su kondukta i segun e fruta di su echonan.

²⁰Bo a hasi senalnan i maraviyanan na tera di Egipto te dia djawe, tantu den Israel komo den henter humanidat; i Bo a stablese un nomber pa Bo mes, manera ta te dia djawe.

²¹Bo a trese Bo pueblo Israel for di tera di Egipto ku senalnan i maraviyanan, ku un man fuerte, ku un brasa ekstendi i ku gran teror;

²²i a duna nan e tera aki ku Bo a hura pa duna nan tatanan, un tera ku tin lechi i miel na abundansia.

²³Nan a drenta i a podera di dje, ma nan no a obedese Bo bos, ni nan no a kana segun Bo lei. Nan no a hasi nada di tur loke Bo a ordena nan pa hasi; pesei Bo a laga tur e kalamidat aki bin riba nan.

²⁴'Mira, e baluartenan a yega te na e stat pa podera di dje. Pa medio di spada, hamber i pest e stat a wordu entrega den man di e kaldeonan ku ta bringa kontra dje; i loke Bo a bisa a sosode; i ata, Bo mes ta mira esei.

²⁵I Bo a bisami, O Senor DIOS: "Kumpra e kunuku pa bo mes ku plaka i laga testigunan konfirma esaki"--ounke ku e stat ta entrega den man di e kaldeonan.'"

²⁶E ora ei e palabra di SENOR a yega na Jeremias, bisando:

²⁷"Mira, Ami ta SENOR, e Dios di tur karni; akaso tin algu ku ta muchu difisil pa Mi?"

²⁸Pesei, asina SENOR ta bisa: "Mira, Mi ta kla pa entrega e stat aki den man di e kaldeonan i den man di Nabukodonosor, rei di Babilonia; i e lo tum'e.

²⁹I e kaldeonan ku ta bringa kontra e stat aki lo drenta, pega e stat aki na kandela i kim'e, huntu ku e kasnan kaminda e hendenan a ofrese sensia na Baal riba nan dak i a basha ofrendanan di bibida na otro diosnan, pa probokaMi na rabia.

³⁰"Di berdat, e yunan di Israel i e yunan di Juda a hasi solamente loke ta malu den Mi bista for di nan hubentut; pasobra e yunan di Israel tabata blo probokaMi na rabia ku e obra di nan mannan," SENOR ta deklara.

³¹"Di berdat, for di dia ku nan a trah'e te dia djawe, e stat aki a lanta Mi rabia i Mi furia, asina ku e mester wordu kita for di Mi bista,

³²pa motibu di tur e maldat di e yunan di Israel i di e yunan di Juda, ku nan a hasi pa probokaMi na rabia--nan, nan reinan, nan lidernan, nan saserdotenan, nan profetanan, e hombernan di Juda i e habitantenan di Jerusalem.

³³I nan a bira nan lomba pa Mi i no nan kara; ounke Mi a sina nan, Mi a lanta tempran i a sina nan, nan no kier a skucha ni asepta instrukshon.

³⁴Ma nan a pone nan kosnan repugnante den e kas ku ta wordu yama na Mi nomber, pa kontamin'e.

³⁵Nan a traha e luganan haltu di Baal ku ta keda den Vaye di Ben-hinom, pa hasi nan yu hombernan i nan yu muhenan pasa dor di kandela pa Molok, loke Mi no a ordena nan pa hasi, ni nunka a bin den Mi pensamentu ku nan lo a hasi e abominashon aki, pa hasi Juda peka.

³⁶"Pesei, asina SENOR, e Dios di Israel, ta bisa tokante di e stat aki, di kual bo ta bisa: 'E ta entrega den man di rei di Babilonia pa medio di spada, hamber i pest.'

³⁷Mira, lo Mi rekohe nan for di tur e paisnan kaminda Mi a kore ku nan manda nan bai den Mi rabia, den Mi furia i den gran indignashon; i lo Mi trese nan bek na e luga aki i hasi nan biba den siguridat.

³⁸I nan lo ta Mi pueblo i Ami lo ta nan Dios;

³⁹i lo Mi duna nan un kurason i un kaminda, pa nan tin semper temor pa Mi, pa nan mes bon i pa bon di nan yunan despues di nan.

⁴⁰Lo Mi sera un aliansa eterno ku nan: nunka lo Mi stop di hasi bon na nan. I lo Mi pone temor pa Mi den nan kurason, pa asina nan no bandonaMi.

⁴¹I lo Mi tin goso den nan pa hasi bon na nan; i lo Mi planta nan fielmente den e tera aki, ku henter Mi kurason i ku henter Mi alma.

⁴²"Pasobra asina SENOR ta bisa: 'Meskos ku Mi a trese tur e kalamidat pisa aki riba e pueblo aki, asina Mi ta bai trese riba nan tur e bondat ku Mi ta priminti nan.

⁴³I kunukunan lo wordu kumpra den e tera aki, di kual boso ta bisa: "E ta un desolashon, sin hende i sin bestia; e ta entrega den man di e kaldeonan."

⁴⁴Hende lo kumpra kunuku ku plaka, firma i seya dokumento i laga testigunan konfirma esaki den e tera di Benjamin, den e besindario di Jerusalem, den e statnan di Juda, den e statnan riba seru, den e statnan den vaye i den e statnan di Negev; pasobra lo Mi trese nan bek for di koutiverio,' SENOR ta deklara."