Read Papantla Totonac Jeremias 33 Bible Online

Jeremias 33 - Papantla Totonac bible

Jeremias 33

¹E ora ei e palabra di SENOR a yega na Jeremias pa di dos biaha, mientras ku e tabata sera ainda den e plenchi di prizon, bisando:

²"E SENOR ku a krea tera, e SENOR ku a form'e pa stables'e--SENOR ta Su nomber--ta bisa asina:

³'Sklama na Mi, i lo Mi kontestabo, i lo Mi mustrabo kosnan grandi i poderoso ku bo no sa.'

⁴Pasobra asina SENOR, e Dios di Israel, ta bisa tokante di e kasnan di e stat aki, i tokante di e kasnan di e reinan di Juda, kualnan a wordu kibra pa traha un defensa kontra e baluartenan i kontra spada:

⁵'Nan ta bin pa bringa kontra e kaldeonan i pa yena e luganan ku kadaver di hombernan ku Mi a mata den Mi rabia i den Mi furia, i Mi a skonde Mi kara pa e stat aki pa motibu di tur nan maldat.

⁶'Mira, lo Mi trese salu i kura p'e i lo Mi kura nan, i lo Mi revela na nan abundansia di pas i berdat.

⁷Lo Mi trese Juda i Israel bek for di koutiverio; i lo Mi bolbe lanta nan manera nan tabata na prinsipio.

⁸Lo Mi purifika nan di tur nan inikidat ku nan a komete kontra Mi, i lo Mi pordona tur nan inikidatnan ku nan a komete kontra Mi, i pa medio di kualnan nan a transgresa kontra Mi.

⁹I e stat aki lo ta pa Mi un nomber di goso, alabansa i gloria dilanti di tur e nashonnan di tera ku lo tende di tur e bon ku Mi ta hasi pa nan; i nan lo hana miedu i tembla pa motibu di tur e bondat i tur e pas ku Mi ta hasi p'e.'

¹⁰"Asina SENOR ta bisa: 'Den e luga aki di kual boso ta bisa: "E ta desola, sin hende i sin bestia," esta, den e statnan di Juda i den e kayanan di Jerusalem ku ta desola, sin hende, sin habitante i sin bestia, tog lo por tende atrobe

¹¹bos di goso, bos di alegria, bos di bruidehom i bos di bruit, bos di esnan ku ta bisa: "Duna gradisimentu na e SENOR di ehersitonan, pasobra SENOR ta bon, pasobra Su miserikordia ta pa semper"; i bos di esnan ku ta trese un ofrenda di gradisimentu den e kas di SENOR. Pasobra lo Mi trese esnan ku ta den koutiverio bek na e tera, manera tabata na prinsipio,' SENOR ta bisa.

¹²"Asina e SENOR di ehersitonan ta bisa: 'Na e luga aki ku ta desola, sin hende i sin bestia, i den tur su statnan, lo tin luganan di yerba berde atrobe pa wardadonan trese nan tou di karne aden.

¹³Den e statnan den seru, den e statnan den vaye, den e statnan di Negev, den e tera di Benjamin, den e besindario di Jerusalem i den e statnan di Juda, e tounan lo bolbe pasa bou di man di esun ku ta konta nan,' SENOR ta bisa.

¹⁴'Ata, e dianan ta bin,' SENOR ta deklara, 'ku lo Mi kumpli ku e bon palabra ku Mi a papia tokante di e kas di Israel i e kas di Juda.

¹⁵'Den e dianan ei i na e tempu ei lo Mi hasi un Rama hustu spreit pa David; i E lo ehekuta huisio i hustisia riba tera.

¹⁶Den e dianan ei Juda lo wordu salba i Jerusalem lo biba den siguridat; i asina e lo wordu yama: SENOR ta nos hustisia.'

¹⁷"Pasobra, asina SENOR ta bisa: 'Nunka David lo no falta un homber pa sinta riba trono di e kas di Israel;

¹⁸i e saserdotenan levitiko nunka lo no falta un homber Mi dilanti pa ofrese sakrifisionan kima, pa kima ofrendanan di mainshi i pa prepara sakrifisionan kontinuamente.'"

¹⁹I e palabra di SENOR a yega na Jeremias, bisando:

²⁰"Asina SENOR ta bisa: 'Si boso por kibra Mi aliansa ku dia, i Mi aliansa ku nochi, asina ku lo no tin dia i nochi na nan tempu stipula,

²¹anto por kibra tambe Mi aliansa ku Mi tin ku Mi sirbido David, asina ku e lo no tin un yu homber pa reina riba su trono, i Mi aliansa ku e saserdotenan levitiko, Mi sirbidonan.

²²Meskos ku e ehersitonan di shelu no por wordu konta, i santu di laman no por wordu midi, asina lo Mi multiplika e desendientenan di Mi sirbido David i e levitanan ku ta sirbiMi.'"

²³I e palabra di SENOR a yega na Jeremias, bisando:

²⁴"Bo no a ripara kiko e pueblo aki a bisa: 'SENOR a rechasa e dos famianan ku El e skohe'? Pesei nan ta despresia Mi pueblo i den nan bista nan no ta un nashon mas.

²⁵Asina SENOR ta bisa: 'Si Mi aliansa ku dia i nochi no permanese, i si Mi no a stablese e leinan fiho pa shelu i tera,

²⁶anto lo Mi a rechasa e desendientenan di Jakob i di Mi sirbido David tambe, i lo Mi no a skohe for di su desendientenan gobernantenan pa e desendientenan di Abraham, Isaak i Jakob. Ma lo Mi trese nan bek for di koutiverio i lo Mi tene miserikordia di nan.'"