Read Papantla Totonac Jeremias 35 Bible Online

Jeremias 35 - Papantla Totonac bible

Jeremias 35

¹E palabra di SENOR ku a yega na Jeremias den e dianan di Joakim, yu homber di Josias, rei di Juda, bisando:

²"Bai na kas di e rekabitanan i papia ku nan; trese nan den e kas di SENOR, den un di e salanan, i duna nan bina pa nan bebe."

³Anto mi a bai buska Jaazanias, yu homber di Jeremias, yu homber di Habasinias, i su ruman hombernan, i tur su yu hombernan, i henter e kas di e rekabitanan,

⁴i mi a trese nan den e kas di SENOR, den e sala di e yu hombernan di Hanan, yu homber di Igdalias, e homber di Dios, kual tabata keda banda di e sala di e ofisialnan, kual tabata keda riba esun di Maaseias, yu homber di Salum, e wardado-di-porta.

⁵E ora ei mi a pone kanikanan yen di bina i kopanan dilanti di e hombernan di e kas di e rekabitanan; i mi a bisa nan: "Bebe bina!"

⁶Ma nan a bisa: "Nos lo no bebe bina, pasobra nos tata Jonadab, yu homber di Rekab, a duna nos ordu, bisando: 'No bebe bina nunka, ni boso ni boso yunan.

⁷I boso no mag traha kas, ni sembra simia, ni planta kunuku di wendruif, ni tum'e pa boso; ma boso mester biba den tent henter boso bida, pa boso keda hopi tempu na e tera kaminda boso ta biba komo stranhero.'

⁸I nos a obedese e bos di nos tata Jonadab, yu homber di Rekab, den tur loke el a ordena nos, pa no bebe bina nunka, ni nos, ni nos esposanan, ni nos yu hombernan ni nos yu muhenan,

⁹ni traha kas pa nos biba aden; i nos no tin plantashon di wendruif, ni kunuku, ni simia.

¹⁰Den tent so nos a biba, i nos a obedese i a hasi konforme tur loke nos tata Jonadab a ordena nos.

¹¹Ma ora Nabukodonosor, rei di Babilonia, a lanta kontra e tera, nos a bisa: 'Laga nos bai Jerusalem pa skapa for di e ehersito di e kaldeonan i for di e ehersito di Siria.' Asina nos a keda na Jerusalem."

¹²E ora ei e palabra di SENOR a yega na Jeremias, bisando:

¹³"Asina e SENOR di ehersitonan, e Dios di Israel, ta bisa: 'Bai i puntra e hombernan di Juda i e habitantenan di Jerusalem: "Boso no kier asepta instrukshon dor di skucha na Mi palabranan?" SENOR ta deklara.

¹⁴"Jonadab, yu homber di Rekab, a ordena su yu hombernan pa no bebe bina, i e mandamentu aki a wordu obedese. Te dia djawe nan no ta bebe bina, pasobra nan ta obedese e mandamentu di nan tata. Ma Ami a papia ku boso bes tras bes; tog boso no a obedeseMi.

¹⁵Tambe Mi a manda tur Mi sirbidonan, e profetanan, bes tras bes serka boso, bisando: 'Boso tur bolbe for di boso mal kaminda i koregi boso echonan, i no sigui tras di otro diosnan pa adora nan; anto boso lo biba den e tera ku Mi a duna boso i boso antepasadonan; ma boso no a inklina boso orea ni a skucha na Mi.

¹⁶Di berdat, e yu hombernan di Jonadab, yu homber di Rekab, a obedese e mandamentu di nan tata ku el a ordena nan, ma e pueblo aki no a skucha na Mi.'"'

¹⁷"Pesei, asina e SENOR Dios di ehersitonan, e Dios di Israel, ta bisa: 'Mira, Mi ta bai trese riba Juda i riba tur e habitantenan di Jerusalem henter e desaster ku Mi a pronunsia kontra nan; pasobra Mi a papia ku nan, ma nan no a skucha, i Mi a yama nan, ma nan no a kontesta.'"

¹⁸E ora ei Jeremias a bisa e kas di e rekabitanan: "Asina e SENOR di ehersitonan, e Dios di Israel, ta bisa: 'Pasobra boso a obedese e mandamentu di boso tata Jonadab, a warda tur su mandamentunan i a hasi konforme tur loke el a ordena boso,

¹⁹pesei, asina e SENOR di ehersitonan, e Dios di Israel, ta bisa: "Nunka Jonadab, yu homber di Rekab, lo no falta un homber pa para Mi dilanti.